Read ngando 1 Ba-Kolinto 6 Bible Online

1 Ba-Kolinto 6 - ngando bible

1 Ba-Kolinto 6

¹Yombo omoi’onino aata likambo l’oto’omoi, akolana nde likadya likambo liho en’oso bon’ato baninda mbongi, ko ef’en’oso bona ban’oeka?

²Bofeya nd’okaban’oeka bangotend’akambo ban’ato bana loko bahatu? Ko yombo bakambo bana loko bangotendama l’ino, bofakolana nde lacina botende bakambo banaleki tosalisali?

³Bofeya nde iso tongotend’akambo banabikima bina loola? A koko tofaleki nde litenda bakambo bana loko lone?

⁴Yombo bongotend’akambo’a-moi bana loko lone, bongosona nde batenji banafakumyama l’ekelesia lacin’eho batende bakambo?

⁵Lilabaoyi’ane lacin’eho nkooky’ino nsoi. Noka, bofayali nde l’oto’omoko ona bomwu oninya litendisa bakambo en’atenyi’a bifili binande?

⁶Ohonde efili emoi aocoaokadya likambo linande l’efili ekina nk’en’oso bon’ato banafimedya Yakomba.

⁷O, koko enatan’ino bakambo en’atenyi’aninoamene ino bounga nko mbunga. Iya, bofimedya bakilel’ino bowe lanai? bofimedya bakotungy’ino lanai?

⁸Ohonde inoamene boyile bo-we, ko boyatungy’ato totungya—banilel’ino baoyi’ane nko bifili mene.

⁹Ino boteya nd’oka iy’aninda mbongi bafasangolaki lifoka lina Yakomba? Botafotamake: bato bana lisamba, la bakumi bana baidola, la batati bana likele, la bakambi ban’owe en’aonge’aniyoamene, la bakambi ban’aoyi bana nsoi la mpame imoi,

¹⁰la baiya, la baoki bana mposa inileki, l’ato banalangwa ma-ma l’aana, l’iy’anatang’ato lotango bike, l’akumoli—bane bahatu bafasangolaki lifoka lina Yakomba tutu.

¹¹Ko bamoi’anino boyaaki yok’osamb’oho; ohonde bomokulwa, bomekyama en’oeka, bomoyengwa ena lina lina Nkolo Yesu Masiya, ko la Bolimo bona Yakomba eniso.

¹²Baoyi bahatu bakoli l’emi, ohonde baoyi’amoi bafana nkita eneyal’emi; baoyi bahatu bakoli l’emi, ohonde mpalange lacina ndekyame ena yombo lina yoi limoko.

¹³Toma tona ndaka toyali lacin’ena likunju, ko likunju lacin’ena toma tona ndaka, koko Yakomba angehya le likunju le toma. Yonge lifayali lacin’ena lisamba: liyali lacin’ena Nkolo, ko Nkolo lacin’ena yonge.

¹⁴Ko Yakomba aetolaki Nkolo en’ewedi, ko angoteetol’iso en’ewedi nk’osamb’oho la mpamba enande.

¹⁵Bofeya nd’oka baonge’anino bayali bilama bina Masiya? Iya, ntambake bilama bina Masiya, ko njile biho bilama bina boyoto’ona lisamba? Efana!

¹⁶Bofeya nd’oka ende onambana l’oyoto’ona lisamba amoyalama l’ende yonge limoko? Lacin’oka Yakomba aila, ate, Iy’afe bangoyalama yonge limoko.

¹⁷Ohonde onambana la Nkolo amoyalama l’ende bolimo’omoko.

¹⁸Boongya lilota lisamba. Yoi la yoi lin’owe linakamb’oto Iiyali ena mbiolo ena yonge; ohonde onotamb’asamba ailela yonge linandamene bowe.

¹⁹Bofeya nd’oka baonge’anino bayali botumba’bon’oeka bona Bolimo bon’olotsi onoyali eneyal’ino, onok’in’otambaka eneyali Yakomba? Ko ino bofayali boninoamene;

²⁰lacin’oka bosombamaki l’otuya; lacin’eho, bokumya Yakomba en’aonge’anino.