Read ngando 2 Ba-Kolinto 9 Bible Online

2 Ba-Kolinto 9 - ngando bible

2 Ba-Kolinto 9

¹Ena yoi lin’ekambedyo ena ban’oeka, efaate ncina ntutuma enakotengel’emi yoi;

²lacin’emi leya mposa enino, ko lakokumya la ncin’eho eneyali baise Makedonia, enasumol’emi iyo, emite, Baise Akaya bamokolana mbul’emoko kali; ko mposa enino emoletola bato’aniyo bike.

³Koko motoma bifili biho lacina lokumo lonakumy’iso lacin’enino lotongoyalama bototoloto ena yoi line; lacin’ino bokolane, yok’onoki’m’otendaka;

⁴lacin’iso (kanga tofakoand’ino) totongoyoka nsoi ena njimedya eniso, yombo bamoi bana Makedonia baoya l’iso, ko bafakosungy’ino kuma bokolana.

⁵Lacin’eho, njilaki, emite, ekoli lacina njufole bifili bacu en’oso eneyal’ino, ko basusanya en’oso nganji eho enek’in’osembyak’esemba, lacina nganji eho ekolane yoka nganji en’isei, ef’ena nkudya.

⁶Koko lila, emite, onofusa nk’isalisali angonuka nk’isalisali; ko onofusa l’osako angonuka nko l’osako.

⁷Boto l’oto afake yoka bosamb’onoki’nd’okanedyaka en’otem’onandamene, efa la lokeseli, ko efa la losomo; lacina Yakomba alanga boto onofa nganji nko l’ekiko.

⁸Ko Yakomba ainya likofuedy’ino isei ihatu; lacin’eho enat’ino toma tohatotu tonakolana l’ino en’aoyi bahatu, ino bokolane lifudya bikambwa bihitu bin’olotsi.

⁹Yoka bosambo’onoyali yoi linalitengi: Amofanzafanza, amofa bato biinda; Mbongi enande eyali bisike bihitu nko njalama.

¹⁰Ko ende onofa bofusi beona ko la mampa ena ndaka, angokof’ino ko angokofuedy’ino beona bena mpusa, ko angofudya bemamo bena mbongi enino;

¹¹ko bongoyalama batuki en’aoyi bahatu lacin’eho benyanya isei ihatu ineyatela Yakomba lokango l’iso.

¹²Lacina ekambelo en’ekambwa ene efakadya biinda boninda ban’oeka kei, ohonde eofuedya Yakomba nkanga ena lokango bike;

¹³lacin’iyo bakumya Yakomba lacin’ena lomeko lonamekam’ino en’ekambelo ene lacin’ena mpika enek’in’oimedyaka bosimo bon’olotsi bona Masiya, ko lacin’en’isei inaf’ino nganji eneyal’iyo l’eneyali bato bahatu;

¹⁴ko iyoamene, enakoondel’iyo, bakook’ino mposa mene lacin’en’isei ina Yakomba inileki bike iniyali eneyal’ino.

¹⁵Lokango eneyali Yakomba lacin’ena nganji enande enefan’oto oninya lisakitola bokotua.