Read ngando Ba-Loma 9 Bible Online

Ba-Loma 9 - ngando bible

Ba-Loma 9

¹Latenda nko solosolo eneyali Masiya, mpafote, ko temoin en’otem’onami ayatende l’emi eneyali Bolimo bon’olotsi,

²mbo njali la lokeseli bike ko l’efafo ona lokanyi lon’otem’onami enefakale.

³Nsokolanga lacina emamene njalame anatema, ko njalane la Masiya njalana lacin’ena bifili binami banotwa l’emi.

⁴Iyo bayali nko Ba-Yisalaele, banilama ona lifoka lina bona, ko banayali l’okonde ko la biteelo bina basangya, ko la beeka, ko l’ekambelo ona Yakomba, ko la bisemba.

⁵Bafango ban’alale nko baniyo, koko Masiya ayaki ena yonge nk’eneyal’iyo, ende onoyali Yakomba ona liko ya bato bahatu, onokumyama bisike la bisike. Ndoho.

⁶Koko efa yoka yoi lina Yakomba limoyalama bototoloto. Lacina bona bana Yisalaele bahatu bafayali Ba-Yisalaele;

⁷koko baho bahatu bafayali bana mene lacin’oka iyo bayali en’ecimo ena Abalayama; ohonde, Ecimo ena ban’ane engandama eneyali Isaka.

⁸Yok’osamb’one, ban’ana yonge bafayali ban’ana Ya komba: banatangama bana mene nko ban’ana esemba.

⁹Lacina yoi lin’esemba liha line: Nongoya yoka esik’ene, ko Sala angota bon’ona mpame.

¹⁰Koko efa yok’oho kei; ohonde eneki Lebeka otolaka yemi koto, nko bafango’oniso oka Isaka

¹¹kuma bana batotwa, ko batile bolotsi la bowe, lacin’eho eango ena Yakomba yoka bosamb’onoyali esonelo ekikyame, efa l’ikambwa bina nkamba, ohonde l’ende onelela—

¹²yoi litendemaki eneyal’ende, ate, Botoolo angosaela bakune.

¹³Yoka bosamb’onoki yoi otengamaka, Njokaki Yakobo nganji, koko njokaki Esau bowe.

¹⁴Iya, tongila nd’oka Yakomba ainda mbongi? Efana!

¹⁵Lacin’oka amosumola Mose, ate, Onongi’m’ook’isei, nongok’ende isei; ko onongi’m’ooka nganji, nongok’ende nganji.

¹⁶Yok’oho, yoi lifayali eneyal’ende onolanga, ko lifayali eneyai’ende onokenda: liyali nk’eneyali Yakomba onok’isei.

¹⁷Lacina Bokanda bona Yakomba bosumola Falo, ate, Nkeemadyaki la neina ene, lacin’eho njenyanya le locili lonami, ko lacina lina linami lisekodyame ona loko lohalotu.

¹⁸Yok’oho, onongi’nd’olanga lacina aokamele isei, amookamel’isei; ko onongi’nd’olanga lacina aocidya botema, amocidy’otema.

¹⁹Nkwaho ongonjufola, ate, Ncina enakus’ende lifela lofeli eka nai? Onosimbya eango enande oka nai?

²⁰A koko, e boto onofuedya Yakomba baoyi ond’oya? Ekambwa enenunolamaki engokolana yila bonunoli, ate, E onnunolaki la bomun’one lacina nai?

²¹Iya bokengi bona mpoke afayali nde l’etelo eneyali ilongo, lacina akenge la bomaka bomoko mpoke emoi ena lokumo, ko ekina eninda lokumo?

²²Koko yombo Ya-komba sianga lacina atume bato nkele enande,

²³ko aeyanya locili lonande, ko amimedya l’isei ina locinji mene mpoke ina nkele inikoli la mbehya; ko lacina aeyanya lituka lina bokonde’onande eneyali mpoke in’isei inande iniki’nd’okodyaka en’oso lacin’eho late bokonde,

²⁴nk’iso banaki’nd’oelelaka, ef’eneyali Ba-Yuda kei, ohonde eneyali Befenda nkoho?

²⁵Yok’osamb’onoki’nd’otendaka en’okanda bona Osea, ate, Iyo banatayala bato’anami, nongatang’iyo bato’anami; Ko l’ende onotalangama, nongotang’ende onolangama.

²⁶Koko yoi lingilama lingu, noka, en’edye enek’iy’osumolamaka, Mbo ino bofayali bato’anami, Nko meho bangotangama ban’ana Yakombaonoyaike.

²⁷Koko Yesa ya aololua lacin’ena Yisalaele, ate, Kanga Iaali lona ban’ana Yisalaele loyali yoka longewu lona lose lon’okwa, onongika linga nk’etenyi eniyo ke;

²⁸lacina Yawe angila yoi linande ena loko, angosidya liho, ko angosimba nkwaho.

²⁹Ko yoka bosamb’onoki Yesaya oilaka en’oso, ate, Nko Yawe ena Sabota atatocikel’iso etenyi en’a-to en’onyanga, Tumbe toyalamaki yoka Sodomo, ko tumbe tokolanaki l’Amola.

³⁰Yok’oho, tila is’ate’oya? Lacina Befenda banatakilana la mbongi bamolata mbongi, nko mbongi en’meedyo;

³¹ohonde Ba-Yisalaele banakilanaki la lisangya lina mbongi batayela ena lisangya liho.

³²Lacina nai? Lacin’oka batafona liho l’imeedyo, ohonde bayaaki yoka banafona liho l’ikambwa bina basangya. Bamokumba ena lute lin’ekumbelo;

³³yoka bosamb’onoki yoi otengamaka, Noka, laambya ena Siona lute lina ekumbelo ko la lute linaliyali yoka lofoka lon’ilonga, Ko boto onoimedy’ende afokaki nsoi.