Read ngando 1 Ba-Kolinto 4 Bible Online

1 Ba-Kolinto 4 - ngando bible

1 Ba-Kolinto 4

¹Ekoli lacina boto atotang’iso yoka bakambi bana Masiya, ko bamonyi ban’aoyi ban’ofisafisa bona Yakomba.

²Koko yoi linakemb’iyo eneyali bamonyi nk’oka boto asungyama nk’oto’ona cilili.

³Koko emi, kanga lamekama li’no, kanga lakodyama l’ekoedyo enakody’ato nkoho, ena lokanyi lonami lakanela yoi liho nko lin’isisali; o, mpayomek’emamene.

⁴Lacin’oka emamene mpeya yoi linatembw’emi; ohonde mpayengwa la ncin’eho. Ononkoedy’emi baoyi nko Nkolo.

⁵Lacin’eho, botakodyake baoyi kum’esike etayele, yengoko kuma Nkolo aoya. Ende angofisola baoyi banafisamaki en’ilima, ko angila ena fololo biango biniyali en’etema; nkwaho boto l’oto angata lokumo lonandamene eneyali Yakomba.

⁶Bifili, mokolanya baoyi’ane en’ekolanya enamamene l’Apolo lacin’enino, lacin’eho bolakame eneyal’iso, lacin’eho bofalekanya baoyi banatengi, lacina boto’onino atongoyengodya, lacina akumy’omoi ko asonj’okina.

⁷Onokocikitany’e l’oto’okina oka nai? Ko e oyali l’iyema ika nai initatamb’e? Koko yombo otambaki, oyofef’eamene nk’eyoka otatamba nganji lacina nai?

⁸Isanga bomokinda liota, isanga bomo-yala batuki, bomoyalama bafoka, ohonde efa l’iso; o, bolotsi’oka boyalame bafoka, lacin’eho iso l’ino tambane ena lifoka.

⁹Lacin’emi lakanel’oka Yakomba amotemady’iso bikima ena mbusa mene, nk’eyoka bato banakoiyama en’ewedi; lacin’oka iso tomoyalama etakamelo eneyali benyanga behetu: eneyali bahatu, le bikima bina loola, le bato.

¹⁰Iso toyali tolemeleme lacin’ena Masiya, ohonde ino boyali bamene bomwu eneyali Masiya; iso toyali bolu’olu, ohonde ino bonde locili; ino bokumyama, ohonde iso tinda lokumo.

¹¹Nko l’isik’ine iso towa la njala, ko towa la mposa en’asi; toyali bolumbulumbu, ko tofomama la bipunda, ko tofana litonga litutuma.

¹²Tokamb’ekambwa, tosala l’akas’anisoamene; enatosaiy’iyo tomasakel’osako; enatonyom’iyo tofalembwa;

¹³batotanga lotango, ohonde toonda boondo. Totangama nsefo ena loko, ko la bailo bana toma tohatotu nko le bon’in’one.

¹⁴Mpakotengel’ino baoyi’ane lacin’eho nkooky’ino nsoi: lakotengela lacin’eho nkolak’ino yoka ban’anami banalangama.

¹⁵Kanga boyali l’alaki nkese eneyali Masiya, bofana bafango bike; lacin’emi nkootak’ino eneyali Masiya Yesu l’osimo bon’olotsi.

¹⁶Lacin’eho, lakoond’ino bokil’okotu’onami.

¹⁷La ncin’ene mokotomel’ino Timoteo onoyali bon’onami ona nganji l’ona solosolo eneyali Nkolo; ende angokoofody’ino bekotua benami eneyali Masiya, yok’osambo bonalak’emi en’ekala behetu ena bikelesia bihitu.

¹⁸Bamoi bayofef’iyoamene, nk’eyoka bakanel’oka ei mpaye eneyal’ino.

¹⁹Koko efan’olingolingo nongoya eneyal’ino, yombo Nkolo alanga yok’oho; ko nongeya, efa yoi liniyo banayofef’iyoamene, ohonde mpamba eniyo.

²⁰Lacina lifoka lina Yakomba lifayali ena yoi: liyali nko la mpamba.

²¹Nalang’ino? njake eneyal’ino l’onganza bona mpoma, yombo la nganji ena lolango ko l’olimo bona bongompolu?