Read ngando 2 Ba-Kolinto 5 Bible Online

2 Ba-Kolinto 5 - ngando bible

2 Ba-Kolinto 5

¹Lacin’iso tomey’oka yombo botumb’oniso bona loko bona lilombe behyama, toyali la litonga eneyali Yakomba, nk’otumba bonotafakama la bakasa, bonoyali bon’isike l’isike ena loola.

²Solosolo ena litonga line tosaa besao lacin’oka tolanga tolotsame la litonga liniso linaliyali ena loola;

³lacina yombo tolotsama, tofenyaki lakina bolumbulumbu.

⁴O, is’anayali ena lilombe line tosaa, tok’olito: efa lacin’oka tolanga toyalame bolumbulumbu: tolanga tolotsame, lacinayonge lin’ewedi limelame la liiko.

⁵Koko ende ono toongyak’iso nko lacin’ena yoi line nko Yakomba, onotofaki mbwandwa en’olimo.

⁶Lacin’eho, tokiky’otema bisike bihitu, ko tey’oka esike eneyal’iso ena yonge tofayali eneyali Nkolo,

⁷(lacin’iso toyakende nko l’imeedyo, efa la njena).

⁸Tokiky’etem’eniso, ko tokanela bolotsi telane la yonge, ko toyale en’ola la Nkolo.

⁹Lacin’eho, kanga toyali en’ol’oho, kanga totayele en’ola, tofona la mposa mene lacin’eho totangame bolotsi eneyal’ende.

¹⁰Lacin’isatu tongenya en’oso bon’ieko ina etendelo en’akambo ina Masiya, lacina boto l’oto atambe yok’osambo bonoki’nd’okambaka ena yonge, nk’eyok’onoki’nd’okambaka, yombo baoyi ban’olotsi, yombo baoyi ban’owe.

¹¹Lacin’eho, eney’iso losomo lona Nkolo, toond’ato. Koko tenya fololo eneyali Yakomba, ko lalanga lacina tenya fololo eneyali betem’enino nk’osamb’oho.

¹²Tofayofef’isoamene lakina eneyal’ino, ohonde tokof’ino etelo ena mpefa en’aoyi lacin’eniso, lacina boate yoi linaling’in’okutwela iy’anakumya baoyi bana mbiolo ena yonge, ko bafakumya baho banayali en’otema.

¹³Yombo tolowa, tolowa nk’eneyali Yakomba; yombo toyali la lokanyi lon’olotsi, toyali yok’oho lacin’enino.

¹⁴Lacina nganji ena Masiya eotosomya; lacina tokodya yok’one, is’ate omoko awelaki bato bahatu, ko la ncin’eho bato bahatu bawaki.

¹⁵Ko ende awaki lacin’en’ato bahatu, lacina iy’anayaike bafaike lakina eneyal’iyoamene: baika nk’eneyal’ende onowaki lacin’eniyo ko aetwaki lakina en’ewedi.

¹⁶Lacin’eho, en’esik’ene tofeye boto l’okotua bona yonge; ko yombo teyaki’ale Masiya l’okotua bona yonge, isanga tofey’ende lakina yok’osamb’oho.

¹⁷Lacin’eho, yombo boto ayali eneyali Masiya, ayali nko boto’okina on’ototo: baoyi banaki’oso bamokala, noka, baoyi bahatu bamoyalama nko ban’atoto.

¹⁸Ko baoyi bahatu bayali eneyali Yakomba, onotambanyak’iso en’efili l’endamene nko la Masiya, ko atofaki ekambelo en’eambanyedyo en’efili;

¹⁹lacina Yakomba ayaaki eneyali Masiya, ko amolambanya bana-loko l’endamene, ko ataandel’ato bewe beniyo, ko amotosuky’iso yoi lin’eambanyedyo.

²⁰Lacin’eho, toyali bikima lacin’ena Masiya, nk’eyoka Yakomba ayaonde bato l’iso: tokoond’ino lacin’ena Masiya, bambanaka la Yakomba en’efili.

²¹Lacina amil’ende onoteya bowe, ayalame bowe lacin’eniso; lacin’eho iso toyalame mbongi ena Yakomba nko l’ende.