Read ngando 2 Ba-Kolinto 3 Bible Online

2 Ba-Kolinto 3 - ngando bible

2 Ba-Kolinto 3

¹Iya, tomatsa nde lakina oyokumy’isoamene? iya, tolela nde bekanda bena lokumo, yoka bato’amoi, lacin’eho boteye? yombo bekanda bena lokumo eneyal’inoamene?

²Ino boyali bokand’oniso, bonotengamaen’etem’eniso, boneyana ko bonandama l’ato bahatu.

³Ino bomeny’oka boyali bokanda bona Masiya, bonok’is’okambaka, bonotatengama la encre, ohonde la Bolimo bona Yakomba eneyaike; bonotatengama en’ekanda bena baufe: bomotengama en’ekanda ben’etema bena bonufo.

⁴Toyali l’imeedyo ine eneyali Yakomba nko lacin’ena Masiya;

⁵efa lacin’isoamene tokolana litanga yoi limoi is’ate liho liyaki nk’eneyal’isoamene: nkolana eniso eoya nk’eneyali Yakomba;

⁶onotoongyaki lacin’eho toyalame bakambi ban’eteelo ena lisangya lina litoto; efa lin’etengelo en’okanda, ohonde lin’olimo; lacina etengelo eoyaka nko njaka, koko Bolimo bofa liiko nko mpaka.

⁷Koko yombo ekambelo en’ewedi, enetengamaki l’etengelo ena nkota ena baufe, eyaki nko l’okoka, ko ban’ana Yisalaele batalendisa elongi ena Mose ta lacin’en’okoka bonoleki bon’elongi enande, bokoka bonosiela nko nsiela:

⁸ekambelo en’olimo efayale l’okoka bonoleki bosamb’oya?

⁹Yombo ekambelo en’ekoiyelo ena likambo eyali l’okoka, ekambelo ena mbongi eleki’okoka nko ndeka.

¹⁰Solosolo, eho eneyaaki l’okoka efaate bokoka lakina, lacin’ena bokok’one bonoleki nko ndeka.

¹¹Ko yombo eho enesielaki nko nsiela eyaaki la bokoka, ene eneyali nko njalama eyali l’okoka bonoleki nko ndeka.

¹²Koko enat’iso lolendedyo yok’osamb’one totenda nko la nkaso mene;

¹³ko tofayali yoka Mose, onokundaki elongi enande lacina ban’ana Yisalaele bafatakamele nsimbo ena yoi liho lineyasiele;

¹⁴koko betem’eniyo becilingitanaki; koko en’eandelo ena lisangya liniki’oso ekundelo eho eciki nko le bon’in’one, etakundwa, lacin’oka ekundelo eho euma nko la Masiya.

¹⁵Nko le bon’in’one, enand’iyo bekanda bena Mose, ekundelo eyali en’otem’oniyo nko njalama.

¹⁶Koko yombo botem’oho bohalingwa eneyali Nkolo, ekundelo eho enguma.

¹⁷Nkolo ayali Bolimo, koko eneyali Bolimo bona Nkolo etungwelo eyali nko meho.

¹⁸Koko isatu, l’elongi nko nkundwa, toyalende bokoka bona Nkolo yok’ena talatala, ko toyahalingwa en’ekolanya enandamene en’okoka eneyali bokoka, nko la Bolimo bona Nkolo.