Read ngando 1 Ba-Kolinto 14 Bible Online

1 Ba-Kolinto 14 - ngando bible

1 Ba-Kolinto 14

¹Biitanaka la nganji ena lolango, ko bil’otema en’ekembelo ena baoyi ban’olimo, koko ena ekembelo eneleki, nko lacina bofoladya befisafisa bena Yakomba.

²Lacin’ende onotenda la lofoso lonelofeyana, afatende eneyali bato: atenda nk’eneyali Yakomba; lacin’oka efan’oto onoka, koko ayatende baoyi ban’ofisafisa nk’en’olimo.

³Ohonde onofoladya befisafisa bena Yakomba asumol’ato baoyi banangacidya, ko banangakikya, ko banangalombwela lokeseli.

⁴Ende onotenda la lofoso lonelofeyana ayokiky’endamene; ohonde onofoladya befisafisa bena Yakomba akikya ekelesia.

⁵Lalanga lacin’inatu botende la mposo ikina, ohonde lalanga nko ndanga mene lacina bofoladya befisafisa bena Yakomba; onofoladya beho alek’ende onotenda la mposo, umola nko onyi asakitola ncina ena mposo iho, lacin’eho ekelesia ecile.

⁶Koko bifili, yomb’emi loya eneyal’ino, ko latenda la mposo inifeyana, yombo mpakosumol’ino baoyi’amoi banenelo, yombo bana njeya, yombo bana mpoladya ena befisafisa bena Yakomba, yombo bana lilako, iya nongokoatel’ino nkita bosamb’oya?

⁷Nko le toma tonatofana liiko, tonatotenda la lofoso loniyo lotutuma, yoka ifonge la bongele, nko toho tofacikitanya yoi, iya, ncina en’etendelo enatenda toho engeyana bosamb’oya?

⁸Yombokilolo eofomama la yoi linifanongana bolotsi, onongoyokody’endamene lacina acu en’ita oka nai?

⁹Nk’osamb oho l’ino: nko bofatende la lolemi baoyi bananongana bolotsi, iya, bato bangeya baoyi banatend’ino bosamb’oya? yok’oho bongotenda nk’eneyali efoefoe.

¹⁰Mposo ind’ike, bekotua l’ekotua, ena loko, ko efana lofoso lomoko loninda efodya ntutuma.

¹¹Lacin’eho, yomb’emi mpanonganya bokotua bona lofoso, nongoyalama eneyal’ende onotenda nk’eyoka bofenda, ko ende onotenda angoyalama yoka bofenda eneyal’emi.

¹²Ino nkoho, enafon’ino la mposa mene nganji in’olimo, boongya lifon’iho lacin’eho bokuse likikya ekelesia nko nkikya.

¹³Lacin’eho, ende onotenda la lofoso lonelofeyana, aondake lacin’eho ahalingole baoyi’aho.

¹⁴Yomb’emi laonda la lofoso lonelofeyana, bolimo’onami boonda, ohonde lokanyi lonami lofana nkita.

¹⁵Iya nai? Nongonda l’olimo, koko nongonda la lokanyi nkoho; nongemba njembo l’olimo, koko nongemba la lokanyi nkoho.

¹⁶Yombo efa yok’oho, iya, enakumy’e Yakomba l’olimo kei, ende onofalakame angokolana yilisa Ndoho ena lokumo lonakumy’e Yakomba bosamb’oya? lacin’oka ende afeye baoyi banatend’e.

¹⁷Solosolo, e okumya lokumo bolotsi, ohonde onyi afakikyame.

¹⁸Lakanga Yakomba lokango lacin’oka lakolek’inatu la mposo inatend’emi;

¹⁹ohonde en’osolongano bon’ekelesia lalanga lacina ntende baoyi’atano kei la lokanyi lonami, efa baoyi nkese ena lofoso lonelofeyana.

²⁰Bifili, botayalamake banatome ena nkanyi inino: en’aoyi ban’owe boyalamaka nko bikeke, ohonde boyalamaka bingambe mene ena nkanyi.

²¹Yoi limotengama ena basangya: Yawe aila, ate, Nongotenda l’ato’ane nko l’ato bana mposo ikina, ko la benyua bena befenda; ohonde bafandofaki nko l’aoyi’aho.

²²Lacin’eho, nganji ina mposo ikina iyali nko ndembi, ef’eneyal’iy’animedya, nk’eneyal’iy’anafimedya; ohonde mpoladya ena befisafisa bena Yakomba eyali ndembi, efa eneyal’iy’anafimedya, nk’eneyali iy’animedya.

²³Koko yombo ekelesia ehatu eosolongana en’esanga emoko, ko iyatu batenda la mposo inifeyana, ko bato’amoi banatalakama ko banafimedya batua en’osoiongano, bafilaki Mbo ino botombwa?

²⁴Ohonde yombobahatu bafoladya befisafisa bena Yakomba, ko boto’omoi onofimedya yombo onotalakama atua en’osolongano, afisolama l’iyatu, ko aakolam’aoyi l’iyatu;

²⁵ko baoyi ban’ofisafisa ban’otem’onande baenya fololo, ko ende angokwa mbosama en’elongi enande, ko angokumya Yakomba, ko angila, ate, Solosolo Yakomba ayali l’ino.

²⁶Bifili, yoi line lind’oya? Enasolongan’ino boto l’oto’onino aata nde lembo lona lokumo, yombo lilako, yombo enelo, yombo lofoso lonelofeyana yombo esakitwelo ena yoi? Baoyi bahatu bailamake lacin’eho bakiky’ato.

²⁷Yombo boto atenda la lofoso lonelo feyana, akoli lacina bato’afe, yombo basaso kei, batende, ko batende omok’omoko, ko omoi ahalingolake baoyi’aniyo.

²⁸Yomb’efaate bohalingoli, boto’oho ayalamake mwi en’ekelesia, atendake nko l’endamene ko la Yakomba.

²⁹Koko bafolali bana befisafisa bena Yakomba batendake, yomb’afe yomb’asaso, ko bato’akina bafokole baoyi’aho.

³⁰Koko yombo yoi litutuma yenya eneyali boto’omoi onokisase meho, akoli eneyal’ende on’oso ayalamake mwi.

³¹Lacin’oka inatu bokolana lifoladya baoyi, omok’omoko, lacin’eho bato bahatu banonganya, ko bahatu bakike;

³²belimo bena basumoli beofika basumoli nko mpika;

³³lacin’oka Yakomba afayali Yakomba ena loyenge: ayali Yakomba ena mwi; bosamb’onoyali ena besolongano behetu bena bikelesia.

³⁴Akoli eneyali bayato bayale mwi en’esolongano ben’ekelesia, lacin’oka efakolana l’iyo lacina batende en’esolongano; koko bayalamake ena lifiko, yoka bosamb’onatenda basangya.

³⁵Ko yombo balanga lacina baeye yoi limoi, tumbe baufole baome’aniyo en’ola; lacin’oka ande nsoi lacina boyoto atende en’osolongano bon’ekelesia.

³⁶Iya, yoi lina Yakomba limatsaki eneyal’ino? Iya, limoyela nde nk’eneyal’ino kei?

³⁷Yombo boto akanela ate endamene ayali bosumoli yombo boto’on’olimo, tumb’ende aongya linonganya ate baoyi banakotengel’emi bayali nko ntomo ina Nkolo.

³⁸Koko yomb’oto ainda njeya, akusake liyala yok’osamb’oho.

³⁹Lacin’eho, bifili, boongya likemba mpoladya ena baoyi, koko botafekyake ntenda ena mposo inifeyana.

⁴⁰Bila baoyi bahatu l’okotua bonakolana l’ona cilili.