Read ngando 1 Ba-Kolinto 10 Bible Online

1 Ba-Kolinto 10 - ngando bible

1 Ba-Kolinto 10

¹Koko bifili, mpalange’oka ino binda njeya ena yoi line: bafango’aniso bahatu bayaaki en’ase’a lilo, ko iyatu batianyaki lose lon’okwa;

²ko iyatu bainamaki eneyali Mose ena lilo ko l’ena lose lon’okwa;

³ko iyatu balaki toma ton’olimo tona bokotu’omoko;

⁴ko iyatu bamelaki emeelo en’olimo nk’eh’emoko; lacin’oka bamelaki ena lufe lin’olimo lineyakilaki, ko lufe liho nko Masiya.

⁵Ohonde Yakomba atakika la bike’oniyo bonoleki; ko la ncin’eho baehyamaki ena sengelenge.

⁶Baoyi’ane bakambamaki yoka ndembi ina lilako eneyal’iso, totongoyoka baoyi’owe mposa yoka bosamb’onok’iy’ookaka.

⁷Ko botayalamake bakumi bana baidola, yok’onoki bamoi’aniyo oyalaka, yoka bosamb’onoyali yoi linalitengi, Bato bakisaki’ase lacina bale ko bamele, ko baemalaki lacin’eho bakenya tokenya.

⁸Totatatake likele, yoka bosamb’onoki bamoi baniyo otataka, ko bawaki en’in’omoko bato nkese ife la nkoto isaso.

⁹Ko totamekake Nkolo, bosamb’onoki bamoi’aniyo omekaka, ko bawaki la njua.

¹⁰Ko botaninganingake, yoka bosamb’onoki bamoi’aniyo oninganingaka, ko baehyamaki la boyaki.

¹¹Koko baoyi’ane bailamaki eneyal’iyo yoka bikolanya bina lilako, ko batengamaki lacin’ena lilako eneyal’iso, is’anaki esimbelo ena bisike ofoelaka.

¹²Lacin’eho, akoli eneyal’ende onokanel’oka aemali, aongya lilenda, atongoyokwa.

¹³Lomeko lotakokwel’ino lonelofinya boto yitedya; koko Yakomba ayali solosolo, ko afimedy’oka bomekame la lomeko lonelofiny’ino; ohonde enengi lomeko oyelo, angokokoedy’ino elotelo, lacin’eho bitedya loho.

¹⁴Lacin’eho, in’analangama l’emi, bolota ekumedyo ena baidola.

¹⁵Latenda nk’eyoka eneyali bato bana bomwu: bosisolaka baoyi banatend’emi.

¹⁶Ekalaen’osako enasakel’iso, efa nde eambanelo ena bakila bana Masiya? Mampa enakes’iso, efayali nde eambanelo ena yonge lina Masiya?

¹⁷Lacin’is’anayali biketoyali mampa nk’emoko, yonge limoko; lacin’oka isatu toyali la liondo ena mampa emoko.

¹⁸Benaka Yisalaele bosamb’onoyali yonge: iy’anala nyama iniyakamaki ena mbeka, bafayali nde en’eambanelo ena mesa ena mbeka?

¹⁹Yoi linatend’emi lind’oya? Emi liland’oka idola iyali iyema itutuma? ko nyama enek’iy’oyakelaka idola eyali iyema itutuma?

²⁰Efana: nyama inayaka Befenda ena mbeka bayakela bademona, bafayakele Yakomba. Ko mpalange’oka ino boat’eambanelo la bademona.

²¹Ino bofamelisa ekala ena Nkolo ko l’ekala ena bademona nkoho; ko bofakolana liata liondo ena mesa ena Nkolo ko l’ena mesa ena bademona nkoho.

²²Iya, iso tongokya nde Nkolo ekuku? Iso tolek’ende locili?

²³Baoyi bahatu bakoli l’emi, ohonde baoyi bahatu bafana nkita. Baoyi bahatu bakoli, ohonde baoyi bahatu bafakiky’oto.

²⁴Boto atayofonelake endamene bolotsi: afonelake boto’okina bolotsi.

²⁵Nyama ihatu inateky’iyo ena mbakala bolaka, botufolake biufo lacin’ena bokandokando en’otema,

²⁶loko londe lona Yawe, ko la toma tohatotu tonande nkoho.

²⁷Yombo boto onofan’imeedyo akelel’ino en’elambedya, ko bolanga lacina bocu, toma tohatotu tonakoambedy’iyo, ino bolaka—botufolake biufo lacin’ena bokandokando en’otema.

²⁸Ohonde yombo boto akosumol’ino, ate, Nyama ene eyakamaki ena mbeka; botalake nyama eho, lacin’enande onokosumolak’ino, ko lacin’ena juge en’otema;

²⁹juge en’otema ef’ene, nd’enande, lacin’oka etelo enami ena nsomi eokodyama la juge en’otema en’oto’okina lacina nai?

³⁰Yomboemi njale toma l’ekumedyo ena Yakomba, iya, bantang’emi lotango lacin’ena befambe benakang’emi Yakomba lokango ncina eka nai?

³¹Lacin’eho, kangabola toma, kanga bomela, kanga bokamb’ekambwa en’etaketaka, bilaka baoyi’aho bahatu lacin’eho Yakomba akumyame.

³²Botayalamake ekumbelo eneyali Ba-Yuda, l’eneyali Ba-Elene, l’eneyali ekelesia ena Yakomba;

³³yoka bosamb’onoky’emi bato bahatu ekiko en’aoyi bahatu, ko mpafone nkita enamamene: lafona nkita en’ato bike, lacin’eho baike.