Read ngando Ba-Ngalatia 1 Bible Online

Ba-Ngalatia 1 - ngando bible

Ba-Ngalatia 1

¹Paulo, ekima (ef’eneyali bato, ko efa l’ato: nko la Yesu Masiya, la Yakomba Bafango oneetolaki enek’anawaki),

²la bifili biniyali l’emi bihitu, eneyali bikelesia bina Ngalatia:

³isei eneyal’ino la mwieneyali Yakomba Bafango, ko l’eneyali Nkolo eniso Yesu Masiya,

⁴onoyolekyak’endamene lacin’ena bewe beniso, lacin’eho atotungole ena esik’ene en’owe, yoka bosamb’onoyali eango ena Yakomba la Bafango’oniso.

⁵Lokumo eneyal’ende bisike l’isike. Ndoho.

⁶Lafefa lacin’oka bomuma isanga eneyal’ende onokeelelak’ino en’isei ina Masiya, lacina bocu en’osimo’okina bon’olotsi.

⁷Efaate bokin’osimo bon’olotsi; ohonde bamoi bayali enek’ino banakosengeny’ino, banalanga lacina baehya bosimo bon’olotsi bona Masiya.

⁸Ohonde, kang’iso, kang’ekima ena loola, tosekodya eneyaj’ino bosimo bon’olotsi bokina bonofayali boho bonok’is’osekodyaka eneyal’ino, ayalamake anatema.

⁹Lila lakina isanga, nk’eyok’onok’is’otendak’oso, emite, Yomb’oto asekodya eneyal’ino bokin’osimo bon’olotsi bonofayali boho bonok’in’otambaka, ayalamake anatema.

¹⁰Iya, lakemba nde lokumo eneyali bato, yombo eneyali Yakomba? lakemba nde lacin’eho njile baoyi banalang’ato? Yomb’emi lakamba baoyi banalang’ato, tumbe mpayale boombo bona Masiya.

¹¹Koko lakosumol’ino, bifili, emite bosimo bon’olotsi bonoki’m’osekodyaka eneyal’ino bofayali l’okotua bon’ato.

¹²Lacin’emi ntatamb’oho eneyali bato, ko boto atandak’emi boho: mbataki boho nko l’etumelo eneki Yesu Masiya ontumaka.

¹³Lacin’ino bomoka bokotua bonoki’m’okambak’oso kuma njali en’ekumedyo enakumya Ba-Yuda Yakomba, nko bosamb’onoki’m’onyomaka ekelesia ena Yakomba nko nyoma eneleki, ko mbehyaki eho nko mbehya.

¹⁴Ndekanyaki bato bike’ale, nko bifili binami bin’ecimo enamamene en’ekumedyo enakumya Ba-Yuda Yakomba, ko njaaki’ale la mposa en’aoyi bana bafango’anami’ale eneleki mposa eniyo.

¹⁵Koko Yakomba ononsonak’emi ena lototo lona boyango’onami, ko ambelelaki l’isei inande,

¹⁶eneki’nd’olangak’oka aenyanya Bon’onande nko l’emi, lacin’eho emi nsekodya bosimo’onande bon’olotsi eneyali Befenda, nkwaho ntufola boto yoi tu;

¹⁷ko ntacoa ena Yelusalema eneyal’iy’anayaaki bikima en’oso’onami: ncoaki nk’ena Alaba, ko lakina njutaki ena Damaseke.

¹⁸Koko eneki mbula isaso oetaka, ncoaki ena Yelusalema oyengya Kefa, ko nkisaki’ase enek’ende bekolo jo l’etano.

¹⁹Koko ntena bikima bimoi tu, umola nko Yakobo, bakune’ona Nkolo.

²⁰Baoyi banakotengel’emi, lenda, en’oso bona Yakomba, mpafote.

²¹Ena mbusa njaki en’ekala bena Sulia la Kilikia;

²²koko elongi enami eteyana eneyali bikelesia bina Yudea biniyali eneyali Masiya;

²³koko iyo baokaki yoi kei, Mbo ende onotonyomaki en’oso’ale ayasekodya isanga bosimo bon’olotsi bon’imeedyo bonoki’nd’oehyak’ale nko mbehya.

²⁴Ko bakumyaki Yakomba lacin’enami.