Read ngando 2 Ba-Kolinto 11 Bible Online

2 Ba-Kolinto 11 - ngando bible

2 Ba-Kolinto 11

¹Yomb’ino bosokokolana linjimedy’emi l’aoyi’amoi banafana bomwu bike! o, bomonjimedya isisali.

²Lacin’emi lakook’ino luha, yoka bosamb’onoyali luha lina Yakomba, eneki’m’okoambanyak’ino l’ome’omoko lacin’eho nkoleky’ino eneyali Masiya, nk’eyoka boyoto’on’oeka onotasongana la mpame.

³Koko laanga, lacina nkanyi inino itongoyehyama ena solosolo la mwi banayali eneyali Masiya, yoka bosamb’onoki njua oongaka Ewe la longo lonande.

⁴Yombo boto aoya, ko akumya Yesu omoi onotakumy’iso, yomb’ino botamba bolimo’omoi bonotatamb’ino, yombo bosimo’okina bon’olotsi bonotatamb’ino, ino bofainde njimedya.

⁵Lacin’emi ley’oka mpayali ena mbusa ena bikima bin’oso mene.

⁶Kang’emi lainda nkaso ena ntenda, mpinde nnonganya; koko en’aoyi bahatu ko l’ekotua behetu tokotumak’ino yok’osamb’oho.

⁷Iya, emi njilaki’owe eneki’m’oyofimak’emamene lacin’eho ino bokumyame? eneki’m’okosumolak’ino bosimo bon’olotsi bona Yakomba efana mpuci?

⁸Emi nku-molaki bikelesia bimoi, ko ntambaki mpuci eneyal’iyo, lacin’eho nkosael’ino;

⁹ko eneki’m’oyalaka l’ino, ko mbelingitanaki, ntayalama bolito eneyali boto’omoko; lacin’oka bifili banayaki ena Makedonia bankokedyaki toma tonatoki’m’oindaka; ko en’aoyi bahatu mbongyaki litombanya, ntongoyala yok’olito eneyal’ino, ko nongongya litombanya nk’osamb’oho.

¹⁰La solosolo ena Masiya eneyali l’emi, emite boto afampekyaki ena lokumo lone lonakumy’emi en’enyanga bena Akaya.

¹¹Lacina nai? lacin’oka mpakook’ino nganji? Yakomba ameya.

¹²Ohonde yoi linil’emi, nongila nko liho, lacin’eho njumole etelo eneyal’iyo banalang’etelo, lacina baenya nk’osamb’onoyal’iso en’aoyi banayokumy’iyo.

¹³Lacina bato ban’okotu’oho bayali bikima bina mpoci, bakambi bana longo, banayohalingol’iyoamene yoka bikima bina Masiya.

¹⁴Ko yoi liho lifana mpefa; lacin’oka le Satana mene ayohalingol’endamene lacina ayalame ekima ena fololo.

¹⁵Lacin’eho, kanga bakambi’anande bayohalingol’iyoamene nk’eyoka bakambi bana mbongi, yoi liho lifan’okolo bike; nsimbo eniyo engoyala nk’eyoka bosamb’onoyali bikambwa biniyo.

¹⁶Lila lakina, emite, boto atakanelake ate emi liinda bomwu; ohonde yombo bokanela yok’oho, bontambe yoka boto oninda bomwu, lacin’eho emi njokumya isisali.

¹⁷Baoyi’ane banatend’emi, mpatende eneyali Nkolo: latenda yoka ena biinda bona bomwu, la ncin’ene enimedy’emi ena njokumya.

¹⁸Bato bike bayokumya lacin’ena yonge: emi nongoyokumya nk’osamb’oho.

¹⁹Lacin’oka ino banayali la bomwu biitedya bato banafan’omwu nko l’olotsi.

²⁰Lacin’oka ino biitedya boto, kang’akokaf’ino ena yombo, kang’akeehya, kang’akuunda, kang’ayofef’endamene, kang’akofoma nsoola en’elongi.

²¹Latenda nk’eyoka onoyofima, lacin’iso toyaaki bolu’olu. Ohonde yombo boto’on’etaketaka ayali la nkaso enefan’ofolu (latenda la biinda bona bomwu), emi nde nde la nkaso nk’osamb’oho.

²²Iyo bayali nde Ba-Ebele? Emi nkoho. Iyo bayali nde Ba-Yisalaele? Emi nkoho. Iyo bayali ban’ecimo ena Abalayama? Emi nkoho.

²³Iyo bayali nde bakambi banakambela Masiya? (Latenda nk’eyok’oto onotombwa) Emi njaleki: ena bikambwa nko ndeka, en’enyolo nko ndeka, ena mpomi nko ndeka mene, en’ewedi ma-ma.

²⁴Ba-Yuda bampomaki befoma betano, bofoma l’ofoma bembambo ntuk’isaso l’ibwa.

²⁵Bampomaki l’enganza befoma besaso, bampuselaki baufe bofusa bomoko, basua basaso banaki’m’ocoaka bekita bamokwela lose lon’okwa, moyala en’asi bana nginda boco’omoko l’ane’omoko;

²⁶en’ekita bisike bike, ena lilila lin’ewedi la njose, ena lilila lin’ewedi la bakumoli, ena lilila lin’ewedi la mbotwa inamamene, ena lilila lin’ewedi eneyali Befenda, ena lilila lin’ewedi en’ongili, ena lilila lin’ewedi ena sengelenge, ena lilila lin’ewedi ena lose lon’okwa, ena lilila lin’ewedi la bifiili bina mpoci;

²⁷en’ekambwa ko l’en’ino, ena betombanya ma-ma, ena njala l’ena mposa, ena nkila ena toma ma-ma, ena lifia l’ena bolumbulumbu.

²⁸Baoyi’aho bayali en’anza, koko yoi limoi liyali lineyanjikamela bina l’ina, nko bokandokando lacin’ena bikelesia bihitu.

²⁹Boto onoyali bolu oka nai, ko emi mpayali bolu? Boto onokumba oka nai, ko emi mpoke yoka nkoi en’otema?

³⁰Yo-mbo layokumya, nongoyokumya lacin’ena bolu’olu bonami.

³¹Yakomba la Bafango’ona Nkolo eniso Yesu Masiya, ende onokumyama bisike la bisike, amey’oka mpafote.

³²Ena Damaseke, gouverneur, onoyaaki ena lotomo lona Aleta lifoka lina roi, asendedyaki bonyanga bon’ato bana Damaseke lacin’eho ambunde;

³³koko bampodyaki en’ofolo bona fenêtre, bankitsaki en’ifondo en’ili bona bokako bon’onyang’oho, ko emi ndotaki bakasa banande.