Read ngando Ba-Ngalatia 4 Bible Online

Ba-Ngalatia 4 - ngando bible

Ba-Ngalatia 4

¹Lila, emite, Yombo bosangoli ayali bonome, afacikitana la boombo, kang’ayali nyangetuke ena lisango lihalitu;

²ohonde ayali nk’eneyali batombanyi la bamonyi yengoko esike eneki bafango okodyaka.

³Nk’osamb’oho l’iso: enek’is’oyalaka banatome, totungamaki ena yombo lina bikambwa bina loko binay’oso;

⁴koko eneki esike enakolana oyelaka, Yakomba atomaki Bon’onande, onotwaki l’oyoto, ko aotwaki ena yombo lina basangya,

⁵lacin’eho aikole iy’anayaaki ena yombo lin’asangya, lacin’eho totambe lifoka lina bana.

⁶Ko lacin’eho ino boyali bana, Yakomba atomaki Bolimo bona Bon’onande en’etem’eniso, ko ayatende, ate, Aba, Bafa.

⁷Lacin’eho, ofayali boombo lakina: oyali nko bona; ko yomb’oyali bona, oyali bosangoli bona Yakomba lacin’ena Masiya.

⁸Ohonde en’esik’eho, kum’ino boteye Yakomba, boyaaki ena yombo liniyo banafayali yakomba ina solosolo;

⁹koko isanga, eney’ino Yakomba, beyana nko l’ende, iya, butwa lakina ena bikambwa binay’oso biniyali bolu’olu ko la biinda, binalang’ino lacina butwa lakina ena yombo liniyo bosamb’oya?

¹⁰Bo-yamonya bina, ko la ngondo, ko la bilanga, ko la mbula.

¹¹Laanga lacin’enino, lacina ekambwa eneki’m’okambaka lacin’enino etoyalama bototoloto.

¹²Bifili, lakoond’ino boyalame yok’osambo bonoyal’emi; lacin’emi njali yok’ino; ino botanjilel’emi bowe tu.

¹³Bey’oka nsekodyaki bosimo bon’olotsi eneyal’ino bosekodya bon’oso nko lacin’ena tongitongi tona yonge.

¹⁴Koko ino botankila, ko botampengola lacin’ena tongitongi tona yonge linami, tonatoyaaki yoka lomeko eneyal’ino, ohonde bontambaki yoka ekima ena loola, o, nk’eyoka Masiya Yesu.

¹⁵Enyanga enek’in’onyangaka eyali meya? lacina emamene lila lacin’enino, emite, yombo binyaki, tumbe bosokokuma baiso’anino, ko bosokomp’emi baho.

¹⁶Iya, emi moyalama nde bookyi’owe’onino nko lacin’oka nkosumolaki solosolo eho?

¹⁷Bato’aho bakofef’inola mposa mene, ohonde efa la ncina en’olotsi: balanga lacin’eho batelany’iso l’ino, lacin’ino boakembe la mposa nkoho.

¹⁸Bolotsi lacina bofefame ena yoi lin’olotsi bisike bihitu, efa kum’emi njali l’ino kei.

¹⁹Ban’anami bana tosalisali, lonwa loya eneyal’emi lacin’enino lakina, yengoko kuma Masiya anunolame en’etem’enino.

²⁰Lalanga lacin’eho njale l’ino isanga, ko ncikitanya efodya enami; lacin’oka lakandakanda bike lacin’enino.

²¹In’analang’oka boyalame ena lifoka lina basangya, bonsumole, bofoke basangya?

²²Lacina yoilimotengama, noka, Abalayama ayaaki’ale l’an’afe bana mpame, on’omoi aotwaki la nyango ena boombo, ko okina la nyango enetayala boombo.

²³Koko ende onotwaki la boombo, aotwaki l’okotua bona yonge; ohonde onotwaki la nyango enetayala boombo, aotwaki lacin’en’esemba.

²⁴Baoyi’ane bayali yoka ekolanya: bayato’ane bafe bayali nko biteelo bin’asangya bife; emoi ena lingonji lina Sinai, enota bana ena yombo, Angala nd’eho.

²⁵Lacina Angala one ayali nko lingonji lina Sinai linaliyali ena Alaba, ko yakolana la Yelusalema eneyali bisik’ine: ende ayali nk’ena yombo, ende l’an’anande.

²⁶Ohonde Yelusalema eneyali ena liko efayali ena yombo, ntango eniso nd’eho.

²⁷Lacina yoi limotengama, ate, E, ekomba onofote bana, nyangaka, E; onofatate la lonwa, fudya lofoso l’ekiko, ko loluaka; Lacina ban’an’onjemba bamoleka ban’anande onoyali l’ome nko ndeka.

²⁸Koko iso, bifili, toyali ban’an’esemba, yok’onoki Isaka oyalaka.

²⁹Koko en’esik’eho ende onotwaki l’okotua bona yonge anyomak’ende onotwaki l’okotua bona Bolimo; nk’osamb’oho isanga.

³⁰Koko Bokanda bona Yakomba bila, ate oya? Ate, Fodya boyoto’ona boombo ko l’on’onande; lacin’oka bon’ona boombo afasangolaki lisango ende l’on’on’oyoto onotayala boombo.

³¹Lacin’eho, bifili, iso tofayali ban’an’oyoto bona boombo: toyali bana ban’oyoto onotayala boombo.