Read ngando 2 Ba-Kolinto 10 Bible Online

2 Ba-Kolinto 10 - ngando bible

2 Ba-Kolinto 10

¹Koko emamene, Paulo, lakoond’ino la mwi ko l’ongompolu bona Masiya, emi onoyofim’emamene kuma njali enek’ino, koko enefayal’emi meho njali la nkaso eneyal’ino:

²lakoond’ino, lacina, enengi’m’oyala l’ino, ntongoyil’aoyi la nkaso eho ko la locili loho lonil’emi, emite mpokaki’ofolu eneyali bato’amoi banil’oka iso toyakende yoka bosamb’onoyali yonge.

³Kanga toyakende ena yonge, tofokane bita bosamb’onoyali yonge.

⁴Lacina bimunyi biniso bin’ita bifayali bina yonge: biyali la locili eneyali Yakomba, lacin’en’eehedyo ena betumba ben’ita bena locili;

⁵tokoiya nkanela en’ase, ko l’ekambwa l’ekambwa ena njengodya eniledyama lacin’eho eumole njeya ena Yakomba; ko tounda nkanyi iniso ihatu en’onyolo bon’efikelo ena Masiya;

⁶ko tokolana lisisodya lopoko lohalotu, enengi lifiko linino okolana

⁷Ino bolenda nko baoyi banen’ino en’oso’onino kei. Yombo hoto’omoi aimedya, ate endamene ayali boto’ona Masiya, akanelake lakina eneyal’endamene, ate iso toyali bana Masiya, yoka bosamb’onoyal’ende ona Masiya.

⁸Kang’emi lakumya lokumo bik’ike lacin’ena etelo eniso, eneki Nkolo otofaka lacin’ena ekikedyo enino, efa lacin’ena ekoiyelo enino, mpokaki nsoi;

⁹ntongoyenya yoka lakooky’ino losomo l’ekand’enami.

¹⁰Lacina bamoi, Mbo ende, bekand’enande beyali ben’olito l’ena locili; ohonde eneny’ende ena yonge ande bolu’olu, ko etendelo enande nko bototoloto.

¹¹Tumbe boto onila yok’oko akanela yok’osamb’one: ate, nko bosamb’onoyal’iso ena yoi lin’ekanda enefayal’iso meho, toyali nk’osamb’oho en’ekambwa kuma toyali meho.

¹²Lacin’iso tofakolana lacina toyambany’isoamene ke toyokody’isoamene l’ato’amoi banayokumy’iyoamene: iyo enakodyam’iyo l’iyoamene, ko enayokolany’iyo l’iyoamene, bainda bomwu.

¹³Koko iso tofayokumya l’aoyi banafakolana l’iso; ohonde toyokumya nk’osamb’onoyali lelelo lona etelo eneki Yakomba otokafelak’iso, ko lacina etelo eho eyele nk’eneyal’ino.

¹⁴Lacin’iso tofalekanya lelelo lonakolana l’iso, nk’eyoka totayel’enek’ino; lacin’oka toyaki nk’eneyal’ino l’osimo bon’olotsi bona Masiya.

¹⁵Tofayokumy’isoamene l’ekumedyo enefakolana l’iso, nko l’ikambwa bin’ato’akina; ohonde tolengedya is’ate enengi imeedyo inino ofula, ekambelo eniso engofula eneyal’ino l’okotua bonakolana l’etelo eniso;

¹⁶lacin’eho tosumole bato bosimo bon’olotsi en’ekala beneyali en’ili’onino, ko tofayofef’isoamene lacin’en’etelo en’oto’okina en’aoyi banilamaki.

¹⁷Koko onokumya lokumo, akumyake nko Nkolo.

¹⁸Lacin’oka boto onosokotangama bolotsi ef’ende onoyotang’endamene bolotsi, ohonde onotangam’olotsi la Nkolo.