Read ngando Ba-Ngalatia 2 Bible Online

Ba-Ngalatia 2 - ngando bible

Ba-Ngalatia 2

¹Koko eneki mbula jo l’inei okalaka, ncoaki lakina ena Yelusalema, emi la Balunaba, ko ntolaki Tito l’emi nkoho.

²Koko ncoaki meho eneki’m’olakamaka l’enelo; ko njasumolaki bosimo bon’olotsi bonasekody’emi eneyali Befenda, koko nsumolaki iyo bana lokumo nk’ena lokuko, lacina ntongokenda, yombo nkendaki, bototoloto.

³Koko batasomya nko le Tito, bise Elene, onoyaaki l’emi, lacin’eho akesame yonge.

⁴Ohonde lacin’ena bifili bimoi bina mpoci banatoyamaki la longo, banatuaki l’ofisafisa oyong’etungwelo enat’iso eneyali Masiya Yesu, lacin’eho batotole ena yombo.

⁵Iso totimedya bato’aho lacina tafike, efana nko l’isisali tutu; lacina bosimo bon’olotsi boyalame l’ino nko njalama.

⁶Koko iy’anatangama bana lokumo (emi mpakanele bokotua bonok’iy’oyalaka: Yakomba afatambe boto lacin’en’elongi en’oto)—iy’anayaaki la lokumo loho batankokedya yoi limoko.

⁷Ohonde enek’iy’oenak’oka emo njilamaki ena lifoka lina bosumoli eneyali banatakesama yonge, yoka bosamb’onoki Petelo oilamaka bosumoli eneyal’iyo banakesama yonge

⁸(ende onilaki Petelo ekima eneyali iy’anakesama yonge, anjilak’emi nkoho lacin’ena Befenda);

⁹ko Yakobo la Kefa la Yoane banatangamaki bakiki bana ekelesia, enek’iy’oenak’oka etelo emompam’emi, bansangelak’emi la Balunaba la likasa y’ome lin’eambanelo, lacin’eho iso tocu eneyali Befenda, ko iyo bacu eneyal’iyo banakesama yonge.

¹⁰Koko balangaki lacina tokanedya bato biinda, ko emamene ndangaki la mposa lacina njile nkoho.

¹¹Koko eneki Kefa oyaka ena Antiokia, njofelaki lofeli nk’en’oso bon’elongi enande, lacin’oka akwaki likambo.

¹²Lacin’ende alaki toma la Befenda, kuma bamoi batayi eneyali Yakobo; ohonde enek’iy’oyelaka, ayosumaki, ko aelanaki l’iyo, lacin’oka aangaki iy’anakesama yonge.

¹³Ko Ba-Yuda bamoi baambanaki l’ende ena yoi liho lina njofisa, ko le Balunaba mene atembwaki lacin’en’osimo’oniyo.

¹⁴Koko eneki’m’oenak’oka batakend’olotsi yoka bosamb’onoyali solosolo ena bosimo’on’olotsi, ntendaki la Kefa en’oso bon’iyatu, emite, Yomb’e, bise Yuda, oyakambe bokotua bonakamba Befenda, iya, osomya Befenda losomo lacina bakambe l’okotua bonokamba Ba-Yuda bosamb’oya?

¹⁵Is’anotwaki Ba-Yuda, ko tofayali bat’owe bana Befenda,

¹⁶iso tey’oka boto afayengwa boyengo la bikambwa bina basangya: ayengwa nko l’imeedyo eneyali Yesu Masiya; isoamene timedyaki Yesu Masiya, lacin’eho toyengwa l’imeedyo eneyali Masiya, ko efa la bikambwa bina basangya, lacin’oka efan’oto onoyengwa la bikambwa bina basangya.

¹⁷Koko enafon’iso lacina toyengwa boyengo la Masiya, yomb’isoamene tosungyama bato ban’owe, iya, Masiya amoyalama nde bokambi bon’owe? Efana!

¹⁸Yombolafaka lakina bikambwa biniki’m’ofakolaka, lil’emamene bofulunganyi bon’asangya.

¹⁹Ena likambo lina basangya, emi mbwaki nko l’asangya, lacin’eho mbike eneyali Yakomba.

²⁰Molakama la Masiya en’ekulusu; ko lakina ef’emi onoyaike: Masiya ayaike eneyal’emi; koko liiko lonik’emi isanga ena yonge, liika nko l’imeedyo, nk’imeedyo iho iniyali eneyali Bon’ona Yakomba, ononjokamelaki nganji, ko ayolekyak’endamene lacin’enami.

²¹Mpile isei ina Yakomba iyalame bototoloto; lacin’oka yombo mbongi eoya l’asangya, tumbe Masiya awaki bototoloto.