Read ngando 2 Ba-Kolinto 7 Bible Online

2 Ba-Kolinto 7 - ngando bible

2 Ba-Kolinto 7

¹In’analangama, enat’iso bisemba bine, toyokulake isoamene ena nsefo ehatu ena yonge l’en’olimo, ko tokokyake baoyi bana mbongi ena mbanga ena Yakomba.

²Botofak’iso eyaelo en’etem’enino: iso totilela boto’omoi yoi lin’owe, totehya boto, totatungya boto’omoi lacin’eho toate nkita.

³Mpatende yok’osamb’one oyokokoiy’ino likambo: mosila yil’oso, emite, ino boyali locela en’etem’eniso lacin’eho towu l’ino laanda lomoko, ko tike l ino laanda lomoko.

⁴Latenda lacin’enino nko la nkaso mene, ko lakumya lokumo bike lacin’enino; molola l’ekikedyo, ko botem’onami bokama l’enyanga ena bino biniso bihitu.

⁵Koko enek’is’oyaka ena Makedonia, yonge liniso litaata lifomya tu, koko tenaki bino en’ili behetu: ena mbiolo nko bita, koko losomo ena ntundulu.

⁶Koke ende onocicimodya betem’eniyo banasaa, nko Yakomba, aocicimodya botem’oniso l’eyelo ena Tito;

⁷ko efa l’eyelo enande kei, ohonde la ncicima eneki’nd’ocicimaka l’ino nk’osamb’oho: aotosumola lokeseli lonanjok’ino, ko la lilelo linino, ko la mposa bike enanjok’ino; ko la ncin’eho enyanga enanyang’emi eleki nko ndeka.

⁸Kanga nkookyak’ino lokeseli l’okand’onami, mpayokanya la ncin’eho: yombo njokanyaki isisali (len’oka bokand’oho bomokooky’ino lokeseli, kanga loho lotalingalinga bike),

⁹ohonde isanga lanyangela, efa lacin’oka ino bokaki lokeseli, ohonde lacin’ino bokaki lokeseli lonokoyedya ena njumbela en’aoyi’owe; lacin’ino bokaki lokeseli l’okotua bona Yakomba, lacin’eho bofilelame yoi limoko lin’owe eneyal’iso.

¹⁰Lacina lokeseli lon’okotua bona Yakomba loatel’oto njumbela en’aoyi’owe lacin’ena liiko, ko njumbela eho efana njokanya lakina; ohonde lokeseli lona loko loatel’oto nk’ewedi.

¹¹Koko lenda, lokeseli loho lon’okotua bona Yakomba lonok’in’ookaka, bokanelaka mposa ena locinji eneki loho okoatelak’ino, ko la mpoladya ena likambo linino, ko la ndemwa, ko la losomo, ko la mposa mene, ko la mbutodya ena nkele! En’aoyi bahatu boyotumaki’oka boyali nko soto ena yoi line.

¹²Lacin’eho, kanga nkotengelak’ino, ntatenga lacin’ena boto’oho onilaki’owe, ko ntatenga lacin’enande onoki’nd’oilelaka bowe: ntengaki lacin’eho mposa ena locinji enatook’ino enya eneyal’ino en’oso bona Yakomba.

¹³Lacin’eho iso tomocicima en’etema; ko ena ncicima eniso tonyangaki enyanga eneleki lacin’en’enyanga ena Tito, lacin’oka botem’onande bomoka ekiko l’inatu.

¹⁴Yomb’emi nkokumyak’ino ena yoi limoi eneki’m’otendaka l’ende, ntoka nsoi la yoi liho; koko yok’onok’is’okosumolak’ino baoyi bahatu la solosolo, nk’osamb’oho lokumo loniso lonoki’m’okumyaka en’oso bona Tito lomeny’oka loyali nko solosolo.

¹⁵Ko nganji enakookamel’ende eleki nko ndeka mene, enakanedy’ende imeedyo inino ina mpika, nko bokotua bonok’in’otambak’ende la mbanga ko la mbilima.

¹⁶Lanyanga lacin’oka en’aoyi bahatu lakolana likiky’otema lacin’enino.