Read ngando 2 Ba-Kolinto 2 Bible Online

2 Ba-Kolinto 2 - ngando bible

2 Ba-Kolinto 2

¹Koko emamene njalamaki la lisangya, emite mpayi eneyal’ino lakina la lokeseli.

²Yombo lakooky’ino lokeseli, boto ononkiky’emi ekiko oka nai, yomb’ef’ende onoky’emi lokeseli?

³Ntengaki yoi line, lacina, enengi’m’oya, ntongoyata lokeseli eneyal’iyo banasokokolana lacina banjoky’ekiko, lacin’emi limedya, emite enyanga enami eyali nk’enyanga en’inatu.

⁴Lacina eneki’m’okeselaka bik’ike ko njokaki bolito bike en’otema, nkotengelaki bokanda nko la mposoli bike; efa lacin’ino boke lokeseli: nkotengelaki lacin’eho beye nganji eneleki enakook’emi.

⁵Koko yombo boto amoky’on’omoi lokeseli, atanjoky’emi kei: amokooky’inatu etenyi nkoho (mpafudya yoi liho bik’ike).

⁶Nsisodya ene eneki bato bike osisodyak’ende emokolana l’oto’oho;

⁷la ncin’eho akoli eneyal’ino bok’ende isei, ko bolombwele lokeseli, lacina boto’onyi atongoyowa la lokeseli loneloleki bik’ike.

⁸La ncin’eho, lakoond’ino boongya yokamela boto’oho nganji.

⁹Ntengaki nko la ncin’eho njeye la lomeko, yomb’ino boyali l’imeedyo ina lifiko en’aoyi bahatu.

¹⁰Koko oniky’ino ena yoi limoi, emi lomiikya nk’osamb’oho; lacin’oka yoi linaliki’m’oikyak’oto, yombo mbikyaki’oto ena yoi limoi, njiikyaki ena yoi liho nko lacin’enino, en’oso bona Masiya;

¹¹totongoyongama la Satana; lacin’iso tofunge biango binande.

¹²Eneki’m’oyaka ena Tuloa lacin’ena bosimo bon’olotsi bona Masiya, ko lokombo lokombolamaki eneyal’emi la Nkolo,

¹³enetasungy’emi Tito, efili enami, ntaata lifomya en’olimo’onami; koko njasesaki, ko ncoaki ena Makedonia.

¹⁴Koko lokumo eneyali Yakomba onotolond’iso l’elonga eneyali Masiya bisike bihitu, ko ko aenyanya l’iso mpimbo ena njeya enande en’ili behetu.

¹⁵Lacin’iso toyali mpimbo en’olotsi ena Masiya eneyali Yakomba, ena ntoto eniy’anayaike ko l’eniy’anayehyame:

¹⁶eneyali bane toyali mpimbo en’ewedi eneyali bewedi, koko eneyali banyi toyali mpimbo ena liiko eneyali liiko. Koko boto onokoli l’aoyi’ane oka nai?

¹⁷Lacin’iso tofayali yoka bato’a-moi banehya yoi lina Yakomba: iso totenda en’oso bona Yakomba eneyali Masiya, nk’eyoka bato bana solosolo, yoka bato bana Yakomba.