Read ngando 1 Ba-Kolinto 11 Bible Online

1 Ba-Kolinto 11 - ngando bible

1 Ba-Kolinto 11

¹Bokil’okotu’onami, yoka bosamb’onakil’emi Masiya.

²Koko, bifili, lakokumy’ino lacin’oka bombofw’emi en’aoyi bahatu; ko bundamela balako nk’eyoka bosamb’onoki’m’okofaka baho.

³Koko lalang’ino bey’oka bote bona mpame la mpame nko Masiya, ko bote bon’oyoto nko mpame, ko bote bona Masiya nko Yakomba.

⁴Mpame ononda boondo ko asumol’ato bosimo l’ote’onande nko nkundama, aatela bote’onande nsoi.

⁵Koko boyoto ononda boondo ko asumol’ato bosimo kum’atakund’ote, aatela bote’onande nsoi; nk’aila yok’osamb’oho ayali nk’eyoka amokool’ote.

⁶Nko boyoto afakund’ote, tumbe akoola lifo; koko yombo nkesa ena lifo la nkoola en’ote bayali nsoi eneyali boyoto, akoli eneyal’ende akunde bote.

⁷Mpame afakunde bote, lacin’oka ende ayali ekolanya la bokoka bona Yakomba; ohonde boyoto ayali bokoka bona mpame.

⁸Ko mpame ayata eneyali boyoto: boyoto kongoyaki eneyali mpame.

⁹Ko mpame atanunolama lacin’en’oyoto: boyoto kongonunolamaki laci n’ena mpame.

¹⁰Lacin’eho, akoli eneyali boyoto alote en’ote ndembi en’efikelo enafik’ende, lacin’ena bikima bina loola.

¹¹Koko eneyali Nkolo bayato bafayali nk’iyo kei efana mpame, ko mpame bafayali nk’iyo kei efan’ayato.

¹²Nk’eyok’onoki boyoto oyaka eneyali mpame, mpame aoya nk’eneyali boyoto—koko bikambwa bihitu biyali nk’eneyali Yakomba.

¹³Inoamene bokodyaka yoi line: Yombo boyoto aonda Ya komba kum’atakund’ote, yoi liho lind’olotsi?

¹⁴Bete-m’eninoamene befakolaka nd’oka yombo mpame ayali la lifo lina litali yoi liho liyali nsoi eneyal’ende?

¹⁵Ohonde yombo boyoto ayali la lifo lina litali, yoi liho liyali nko lokumo eneyal’ende, lacin’oka lifo linande limofama eneyal’ende yok’ekundelo.

¹⁶Koko yombo boto’omoi asokolanga lacina aate ntango la baoyi’ane, iso la bikelesia bina Yakomba tofeya bokotu’okina.

¹⁷Enakolak’emi lilako line mpakokumy’ino, enok’emi’oka besolongano benasolongan’ino befakiilel’ino bolotsi: beokiilel’ino nko bowe.

¹⁸Yoi lin’oso liho line: enasolongan’ino en’osolongano bon’ekelesia, loka iy’ate bikambwanelo biyali en’atenyi’aninoamene, ko lakanel’oka yoi liho linde solosolo.

¹⁹Ekoli lacina beloi beata eneyal’ino, lacin’eho iy’anatangama bolotsi baenya eneyal’ino.

²⁰Koko enasolongan’ino en’osolongano bofinya lila elambedya ena Nkolo;

²¹lacin’oka enal’ino boto l’oto ala nko toma tonandamene, on’omoi aoka njala, ko okina alangwa l’aana.

²²Iya, bofana nde betumba lacin’eho bole ko bomele meho? Iya, botembola nde ekelesia ena Yakomba, ko booky’iy’anafan’iyema nsoi? Emi nongokolana nde likokumy’ino ena yoi line? Mpakokumya.

²³Lacin’emi ntambaki eneyali Nkolo yoi linaliki’m’okofak’ino, lacina Nkolo Yesu, l’oco’oho bonoki’nd’oangelamaka, atambaki mampa;

²⁴ko eneki’nd’okangaka Yakomba lokango, aokes’eho, ko aila, ate, Ene nko yonge linami linalingomunya lacin’enino; bila yok’osamb’one ena liofwa linami.

²⁵Nk’osamb’oho, enem’iy’okadya lila toma, aotamb’ekala, aila, ate, Ekala ene eyali nko lisangya lina litoto en’akil’anami; esike l’esike enamel’ino bila yok’osamb’one ena liofwa linami.

²⁶Esike l’esike enal’ino mampa ene, ko enamel’ene ekal’ene, benyanya bewedi bena Nkolo, yengoko enengi’nd’oya.

²⁷Lacin’eho, ende onola mampa ene, ko amel’ekala ena Nkolo l’okotua bonofakolana, angokwa likambo lina yonge ko l’akila bana Nkolo.

²⁸Ohonde akoli eneyali boto ayosisol’endamene, ko yok’oho ale mampa eho ko amel’ekala eho.

²⁹Lacin’eho, ende onola ko amela l’okotua bonofakolana, ala ko amela ekoiyelo enandamene, lacin’oka afafokole yonge lina Nkolo.

³⁰La ncin’ene bike bona bolu’olu la baise nkangi bayali eneyal’ino, ko bike nkoho bomotot’ilo.

³¹Yombo toyosisolak’isoamene, tumbe totakodyama baoyi la Nkolo;

³²ohonde enakodyam’iso baoyi la Nkolo, tolakama la nsisodya, lacina totongokoiyama iso l’ato bana loko la laanda lomoko.

³³Lacin’eho, bifili binami, enasolongan’ino lacin’eho bole, bolengedyana.

³⁴Yomb’oto aoka njala, alake toma nk’en’ola, lacina enasolongan’ino botongokoiyama likambo. Ko enengi’m’oya nongongya baoyi’amoi banaciki.