Read ngando 2 Ba-Kolinto 8 Bible Online

2 Ba-Kolinto 8 - ngando bible

2 Ba-Kolinto 8

¹Koko tokosumol’ino, bifili, isei ina Yakomba inifamaki ena bikelesia bina Makedonia;

²lacin’oka, kanga bayali ena lomeko lona bino bike, ekiko eniyo eneleki nko ndeka la biinda boniyo bik’ike bamolambana lacina bafudya lituka lin’isei iniyo.

³Lila lacin’eniyo, emite, bafaki nganji yoka bosamb’onoki etelo eniyo oyalaka, o, nko ndeka etelo eho, nko la ndokodya eniyoamene;

⁴batoondaki nko mbonda mene lacin’eho totambe isei ine ko l’eambanelo ene ena nkambya ena ban’oeka.

⁵Ko batila yoi line nk’eyoka bosambo bonok’is’olengedyaka kei: en’oso bayolekyak’iyoamene eneyali Nkolo, ko l’eneyal’iso l’eango ena Yakomba.

⁶Lacin’eho, toondaki Tito lacina akokokedy’ino isei ine nkoho, yok’onoki’nd’omatsaka en’oso.

⁷Koko yoka bosamb’onalek’ino nko ndeka en’aoyi bahatu, en’imeedyo, l’en’etendelo, l’ena njeya, l’ena mposa ehatu ena locinji, ko l’ena nganji enatook’ino, boongya lileka en’isei ine nk’osamb’oho.

⁸Mpatende yoi line yoka lotomo: lameka solosolo ena nganji eninoamene nko la mposa ena locinji en’ato’akina.

⁹Lacin’ino beya isei ina Nkolo eniso Yesu Masiya: kang’ayaaki ntuki, ayalamaki biinda lacin’enino, lacin’ino boyalame batuki nko la biinda bonande.

¹⁰Koko yoi linakanel’emi liho line: ekoli l’ino banamatsaki en’oso l’oso, efa lacina bokambe kei: boangaki eango nk’ena mbula enesilaki;

¹¹ohonde isanga boongya lisiedya; lacina, yok’osambo bonok’in’oyalaka la mposa en’eangelo, ekambelo eyalame nk’osamb’oho, bosamb onoyali eatelo enino.

¹²Yombo mposa eyali, eotangam’olotsi bosamb’onoyali boto la toma, efa bosambo bonofan’ende toma.

¹³Mpile baoyi’ane lacin’eho bato’amoi baate lifomya ko ino bene bino:

¹⁴lila lacin’ena nkolanyakocu; lacina mpula enino en’esik’ene ekadya biinda bonind’iyo, koko lakina mpula eniyo ekadya biinda bonind’ino, ko bokolane nko kocu;

¹⁵yoka bosamb’onoyali yoi linalitengamaki, ate, Onosusanyaki bike ataata toma tona ncikala, ko onosusanyaki isisali atainda.

¹⁶Koko lokango eneyali Yakomba onila mposa eho ena locinji en’otema bona Tito lacin’enino.

¹⁷Lacin’oka ende aimedyaki boondo boniso, ko acoaki eneyal’ino la ndokodya enandamene, lacina ayaaki la mposa bik’ike.

¹⁸Ko tomotoma l’ende efili eho onoyali la lokumo en osimo bon’olotsi ena bikelesia bihitu,

¹⁹koko efa yok’oho kei: ende asonamaki la bikelesia lacina acu l’iso en’ekambwa en’isei ine eneyakambame l’iso lacin’ena lokumo lona Nkolo, ko lacin’eho mposa eniso eenya.

²⁰Toongya lilenda, lacina boto atongototanga lacin’eneki nganji ine ineyasal’iso ofulaka bike;

²¹tokodya nko baoyi ban’olotsi, ef’en’oso bona Nkolo kei: nk’en’oso bon’ato nk’osamb’oho.

²²Ko tomotoma l’iyo efili eniso onok’is’omekaka bemeka bike, ko tomey’oka ayali la mposa ena locinji en’aoyi bike, koko isanga mposa enande eleki lacin’ena njimedya bike enakimedy’ende ino.

²³Ena likambo lina Tito: ende ayali bokambi’onami onambana l’emi en’ekambwa lacin’enino; koko ena likambo lina bifili biniso: iyo bayali bikima bina bikelesia, iyo nko bokonde bona Masiya.

²⁴Lacin’eho, boatume en’oso bona bikelesia ndembi ena nganji enaokamel’ino, ko la ncina ena lokumo lonakumy’iso lacin’enino.