Read ngando 1 Ba-Kolinto 7 Bible Online

1 Ba-Kolinto 7 - ngando bible

1 Ba-Kolinto 7

¹Ena likambo lin’aoyi banak’in’ontengelaka: Bolotsi eneyali mpame yombo afasongane l’oyoto.

²Ohonde lacin’ena lisamba, akoli eneyali mpame la mpame aate booli’onandamene, ko boyoto l’oyoto aate bome’onandamene.

³Tumbe bome aile booli’onande bokotua bonakolana, ko booli nkoho aile bome’onande bokotua bonakolana.

⁴Booli afayali nyangetuke ena yonge linandamene, yengoko bome’onande; ko nk’osamb’oho bome afayali nyangetuke ena yonge linandamene, umola nko booli’onande.

⁵Botambwanake, yengoko kum’in’afe bimedya ilalela lacin’eho boate etelo ntutuma en’oondo ko bambane lakina, lacina Satana atokomek’ino lacin’ena mposa inino.

⁶Latenda yok’osamb’one la lokanyi lonakanel’emamene, efa la lotomo lotutuma.

⁷Koko nsokolanga lacina bato bahatu bayale yoka bosamb’onoyal’emamene. Ohonde boto l’oto aata nganji enandamene eneyali Yakomba, omoi bokotu’one ko okina bokotu’okina.

⁸Lasumola benjemba ko la beweli, bolotsi bayale yoka bosamb’onoyal’emi.

⁹Ohonde yombo bafafe kyisa mposa, tumbe basongane ena bolongai, lacin’oka nsongana eleki mposa ena mpeta bolotsi.

¹⁰Koko lasumol’iy’anayali ena liala (onasumola ef’emi: Nkolo mene kongoasumola), emite, booli atumake eneyali bome’onande,

¹¹(koko yombo auma, acikalake bototoloto efan’ome, yombo aambane lakina l’ome’onandamene); ko bome atumolake booli’onande.

¹²Koko emamene lasumol’akina (efa Nkolo onasumola), emite, Yombo efili emoi ayali l’ooli onofan’imeedyo, ko booli’oho alanga lacina ayale l’ende, atumolake booli’oho.

¹³Koko boyoto onoyali l’ome onofan’imeedyo, ko bome’oho alanga lacina ayale l’ende, boyoto’oho atumake eneyali bome.

¹⁴Lacina bome onofan’imeedyo aekyama en’oeka lacin’en’ooli, ko booli onofan’imeedyo aekyama en’oeka lacin’en’ome; yomb’efa yok’oho, tumbe ban’anino bafayali en’oeka; ohonde isanga bayali en’oeka.

¹⁵Koko yomb’ende onofan’imeedyo auma, aumake: efili ena mpame l’en’oyoto afatungama ena likambo liho: Yakomba amotelel’iso lacina tokisase la mwi.

¹⁶E booli, oey’oka ongikya bome’one bosamb’oya? Ko e bome, oey’oka ongikya booli’one bosamb’oya?

¹⁷Koko akoli eneyali boto l’oto akendel’okotua bonoki Yakomba okafelak’ende, nk’okotua bonoki Yakomba oelelak’ende. Bone nko boeka bonakiky’emi ena bikelesia bihitu.

¹⁸Boto’omoi aelelamaki eneki’nd’okesamaka yonge? Atayalamake nk’eyoka atakesama yonge. Okina aelelamaki kum’atakesama yonge? Atakesamake.

¹⁹Nkesa ena yonge efan’iyema; ko biinda bona nkesa ena yonge bofan’iyema; iyema mene nko mmonya ena beeka bena Yakomba.

²⁰Boto l’oto acikalake l’okotu’oho bonoki’nd’oyalaka eneki’nd’oelelamaka.

²¹Oelelamaki kum’oyali boombo? Takandakandake la yoi liho. (Ohonde yombo oat’etelo otungwa, ongya yila yok’osamb’oho.)

²²Onelelamaki eneyali Nkolo kum’ayali boombo, ayali nsomi eneyali Nkolo; ko nk’osamb’oho, onelelamaki kum’ayali nsomi, ayali boombo bona Masiya.

²³Ino bosombamaki l’otuya: botayalamake baombo ban’ato.

²⁴Bifili, boto l’oto ayalamake la Yakomba ena lifoka linande linaliki’nd’oelelamaka.

²⁵Ena likambo lina benjemba ben’ayato, ntaata yoi litutuma eneyali Nkolo; ohonde lakosumol’ino lokanyi lonamamene nk’eyok’oto onotambaki isei eneyali Yakomba lacin’eho njalame ona solosolo.

²⁶Lakanela bolotsi, lacin’ena bino bin’isik’ine, boto amboyala nk’osamb’onoyal’ende.

²⁷Otungama ena liala la booli? Tafonake lacin’eho otungwa. Ofan’ooli? Tafonake booli.

²⁸Ohonde nk’osong’ooli, otil’owe; ko yomb’oyoto bon’onjemba asongana l’ome, ende atil’owe. Ohonde bato’aho bangen’ino ena baonge; ko nsokolanga lacina nkiiky’ino, botongoyena bino biho.

²⁹Koko lila yoi line, bifili, emite, esike emokokodyama; lacin’eho, ekoli en’isik’ine lacina iy’anayali l’aali bayalame nk’eyoka bafan’aali;

³⁰ko iy’analela la mposoli nk’eyoka bafalele; ko iy’ananyangela nk’eyoka bafanyangele; ko iy’anasomba nk’eyoka bafaate;

³¹ko iy’anayakende ena ntoto en’ato bana loko bayalame nk’eyoka bafile lokanyi meho, lacina bokotua bona loko lone boyume.

³²Koko lalanga lacin’eho boyalame efan’ekandokando. Ende onofan’ooli akanela baoyi bana Nkolo, bokotua bonongi’nd’ookya Nkolo ekiko;

³³koko ende onoyali l’ooli akanela baoyi bana loko, bokotua bonongi’nd’ookya booli’onande ekiko.

³⁴Koko boyoto onoyali booli l’oyoto onoyali bonjemba acikitana. Ende onofan’ome akanela baoyi bana Nkolo, lacin’eho aekyame en’oeka, le yonge le bolimo; ohonde onoyali l’ome akanela baoyi bana loko, bokotua bonongi’nd’ookya bome ekiko.

³⁵Latenda yoi line nko lacin’eninoamene—efa lacina nkotungy’ino yoka l’ekoli: motenda lacin’eho bokende l’okotua bonakolana, ko bosaele Nkolo efan’okaokando.

³⁶Koko yomb’oto akanel’oka afilele bon’onande’on’oyoto bon’onjemba bolotsi, lacin’oka bona aotunda boyoto mene, ko ncina ena losomo eyali, ailake yoi linalang’ende—yoi liho lifan’owe: ekoli lacin’iyo basongane ena bolongai.

³⁷Ohonde onomonya lisangya linande en’otema la locili, ko afasomyama losomo, ohonde ainya yila yoi linalang’ende, ko aang’eango en’otem’onande ate asuke bon’onande’on’oyoto nko bonjemba, aila nk’olotsi.

³⁸Yok’oho, ende onolekya bon’onande bon’oyoto ena liala lina bolongai aila bolotsi; ohonde onofalekya bon’onande bon’oyoto ena liala ail’olotsi bonoleki.

³⁹Booli atungama ena liala kuma bome aika; ohonde yombo bome aowa, aat’etelo lacina asongane l’ome bonalang’ende—nko bome onokumya Nkolo kei.

⁴⁰Koko yombo amboyala bosamb’onoyal’ende njalama, aleki likik’ekiko—lokanyi lonami nde loho, ko lakanel’oka nde nde la Bolimo bona Yakomba ena yoi line.