Read ngando 1 Ba-Kolinto 15 Bible Online

1 Ba-Kolinto 15 - ngando bible

1 Ba-Kolinto 15

¹Koko bifili, lakosumol’ino bosimo bon’olotsi bonoki’m’osekodyaka eneyal’ino, bonok’in’otambaka, ko bonemal’ino,

²koko ino biikyama l’oho, yombo bundamela yoi lin’osimo bon’olotsi liniki’m’osekodyaka eneya l’ino, yombo botimedya bototoloto;

³emi nkofak’ino en’oso mene yoi liniki’m’otambaka, noka: Masiyaawaki lacin’ena baoyi’owe’aniso, yoka bosamb’onila bekanda bena Yakomba;

⁴ko akunjamaki, ko amole twa lakina en’ewedi en’ina bon’esaso, yoka bosamb’onila bekanda bena Yakomba;

⁵koko aenya eneyali Kefa; nkwaho aenyedya ba-jo-l’afe;

⁶koko ena mbusa aenyedya bifili binileki bekam’etano nk’en’esike emoko, bamoi’aniyo bike bayaike bon’in’one, koko bamoi baeci;

⁷koko ena mbus’eho aenyedya Yakobo; nkwaho aenyedya bikima bihitu.

⁸Koko ena mbusa mene amenya eneyal’emi, nk’eyoka eneyali bona onotwa en’esike enetakolana l’ende yotwa.

⁹Lacin’oka emi nde nde ekima eneleki bikima bihitu l’isalisali, mpakolana lacina ntangame ekima, lacin’oka nnyomaki’ale ekelesia ena Yakomba.

¹⁰Koko njali bosambo bonoyal’emi nko lacin’en’isei ina Yakomba; ko isei inande inifamaki eneyal’emi itayala bototoloto: emi nkambaki bikambwa binileki bikambwa bin’iyatu, koko onokambaki ef’emi: nk’isei ina Yakomba iniyaaki l’emi.

¹¹Koko kang’emi, kang’iyo, tosekodya bosimo bon’olotsi yok’oho, ko ino bimedyaki yok’oho.

¹²Koko yombo Masiya akumyama nk’eyoka one twaki en’ewedi, iya enila bamoi’anino, Mbo efan’eetwelo en’ato banawaki?

¹³Koko yombo efaate eetweloen’ato banawaki, Masiya atetwa en’ewedi;

¹⁴ko yombo Masiya atetwa en’ewedi, tumbe esekwedyo eniso en’osimo bon’olotsi emoyala nko bototoloto, ko imeedyo inino iyali nko bototoloto.

¹⁵Ko iso nkoho tosungyama basumoli bana Yakomba bana mpoci, lacin’oka tomila, is’ate, Yakomba aetolaki Masiya en’ewedi, kum’ende ateetola, yombo banawaki bafetwa.

¹⁶Lacina yombo banawaki bafetwa, Masiya atetwa en’ewedi;

¹⁷ko yombo Masiya atetwa en’ewedi, imeedyo inino iyali nko bototoloto: boyali en’aoyi’owe’anino nkol’isanga.

¹⁸Nkoho l’iyo baneci en’ewedi eneyali Masiya, bamolehyama.

¹⁹Yombo toata lolendedyo eneyali Masiya nk’en’esik’ene kei, bino biniso bileki biho bin’ato bahatu.

²⁰Ohonde isanga Masiya amoletwa enek’anawaki, ko ende amoyalama bomamo bon’oso eneyal’iyo baneci en’ewedi.

²¹Yok’onoki bewedi oyaka l’oto, nk’osamb’oho eetwelo en’ewedi emoya nko l’oto.

²²Yoka bosamb’onawa bato bahatu la Adama, nk’osamb’oho bahatu bangikyama eneyali Masiya.

²³Koko boto l’oto en’ondongo’onandamene: bomamo bon’oso nko Masiya, ko en’ili’onande bato banayali bana Masiya en’eyelo enanae.

²⁴Nkwaho esimbelo engoyela, enengi’nd’olekya lifoka eneyali Yakomba, nko Bafango; ko angehya bafoka bahatu, ko la lifoka lihalitu ko la mpamba ihatu.

²⁵Lacin’oka akoli eneyal’ende ayalame lifoka, yengoko enengi’nd’oila baokyi’owe’anande bahatu en’ase ban’akak’anande.

²⁶Bookyi’owe bonongokoiyama ena nsimbo mene nk’ewedi.

²⁷Lacina, Ende amila bikambwa bihitu en’ase ban’akak’anande. Koko enil’ende, ate, Bikambwa bihitu bimilama en’ase’anande, ten’oka afaand’ende onilaki bikambwa bihitu en’ase’anande—bihitu umola nk’ende kei.

²⁸Ko enengi bikambwa bihitu oilama en’ase’anande, nkwaho Bona mene angoyoil’endamene en’ase bana Bafango onilaki bikambwa bihitu en’ase’a Bona, lacin’eho Yakomba ayalame Bomene bahatu eneyali bahatu.

²⁹Koko lakina, iy’aninama lacin’ena banawaki bangil’oya? yombo banawaki bafetwa en’ewedi, iyo bainama lacin’eniyo la ncina eka nai?

³⁰Ko ncinaenemal’iso bina l’ina ena lilila lin’ewedi eka nai?

³¹Lakosumol’ino, bifili, la lokumo lonakumy’emi lacin’enino eneyali Yesu Masiya Nkolo eniso, emi njawu bina l’ina.

³²Kang’emi mpomanaki la nyama iney’o lema ena Efeso, yoka bosamb’onoyali bato, iya nkita enat’emi eka nai? Yombo banawaki bafetwa en’ewedi, tole ko tomele lacin’oka tongowa loi.

³³Botafotamake: bifili bin’owe biseki yehyaka bikambwa bin’olotsi.

³⁴Betwaka, bilaka baoyi bana mbongi, ko botilake baoyi ban’owe; lacina bamoi bafeye Yakomba nko tu. Latenda yok’osamb one lacin’eho nkooky’ino nsoi.

³⁵Koko boto’omoi angila, ate, Banawaki baetwa en’ewedi yok’osamb’oya? Ko baoya la yonge lin’okotu’oya?

³⁶E ilemeleme! boho bonafus’e bofameleyengoko bow’oso.

³⁷Koko boho bonafus’e, ofafuse yonge linalingoyalama linga: ofusa nko boona kei yombo boona bon’asongu, yombo boona bomoi;

³⁸ko Yakomba ayafa boho yonge linalang ende, boona l’oona yonge litutuma.

³⁹Benufo behetu befasangi’okotua; bonufo bomoi boyali bon’ato, ko bonufo’okina bona nyama, bokina bona nse, ko bokina bona mpulu.

⁴⁰Baonge’amoi bayali bana loola, ko la baonge’atnoi bana loko; koko bokoka bona bikambwa bina loola boyali bokotua bomoko, koko bokoka bona bikambwa bina loko boyali bokotua bokina;

⁴¹bokoka bona bina boyali bokotua bomoko, ko bokoka bona ngondo boyali bokotu’okina, koko bokoka bona tooto boyali bokotu’okina, lacin’oka ioto l’ioto yacikitana bokoka.

⁴²Eetwelo ena banawaki eyali yok’osamb’oho. Yonge yafusama l’otuku, yeetolama kum’efana botuku tu;

⁴³yafusama la nsoi, koko yeetolama l’okoka; yafusama la bolu’olu, koko yeetolama la locili;

⁴⁴yafusama yonge lina bonufo, koko yeetolama yonge lin’olimo. Yonge lina bonufo liyali, koko yonge lin’olimo liyali nk’osamb’oho.

⁴⁵Ko yoi limotengama yok’osamb’one: Boto onoki’oso oka Adama ayalamaki boto onoyaike; koko Adama ona mbusa amoyalama bolimo onof’ato liiko.

⁴⁶Koko on’olimo afayali en’oso: en’oso nko on’oto, ko on’olimo ena mbusa.

⁴⁷Boto’on’oso ayali ona loko, on’ekongo; ona mbusa ayali ona loola.

⁴⁸Bana-bekongo bayali yoka bosamb’onoyal’ende on’ekongo; koko bana-loola bayali yoka bosamb’onoyal’ende ona loola.

⁴⁹Ko yok’Onok’is’ofolanaka l’enae on’ekongo, nk’osamb’oho tongofolana l’ende ona loola.

⁵⁰Koko emi lila yoi line, bifili, emite, bonufo l’akila bafasangolisa lifoka lina Yakomba, ko botuku bofasangole biinda bona botuku.

⁵¹Enaka, lakosumol’ino yoi lin’ofisafisa: isatu tofaetamaki en’ewedi, ohonde isatu tongohalingwa bokotu’okina,

⁵²nkwaho, ena ndidya ena nkefu ina liso, enengi bopate bona mbusa ofoma; lacina bopate bongofomama, ko banawaki bangetolama la biinda bona botuku, ko iso tongohalingolama bokotu’okina.

⁵³Ekoli lacina botuku bone bolote biinda bon’otuku, ko yonge line liniyawu lilote yonge linifawaki.

⁵⁴Koko enengi botuku bone olota biinda bon’otuku, ko yonge line liniyawu yolota yonge linifawaki, nkwaho yoi lingilama linalitengamaki, ate, Bewedi bemomelama l’elonga.

⁵⁵Bewedi, elonga ene eyali meya? Bewedi, ngenge ene eyali meya?

⁵⁶Nge nge en’ewedi nko baoyi’owe, ko locili lon’aoyi’owe nko basangya.

⁵⁷Koko lokango eneyali Yakomba onotofa elonga la Nkolo eniso Yesu Masiya.

⁵⁸Lacin’eho, bifili binami banalangama, bemalaka la locili, botalidyamake, ko bokusaka likamba ekambwa ena Nkolo bisike bihitu, lacin’ino bey’oka ekambwa enino efayali bototoloto eneyali Nkolo.