Read ngando 1 Ba-Kolinto 9 Bible Online

1 Ba-Kolinto 9 - ngando bible

1 Ba-Kolinto 9

¹Emi mpayali nde nsomi? Emi mpayali nd’ekima? Emi ntena nde Yesu Nkolo eniso? Ino bofayali nde ekambwa enami eneyali Nkolo?

²Kang’emi mpayali ekima eneyali bato’akina, njali ekima eneyal’ino solosolo, lacin’ino boyali ndembi ena lifoka linami lin’ekima eneyali Nkolo.

³Boloko’onami eneyali iy’anansisol’emi boh’one.

⁴Tofana nde etelo lacin’eho tole ko tomele?

⁵Tofana nde etelo lacin’eho totole l’iso boolionoyali l’imeedyo, yoka bosamb’onila bikima bimoi l’akune bana Nkolo, la Kefa?

⁶Iya, emi la Balunabank’iso’afe kei tinda nde etelo oyambya likamb’ekambwa?

⁷Soldat onoyofut’endamene ayali meya? Boto onofusa lisala lin’ekoli bena vina, ko afale bemamo bena lisala liho, ayali meya? Ko onotombanya botonga bona nta, ko afamele baele bana nta iho, ayali meya?

⁸Latenda nde baoyi’ane yoka boto kei? Iya, basangya bafatende nde nkoho?

⁹Lacina yoi limotengama en’asangya bana Mose, ate, Tilake likama en’onyua bona ngombo enanokol’ende bopunga la njikamela. Yakomba akanela nde ngombo?

¹⁰Yo-mbo aila yoi liho solosolo lacin’eniso? O, yoi liho limotengama lacin’eniso, lacin’oka akoli eneyal’ende onocim’ekongo acime la ndengedya; ko ende ononokola bopunga, anokolake la ndengedya lacina atambe liondo lina toma.

¹¹Yomb’iso tokofuselak’ino beona beka baoyi ban’olimo, bokanela nd’oka likambo lileki yombo tut’onuka toma tonino tona loko?

¹²Yombo bamoibayali l’etelo ene eneyal’ino, iso tofayali nde l’eho nko la ndeka? Ohonde iso totakamba l’etelo eho: iso titedya baoyi bahatu, totongosimbya Bosimo bon’olotsi bona Masiya.

¹³Bofeya nd’oka iy’anakamba bikambwa bina botumba bona Yakomba bala toma ton’otumba bona Yakomba? Ko iy’anasala ena mesa ena mbeka baata baondo’aniyo ena mesa ena mbeka?

¹⁴Nk’osamb’oho Nkolo amekya boeka lacin’eho iy’anasekodya bosimo bon’olotsi baate eatelo eniyo ena toma nko l’osimo bon’olotsi.

¹⁵Koko emi ntatamba liondo limoko lin’eatelo eho; ko mpatenge baoyi’ane lacin’eho mbate eatelo yok’osamb’oho. La mbwu, la boto ambehedya yoi line linanyangel’emi, on’olotsi’oka mbwu.

¹⁶Kang’emi lasekodya bosimo’on’olotsi, mpayokumya la ncin’eho, lacin’oka lasomyama losomo; o, bino eneyal’emi yomb’emi mpasekodya bosimo bon’olotsi.

¹⁷Yombo lakamb’ekambwa ene la ndokodya enamamene, njali l’oluko; ohonde yombo mpakambe la ndokodya enamamene, lifoka lin’ekambelo yofama eneyal’emi.

¹⁸Boluko’onami boka nai? nk’oka enasekody’emi bosimo bon’olotsi njil’oho efana mpuci, lacina mpatambe etelo ehatu enat’emi en’osimo bon’olotsi.

¹⁹Kang’emi ntayala boombo bon’oto’omoko, moyoil’emamene boombo bon’ato bahatu, lacin’eho mbate bato bik’ike bonoleki.

²⁰Eneyali Ba-Yuda moyalama yoka bise Yuda lacin’eho mbate Ba-Yuda; ko eneyali iy’anayali ena lifoka lin’asangya moyalama nk’eyok’emamene njali ena lifoka lin’asangya (kang’emamene mpayali ena lifoka lin’asangya tu), lacin’eho mbate iy’anayali ena lifoka lin’asangya.

²¹Eneyal’iy’anafana basangya moyalama nk’eyok’emamene mpan’asangya; (ei mpayali ena mbiolo en’asangya eneyali Yakomba: njali ena lifoka lin’asangya eneyali Masiya;) lacin’eho mbate iy’anafana basangya.

²²Eneyali bato bana bolu’olu moyalama yoka boto bon’olu’olu, lacin’eho mbate bato ban’olu’olu. Moyalama bekotua behetu eneyali bato bahatu, lacin’eho mbiky’amoi l’ekotua behetu bena mbikya.

²³Lila baoyi’ane bahatu lacin’en’osimo bon’olotsi, lacin’eho mbambane l’ato’akina en’oluko bon’osimo’oho.

²⁴Bofeya nd’oka iy’anakodya laango bacoa la laango nk’iyatu, ohonde onotamba boluko nk’omoko kei? Ino bocoaka la laango yok’osamb’oho lacin’eho botambe boluko.

²⁵Ko boto l’oto onosela bembondo l’ato’akina asimbya mposa inande en’aoyi bahatu. Iyo baila yok’osamb’one lacina batambe likuka lin’elonga linalingeha linga, ohonde iso tila yok’oho lacin’ena likuka lin’elonga linalifehaki tu.

²⁶Lacin’eho, emi njacu la laango, efa yok’oto onokandakanda; lafomana, efa yoka boto onofom’efoefoe l’ipunda;

²⁷koko lafoma yonge linamamene, ko lila liho ena yombo, lacina, eneki’m’olakaka bakin’ato, emamene ntongokoiyama.