Read ngando 2 Ba-Kolinto 1 Bible Online

2 Ba-Kolinto 1 - ngando bible

2 Ba-Kolinto 1

¹Paulo, ekima ena Masiya Yesu l’eango ena Yakomba, la Timoteo efili eniso, eneyali ekelesia ena Yakomba eneyali ena Kolinto, ko l’eneyali ban’oeka bahatu banayali ena Akaya ehatu:

²isei eneyal’inola mwi eneyali Yakomba Bafango’oniso ko la Nkolo Yesu Masiya.

³Lokumo eneyali Yakomba, Bafango’ona Nkolo eniso Yesu Masiya, Bafango’ona tosei la Yakomba en’ekikedyo ehatu;

⁴onotokikya ena bino biniso bihitu, lacin’eho tononganya likikyisa iy’anen’ino bin’etaketaka nko l’ekikedyo enatokikya Yakomba.

⁵Lacina yoka bosamb’onafula bino bina Masiya eneyal’iso, nk’osamb’oho ekikedyo eniso eofula la Masiya nkoho.

⁶Koko kanga ten’ino, tena biho lacin’ena ekikedyo enino, ko lacin’ena liiko lonino; ko yombo tokikyama, tokikyama nko lacin’ena ekikedyo enino, lacin’eho bocindelane ena bino, nko biho binen’isoamene;

⁷ko lolendedyo loniso lacin’enino lofan’okandokando, lacina tey’oka bosamb’onamban’ino l’iso ena bino, nk’osamb’oho boambana l’iso en’ekikedyo.

⁸Lacina tofalange’oka boyalame nk’eyoka bofeye bino binitokwelak’iso ena Asia, lacina tokaki bolito bike mene bonolekaki locili loniso nko ndeka mene, ko tokanelaki yombo tofikaki.

⁹Koko isoamene toataki nkuto en’ewedi nk’eneyal’isoamene, lacin’eho tofile botema eneyal’isoamene, ohonde eneyali Yakomba oneetola banawaki;

¹⁰onotiikyaki en’ewedi’eho en’okolo, ko angotiikya; ko tolengedy’oka angotiikya lakina.

¹¹Ko ino botokambya la beondo benatoondel’ino; lacina bato bike bakange lokango lacin’eniso, lacin’ena nganji enefama eneyal’iso l’ato bike.

¹²Lokumo loniso nde lone: botem’oniso boyali temoin, noka, tokambaki ena loko nko la mbongi ko la solosolo ena Yakomba, ko tofudyaki likamba yok’oho eneyal’ino; totakamba la bomwu bona yonge: tokambaki nko l’isei ina Yakomba.

¹³Iso tofakotengel’ino baoyi’akina, yengoko baoyi banand’ino ko banimedy’ino; ko lalanga lacina bokuse yimedya baoyi’aho yengoko nsimbo,

¹⁴yoka bosamb’onok’in’otimedyak’iso isisali nk’oka toyali lokumo lonino, nk’osamb’onoyal’ino lokumo loniso en’ina bona Nkolo eniso Yesu.

¹⁵Koko eneki’m’oataka imeedyo me, njalamaki la lisangya en’oso lacina nje eneyal’ino, lacin’eho bokokedyame ekiko emoi;

¹⁶nsokofolanya enek’ino lacin’eho ncu Makedonia, la njute ena Makedonia eneyal’ino, ko boncindedya en’okita bonaco’emi ena Yudea.

¹⁷Koko eneki’m’oyalamaka la lisangya liho, nsangyaki nde bosangyasangya? Yombo biango binang’emi, laanga nde biho bosamb’onoyali yonge lacina yoi liyale l’emi O, O, ko la Efana, Efana?

¹⁸Nk’eyoka bosamb’ono-yali Yakomba solosolo, nk’osamb’oho yoi liniso eneyal’ino litayala O la Efana.

¹⁹Lacina bon’ona Yakomba, Yesu Masiya onok’is’okumyaka eneyal’ino, nk’emi la Siliwano la Timoteo, atayala O la Efana: eneyal’ende nsimbo nko O kei.

²⁰Koko kanga bisemba bina Yakomba biyali bike, eneyal’ende biho biyali nko O; koko lacin’eho eneyal’ende iso tila Ndoho, nko lacin’ena lokumo lona Yakamba l’iso.

²¹Ko ende onotocidy’iso l’ino eneyali Masiya, ko atohinyaki l’ehinyedyo, nko Yakomba;

²²amila ndembi eneyal’iso nkoho, ko amotof’iso mbandwa ena Bolimo en’etem’eniso.

²³Koko emi lelela Yakomba ayalame temoin en’olimo’onami, lacina ntaya eneyal’ino ena Kolinto, lacin’oka nkookamelaki isei.

²⁴Efa lacin’oka iso toyali banyangetuke ban’imeedyo inino: toyali nko bakambi’anino en’enyanga enanyangel’ino; lacin’ino bemala nko l’imeedyo.