Read ngando 1 Ba-Kolinto 8 Bible Online

1 Ba-Kolinto 8 - ngando bible

1 Ba-Kolinto 8

¹Ena likambo lina nyama inik’iy’oyakelaka baidola yoka mbeka: Tey’oka isatu toyali la njeya. Njeya eatel’ato njofefa, ohonde nganji ena lolango eokiky’ato.

²Nko boto akanel’oka ameya baoyi’amoi, ende ateye yoka bosamb’onokoli l’ende lacina aeye.

³Koko yombo boto’omoi aoka Yakomba nganji, boto’oho aeyana l’ende.

⁴Ena likambo lina ndaka ena nyama inik’iy’oyakelaka baidola yoka mbeka: Tey’oka idola mene efaate ena loko, ko efaate Yakomba ekina, yengoko Yakomba emoko kei.

⁵Kang’iy’anatangama yakomba bayali, kang’ena loola, kang’ena loko, (ko yakomba iho ind’ike, ko banyangetuke band’ike);

⁶ohonde eneyal’iso Yakomba ayali nk’emoko, Bafango, ko bikambwa bihitu bioya eneyal’ende, ko iso toyali lacin’enande; ko Nkolo nk’emoko, Yesu Masiya, ko bikambwa bihitu bioyalama l’ende, ko iso toyalama nko l’ende.

⁷Ohonde bato bahatu bafayali la njeya eho. Bamoi banekelaki’ale bokotua bon’idola bala nko l’isanga nyama iho iniyakamelaki idola yoka mbeka, ko lokanyi lon’otem’oniyo loneloyali nko bolu’olu lehyama.

⁸Toma tona ndaka tofatoatel’iso lokumo eneyali Yakomba; kanga tofale, tofaungy’iyema; kanga tola, tofana nkita la ncin’eho.

⁹Koko boongya lilenda lacina etelo ene enino etongoyalama ekumbelo eneyali bato banafana locili.

¹⁰Yombo boto’omoi akeen’e onoyali la njeya kum’oyakisase ena mesa ena toma en’otumba bon’idola, lokanyi lonande onoyali bolu’olu lofacidyamaki nde lacin’eho ale nyama inik’iy’oyakelaka baidola?

¹¹Ko boto’oho onoyali bolu’olu, nk’e-fili onoki Masiya owelaka, aehyama nko lacin’ena njeya ene.

¹²Enilel’ino bifili bowe yok’one, ko enehy’ino nkanyi iniyo in’etema iniyali nko bolu’olu, yok’oho ino bilela Masiya bowe.

¹³Lacin’eho, yombo nyama engokumba efili enami, emi mpalaki nyama lakina bisike bihitu, ntongokoiya efili enami.