Read ngando Ba-Ngalatia 3 Bible Online

Ba-Ngalatia 3 - ngando bible

Ba-Ngalatia 3

¹Ino baise Ngalatia baninda lokanyi, onokosengak’ino oka nai? ino banenaki Yesu Masiya fololo nko mbakama en’ekulusu, nk’eyoka la baiso’aninoamene.

²Lalanga bonsumole yoi line kei: Ino botambaki Bolimo yombo la bikambwa bina basangya, yombo la njoka en’imeedyo?

³Ino biinda nde lokanyi yok’o-nyi? Enek’in’omatsaka la Bolimo, iya, bongocoa nde osimba la baoyi bana yonge?

⁴Benaki bino bikeyok’osamb’one nko bototoloto? yombo biyaaki bototoloto.

⁵Ende onokof’ino Bolimo, ko ayakambe bikambwa bina mpefa eneyal’ino, aila yok’osamb’oho yombo la bikambwa bina basangya, yombo la njoka en’imeedyo?

⁶Yok’onoki Abalayama oimedyaka Ya-komba, ko imeedyo iho yandamaki eneyal’ende yoka mbongi.

⁷Lacin’eho, boongya linongany’oka bato banimedya, ban’ana Abalayama nd’aho.

⁸Koko en’oso’ale eneki Bokanda bona Yakomba oenak’oka Yakomba angoyengola Befenda boyengo l’imeedyo, boho bosumolaki Abalayama bosimo bon’olotsi en’oso, ate, Benyanga behetu bengosakelama bosako nk’eneyal’e.

⁹Yok’oho iy’anayali l’imeedyo baosakelama bosako, iyo la Abalayama onimedyaki.

¹⁰Lacin’oka iyatu banayali bana bikambwa bina basangya baomomama bomomo; lacina yoi limoi litengi, ate, Boto l’oto onofacindelane en’aoyi bahatu banatengi en’okanda bon’asangya lacina aile baho, aomomama bomomo.

¹¹Koko yoi limenya fololo lika efan’oto onosokoyengwa en’oso bona Yakomba la basangya; lacina bana mbongi baika nko l’imeedyo;

¹²ko basangya bafayali ban’imeedyo; ohonde, Boto onila baoyi’aho, angika nko l’aho.

¹³Masiya atiikolaki ena bomomo bon’asangya, eneki’nd’oyalamaka bomomo lacin’eniso; lacin’oka yoi limoi litengi, ate, Boto l’oto onakama en’ote aomomama bomomo;

¹⁴lacin’eho eneyali Yesu Masiya bosako bona nsakama bona Abalayama boyele eneyali Befenda, lacin’iso totambe l’imeedyo esemba ena Bolimo eneki’nd’osembyaka.

¹⁵Bifili, latenda nko l’okotua bon’ato: Yombo boto aocika lisangya, ko liho limokikyama la ndembi, efan’oto onongila liho liyalame bototoloto, ko efan’oto onokokedya liho yoi limoko.

¹⁶Koko bisemba bisembyamaki eneyali Abalayama l’eneyali bon’onande. Atil’ate, Eneyali bana—nk’eyoka bayali bike: ailaki, ate, Eneyali bon’one—nk’eyoka bomoko, ko, Masiya nd’oho.

¹⁷Lila yok’one, emite, Eteelo ena lisangya enekikyamaki la ndembi en’oso bona Yakomba efehyama la basangya banayaki mbula bekam’enei la ntuk’isaso ena mbusa, ko esemba efilama bototoloto yok’osamb’oho.

¹⁸Yombo lisango liyali lina basangya, lifayali lakina lin’esemba tu; ohonde Yakomba afaki Abalayama lisango nganji nko l’esemba.

¹⁹Iy’oko, basangya bayali lacina nai? bafamaki lacin’ena baoyi’owe, yengoko bona onoki esemba osembyamaka aoya; ko batehamaki la bikima bina loola ena likasa lina bolekya.

²⁰Koko bolekya afayali bolekya bon’oto’omoko kei, ohonde Yakomba ayali nk’omoko.

²¹Basangya baehya nde bisemba bina Yakomba? Efana I Yombo lisangya lifamaki linakolana yatela bato liiko, tumbe mbongi eyaki nko la lisangya, solosolo.

²²Ohonde Bokanda bona Yakomba bomokomba bato bahatu ena lokombo lona baoyi’owe, lacin’eho esemba eneyali en’imeedyo eneyali Yesu Masiya efame eneyali iy’animedya.

²³Kum’imeedyo ine itayi, basangya batotombanyaki yoka basungu, tokombamaki en’okasa, yengoko esike en’enyedyo en’imeedyo ena mbusa.

²⁴Yok’oho basangya bayaaki bolaki’oniso, lacin’eho batoyedya eneyali Masiya, lacin’iso toyengwa l’imeedyo.

²⁵Koko eneki imeedyo oyaka, tofayali lakina ena lifoka lin’olaki’oho.

²⁶Lacina inatu boyali ban’ana Yakomba lacin’en’imeedyo eneyali Masiya Yesu.

²⁷Lacin’oka inatu baninamaki eneyali Masiya, bolotaki Masiya.

²⁸Efaate lakina Bise Yuda, efaate bise Elene; efaate lakina boombo, ko efaate onotungwaki; efaate lakina mpame, ko efaate’oyoto; lacin’inatu boyali nk’omoko eneyali Masiya Yesu.

²⁹Koko yombo boyali bato bana Masiya, boyali nko ban’ana Abalayama, nko basangoli yoka bosamb’onoyali esemba.