Read ngando 1 Ba-Kolinto 3 Bible Online

1 Ba-Kolinto 3 - ngando bible

1 Ba-Kolinto 3

¹Ko emi, bifili, ntatendisa l’ino yok’eneyali bato ban’olimo, ohonde nk’eyok’eneyali bato bana yonge, nk’eyoka eneyali bana bana tosalisali bana Masiya.

²Mokof’ino baele, efa befambe mene, lacin’oka ino botinya, ko l’isanga bofinya.

³Lacin’ino boyali bato bana yonge nko l’isanga. Nk’en’oka ekuku la lisa la nkambwana bayali eneyal’ino, bofayali nde bato bana yonge? ko bofakende nde l’okotua bon’ato?

⁴Eni-l’omoi’onino, Mbo emi nde nde ona Paulo, ko okina, Mbo emi nde nde ona Apolo, iya, bofayali nde bato bana yonge?

⁵Paulo ayali nai? ko Apolo ayali nai? Iyo bayali bakambi, ko ino bimedyaki l’iyo; bosamb’onoki Nkolo ofaka boto l’oto.

⁶Emi mpusaki, Apolo afakisodyaki basi; ohonde Yakomba afaki mpula.

⁷Yok’oho, onofusa ko l’ende onofakisody’asi bayali bototoloto: Yakomba kongoamedya.

⁸Koko endeonofusa l’ende onofakisody’asi bayali nk’omoko; koko boto l’oto angotamba boluko bonandamene bonakolana l’ekambwa enandamene.

⁹Lacin’iso tambana la Yakomba en’ekambwa; ino boyali lisala lina Yakomba, ko l’otumba bonafaka Yakomba.

¹⁰Emi mosidya yang’eango yoka bofaki bon’otumba bona bomwu, yok’osamb’onoyali isei ina Yakomba iniki’nd’ompaka; ko boto’okina afaka en’eango eho.

¹¹Lacin’oka efan’oto onangisa eango emoi, yengoko eho enangamaki, nko Yesu Masiya.

¹²Koko yomb’oto’on’etaketaka afaka en’eango ene, yombo wolo, yombo argent, yombo baufe ban’otuya, yombo bambaya, yombo bekombi, yombo bailo:

¹³ekambwa en’otol’oto engenya fololo; lacina bin’oho bongenyany’eho, lacina bin’oho bongenya la nkoi; ko nkoi ingomeka bokotua bon’ekambwa en’oto l’oto.

¹⁴Yombo ekambwa en’oto eneki’nd’ofakaka en’eango eho eoyalama nko njalama, ende angotamba boluko.

¹⁵Yombo ekambwa en’oto eolika tutu, angungya boluko: enda mene angika, ohonde angika nk’eyoka boto onotianya nkoi.

¹⁶Bofeya nd’oka boyali botumba bon’oeka bona Yakomba, ko Bolimo bona Yakomba atonga eneyal’ino?

¹⁷Yomb’oto aehya botumba bon’oeka bona Ya-komba, Yakomba angeehy’ende; lacina botumba bona Yakomba boyali nko boeka, ko ino boyali nk’otumb’oho.

¹⁸Boto atayofotake endamene. Nko boto’omoi eneyal’ino ayotang’endamene boto’ona bomwu bon’esik’ene, akoli lacina ayalame ilemeleme, lacin’eho ayalame ona bomwu.

¹⁹Lacin’oka bomwu bona loko lone boyali nko yoi lin’ilemeleme la Yakomba. Lacina yoi litengamaki’ale, Aunda bamene bomwu nko la longo loniyoamene.

²⁰Koko lakina, Nkolo aeya nkanyi inakanela bamene bomwu, ate iyali nko bototoloto.

²¹Botayofefake lacin’en’ato. Lacina baoyi bahatu bayali nko banino:

²²kanga Paulo, kanga Apolo, kanga Kefa, kanga loko, kanga liiko, kang’ewedi, kanga baoyi ban’esik’ene, kanga baoyi banangoya linga: bahatu bayali banino;

²³ko ino boyali bana Masiya, ko Masiya ayali ona Yakomba.