Read ngando 1 Ba-Kolinto 2 Bible Online

1 Ba-Kolinto 2 - ngando bible

1 Ba-Kolinto 2

¹Ko emi, bifili, eneki’m’oyaka eneyal’ino, ntaya oyokosumol’ino bosimo bona Yakomba la nkaso en’ao yi ko la bomwu.

²Lacin’oka njaaki la lisangya, emite mpeyaki yoi limoko eneyal’ino yengoko Yesu Masiya kei, ende onakamaki en’ekulusu.

³Ko njaaki l’ino la bolu’olu, ko la mbanga, ko la mbilima bike.

⁴Ko yoi linami ko enami batayala l’aoyi bana mbonda bana bomwu bon’ato: bayaaki l’etumelo en’olimo l’ena mpamba;

⁵lacin’eho imeedyo inino ifayale ena bomwu bon’ato: iyalamake ena mpamba ena Yakomba.

⁶Ohonde totend’aoyi bana bomwu eneyal’iy’anatunda bato mene: bomwu bonofayali bon’esik’ene, ko bofayali bon’afoka ban’esik’ene banangoyalama linga bototoloto.

⁷Ohonde totend’aoyi bana bomwu bona Yakomba, nk’en’ofisafisa, nko bomwu bonofisamaki, bonoki Yakomba oangaka eanga en’oso bona bisike lacin’ena lokumo loniso;

⁸efana lifoka limoko lin’esik’ene oneyaki bomwu boho: yombo baeyaki, tumbe bataaka Nkolo en’okonde en’ekulusu.

⁹Koko yok’onoki yoi otengamaka, Baoyi banatenana la liso, ko banatokana la litoi, Ko banatatua en’otema bon’oto, Yakomba akoedyak’iy’anok’ende nganji nko baoyi’aho.

¹⁰Koko Yakomba amotofiswel’iso baoyi’aho l’olimo’onande; lacin’oka Bolimo asisola baoyi bahatu, nko le baoyi bana Yakomba bana nginda.

¹¹Oneya baoyi banayali eneyali boto oka nai, umola nko bolimo bon’oto mene bonoyali eneyal’ende? Nk’osamb’oho, efana oneya baoyi banayali eneyali Yakomba; yengoko Bolimo bona Yakomba kei.

¹²Koko iso totatamba bolimo bona loko lone: totambaki nko Bolimo bonoya eneyali Yakomba, lacin’eho teye baoyi banaki Yakomba otofaka nko bofakafaka l’isei.

¹³Ko toyatende baoyi’aho, efa la baoyi banatolaka bomwu bon’ato, ohonde l’aoyi banatolaka Bolimo bon’olotsi; toyalake balako ban’olimo nko l’aoyi ban’olimo.

¹⁴Koko boto’ona yonge afatambe baoyi bana Bolimo bona Yakomba, lacin’oka baho bayali baoyi ban’ilemeleme eneyal’ende; ko afinya yeya baho, lacina baho bafokolama nko l’olimo kei.

¹⁵Ohonde boto’on’olimo akodya baoyi bahatu, kang’endamene afakodyama l’oto’omoko.

¹⁶Oneyaki lokanyi lona Nkolo lacin’eho aolake oka nai? Ohonde iso toyali la lokanyi lona Masiya.