Read ngando 1 Ba-Kolinto 1 Bible Online

1 Ba-Kolinto 1 - ngando bible

1 Ba-Kolinto 1

¹Paulo onelelama lacin’eho ayalame ekima ena Yesu Masiya l’eango ena Yakomba, la Sosetene efili eniso,

²eneyali ekelesia ena Yakomba eneyali ena Kolinto, nk’iy’anekyama en’oeka eneyali Yesu Masiya, banelelama lacin’eho bayalame ban’oeka, iyo l’iyatu en’ili behetu banelela lina lina Nkolo eniso Yesu Masiya en’oondo, ende ayali Nkolo eniyo l’iso:

³Isei la mwi iyalamake eneyal’ino eneyali Yakomba Bafango’oniso ko l’eneyali Nkolo Yesu Masiya.

⁴Lakanga Yakomba enami lokango bisike bihitu lacin’enino, lacin’en’isei ina Yakomba inifamaki eneyal’ino la Masiya Yesu;

⁵bofudyamaki eneyal’ende en’aoyi bahatu, nk’ena nkaso ehatu ko l’ena njeya ehatu;

⁶nk’osamb’onoki bosimo bona Masiya okikyamaka eneyal’ino;

⁷lacin’ino bofinde nganji ntutuma en’olimo; ko boyalengedya enyelo ena Nkolo eniso Yesu Masiya.

⁸Ende angokokiky’ino yengoko nsimbo, lacin’eho boyalame efana lofeli en’ina bona Nkolo eniso Yesu Masiya.

⁹Yakomba onokelelak’ino en’eambanelo ena Bon’onande Yesu Masiya Nkolo eniso, ayali nko solosolo.

¹⁰Koko lakoond’ino, bifili, la lina lina Nkolo eniso Yesu Masiya, lacina inatu botende bonyua bomoko kei, ko botakambwanake eneyal’inoamene; ohonde bambana la lokanyi lomoko ko l’eango emoko en’eambanelo enakolana.

¹¹Lacin’oka baise ecimo ena Kuloe bamonsumol’emi, bifili binami, iy’ate ino bosa nko nsaka en’atenyi’aninoamene.

¹²Lokanyi lonakanel’emi nde lone, emite boto Toto’onino ayile ate, Emi nde nde ona Paulo, ko Emi nde nde ona Apolo, ko Emi nde nde ona Kefa, ko Emi nde nde ona Masiya.

¹³Iya, Masiya akambwana nde? Paulo akowelaki nde en’ekulusu? Ino binamaki en’asi ena lina lina Paulo?

¹⁴Lakanga Yakomba lokango lacin’oka emi ntina boto’onino’omoko en’asi, umola nko Kulisipo la Ngayo;

¹⁵lacina boto’omoi atongoyila, ate, ino binamaki ena lina linami.

¹⁶Ko njinaki ecimo ena Setefano en’asi; koko mpeya yombo njinaki boto’omoi.

¹⁷Lacina Masiya atantoma oyin’ato en’asi: antomaki lacin’eho nsumole bato bosimo bon’olotsi: efa la bomwu bon’aoyi ntenda, lacina ekulusu ena Masiya etongoyalama bototoloto.

¹⁸Lacina yoi lin’ekulusu liyali nko yoi lin’ilemeleme eneyal’iyo banayehyame, ohonde liyali nko mpa mba ena Yakomba eneyal’is’anayaike.

¹⁹Lacin’oka yoi limotengama, Nongehya bomwu bona bamene bomwu, Ko nongotembola nnonganya ena bamene nnonganya.

²⁰Mene bomwu ayali meya? botengi bon’okanda ayali meya? Baci bona ntango bon’esik’ene ayali meya? Yakomba atila nde bomwu bona loko lone boyalame nko baoyi ban’ilemeleme?

²¹Ko lacin’oka baise lokobateya Yakomba la bomwu boniyoamene, Yakomba ena bomwu bonande atangaki’olotsi ate aiky’ato banimedya la nsumola en’osimo enefana bomwu.

²²Lacina Ba-Yuda baufola ndembi ena mpefa, ko Ba-Elene bafona bomwu;

²³ohonde iso tosekodya bosimo bona Masiya onakamaki en’ekulusu, bosimo bonoyali nk’ekumbelo eneyali Ba-Yuda, ko la yoi lin’ilemeleme eneyali Ba-Elene;

²⁴ohonde eneyal’iyo banelelama, le Ba-Yuda le Ba-Elene, ende ayali Masiya mpamba ena Yakomba ko la bomwu bona Yakomba.

²⁵Lacin’oka biinda bona bomwu bona Yakomba boleki bato la bomwu, ko bolu’olu bona Yakomba boleki bato la locili.

²⁶Koko bokanela bokotua bonok’in’oelelamaka, bifili; lacina bana-bomwu bon’okotua bon’ato, la banampamba, la bana-lifoka banelelama bafan’ike:

²⁷Yakomba amosona toma tona loko tonatoinda bomwu lacin’eho aokya baise bomwu nsoi; ko Yakomba amosona toma tona loko tona bolu’olu lacin’eho aokya bana locili nsoi;

²⁸ko Yakomba amosona toma tona loko tonatoinda lokumo, ko la toma tonatokanel’ato bototoloto, ko la toma tonatofayali, lacin’eho aehya toma tonatoyali, toyalame nko bototoloto;

²⁹lacina boto atongoyofef’endamene en’oso’onande.

³⁰Koko lacin’enande ino boyali eneyali Masiya Yesu, onoki Yakomba otilelaka bomwu, ko la mbongi, ko la njekya en’oeka, ko l’ikwelo ena mbiko;

³¹lacina, yok’onoki yoi otengamaka, Onokumya lokumo, akumyake lokumo lona Nkolo.