Read ngando 2 Ba-Kolinto 4 Bible Online

2 Ba-Kolinto 4 - ngando bible

2 Ba-Kolinto 4

¹Lacin’eho, enat’iso ekambelo ene, yoka bosamb’onok’is’otambaka isei, tofalembwa.

²Tomumbela baoyi ban’ofisafisa bana nsoi, ko tofakende la longo, ko tofehya yoi lina Yakomba l’itungya; ohonde la mpoladya ena solosolo eho toyolongy’isoamene eneyali botema bon’oto l’oto en’oso bona Yakomba.

³Koko yombo bosimo’oniso bon’olotsi bokunji nko nkundama, bokunji eneyal’iyo banayehyame;

⁴lacin’oka yakomba ena loko lone amoyaka baiso ban’etema ben’ato’aho sanafimedya, lacina fololo en’osimo bon’olotsi bon’okoide bona Masiya, onoyali ekolanya ena Yakomba, etongololoma eneyal’iyo.

⁵Lacin’iso tofayokumy’isoamene: tokumya Masiya Yesu nko Nkolo, ko isoamene iko baombo’anino lacin’ena Yesu.

⁶Lacina Yakomba inilaki, ate, Fololo elolomake en’ilima! endamene imololoma en’etem’eniso lacina atofe fololo ena njeya m’okonde bona Yakomba en’elongi ena Yesu Masiya.

⁷Koko toata iyem’ine iney’otuya ena mpoke ina ilongo lacin’eho mpamba eho eneleki nko ndeka eyalame nk’ena Yakomba, efa eneyal’iso;

⁸bateeny’iso bino en’ili behetu, koko tofakoiyama; batokanzakanza, koko tofawu l’okandokando;

⁹tonyomama, koko tofumbelama; tosokodyama, koko tofehyama;

¹⁰bisike bihitu toyatole ewelo ena Yesu ena baonge’aniso, lacin’eho liiko lona Yesu lenya ena baonge’aniso nkoho.

¹¹Lacin’oka bisike bihitu is’anayaike tolekyama en’ewedi lacin’ena Yesu, lacin’eho liiko lona Yesu lenya nkoho ena baonge’aniso ban’ewedi.

¹²Yok’oho bewedi beyasale eneyal’iso, koko liiko eneyal’ino.

¹³Koko enat’iso bolimo boho bon’imeedyo, bosamb’onoyali yoi linalitengi, Njimedyaki, ko la ncin’eho ntendaki; iso nkoho, timedya ko lacin’eho totenda;

¹⁴lacin’iso tey’oka ende onetolaki Nkolo Yesu en’ewedi, angoteetol’iso nkoho la Yesu, ko angoteemady’iso l’ino.

¹⁵Lacina baoyi bahatu bayali lacin’enino, lacina enafula isei, lacin’ena bato bike lokango loneloleki liilama l’isei iho eneyali lokumo lona Yakomba.

¹⁶Lacin’eho, tofalembwa; koko kanga boto’oniso bona mbiolo ayawu, boto’oniso onoyali ena ntundulu ayikyama bina l’ina.

¹⁷Lacina bino biniso bin’isik’ine kei binifan’olito biotosaela bolito bonoleki bona bokonde bona bisike l’isike;

¹⁸enalend’iso, efa baoyi banenya: tolenda nko baoyi banafenya; lacina baoyi banenya bayali ban’isik’ine kei; koko baoyi banafenya bayali bana bisike bihitu.