Read ngando 2 Ba-Kolinto 12 Bible Online

2 Ba-Kolinto 12 - ngando bible

2 Ba-Kolinto 12

¹Kanga njokumya efakolana l’emi, nongoya ena bienelo ko la bienyedyo bina Nkolo.

²Leya boto eneyali Masiya, mbula inisilaki ileki jo l’inei (yombo ayaaki ena yonge, ei mpeye; yombo atayala ena yonge, mpeye: Yakomba mene kongoeya), boto’oho ailedyamaki ena loola lon’isaso.

³Ko leya boto’oho (yomb’ena yonge, yombo ef’ena yonge, ei mpeye: Yakomba kongoeya),

⁴boto’oho ailedyamaki ena Paladiso, ko aokaki baoyi banafatendamisa, banafakolana l’oto lacina atende baho.

⁵Nongokumya lokumo lon’oto’oho; ohonde mpayokumyaki lacin’enamamene, yengoko ena bolu’olu bonami.

⁶Kanga nsokolanga lacina njokumya, mpaindaki bomwu, lacin’oka nongotenda nko solosolo; ohonde mpile’oho, lacina boto’omoi atongonkanel’emi, ate ndeki bokotua bonen’ende eneyal’emi, l’okotua bonok’ende eneyal’emi.

⁷Ko lacin’ena bienelo biho binileki nko ndeka, lacina ntongoyokumy’emamene, boenge bofamaki eneyal’emi ena yonge linami, ekima ena Satana lacin’eho ampome, ntongoyiledyama bike ena lokanyi lonami.

⁸Mbondaki Nkolo beondo besaso lacin’ena yoi line, lacina yume eneyal’emi.

⁹Ko ende ankutwelaki, ate, Isei inami yakolana l’e; lacina locili lonami loongyama nko la boolu. Lacin’eho, nongokumya lokumo ena boolu bonami l’ekiko eneleki, lacina locili lona Masiya loyalame nko l’emi.

¹⁰Lacin’eho, lakanela bolu’olu nk’olotsi, ko la besao, la biinda, la nyoma, la beelingitano lacin’ena Masiya; lacin’oka eneyal’emi bolu’olu njali nko la locili.

¹¹Moyalama boto oninda bomwu: ino bonsomyaki yok’oho. Tumbe ino bontangaki bolotsi: ntayala ena mbusa ena bikima bin’oso mene, kanga njali boto ona bototoloto.

¹²Solosolo ndembi ina ekima imokambama eneyal’ino, ena locinji lohalotu, la ndembi, la baoyi bana mpefa, ko la bikambwa bina locili.

¹³Koko yoi linitakolan’ino la bikelesia bimoi kocu lika nai? yengoko enetayal’emi bolito eneyal’ino. Bombikya ena yoi liho liniki’m’okwaka.

¹⁴Noka, emi mokolana lacina nje eneyal’ino boya bone bon’esaso; ko mpayalamaki bolito eneyal’ino, lacin’oka mpakembe tomatonino: lakokemba nk’inoamene; lacina bana bafamonyedya nyango l’afango toma: nyango l’afango kongobamonyedya bana toma.

¹⁵Nongokafa toma tonami, ko nongoyokafa nko le emamene lacin’ena belimo’enino nko l’ekiko mene, kanga enafudy’emi nganji enakook’emi, nganji enino enanjok’ino eokitakita.

¹⁶Efan’oko likambo—emi ntayalama bolito eneyal’ino; ohonde eneki’m’oyalaka la bomwu bona longo, nkoongaki la longo.

¹⁷Iya, emi mbataki nkita eneyal’ino l’oto’omoko ona baho banaki’m’okotomelaka?

¹⁸Ndakaki Tito, ko ntomakiefili eho l’ende. Iya, Tito aataki nde nkita eneyal’ino? Iso totakenda la Bolimo boh’omoko? totakenda nde la mboka eh’emoko?

¹⁹Ino bokanela nd’oka iso tokolokwel’ino boloko’onisoamene? Totenda nk’en’oso bona Yakomba eneyali Masiya. Koko, in’analangama, baoyi bahatu bayali lacin’enino, lacin’eho bokikyame.

²⁰Lacin’emi laanga, lacina, enengi’m’oya, yombo mpakosungy’ino bato ban’okotua bonalang’emi, ko emamene ntongosungyama l’ino boto’on’okotua bonofalang’ino; ntongosungya lisa, l’ekuku, la nkele, la bikambwanelo, la baoyi bana lotango, la toholiholi, la baoyi bana njengodya, ko la bitomoko bina loyenge;

²¹lacina, enengi’m’oya, Yakomba enami atongonjokya nsoi en’oso’onino, ntongolela lacin’ena bato bike banilaki bowe, ko batumbele baoyi banak’iy’oilaka bana nsefo, l’ana likele ko l’ana loyenge lona mposa inifafekyame.