Read ngando Ba-Ngalatia 5 Bible Online

Ba-Ngalatia 5 - ngando bible

Ba-Ngalatia 5

¹Masiya atotungolaki l’etungwelo mene: lacin’eho, bemalaka la locili, ko botatungamake lakina l’efoke ena yombo.

²Noka, emi Paulo lakosumol’ino, emite yombo bokesama yonge, Masiya afakoatel’ino nkita.

³Lakina emi lasumola boto l’oto onokesama yonge, emite ayali l’osilo bon’asangya lacin’eho aile baho bahatu.

⁴In’analanga lacina boyengwa l’asangya, bomoelana ino la Masiya nko njelana, bomuma en’isei.

⁵Lacin’iso tolengedya la Bolimo ko l’imeedyo nko ndengedya enengi mbongi oilama.

⁶Lacina eneyali Masiya nkesa ena yonge efan’ekambwa, ko biinda bona nkesa ena yonge bofan’ekambwa: imeedyo ineyakambe la nganji, ekambwa nd’iho.

⁷Ino bokendaki’oso bolotsi: onokosimbyak’ino lacina bofimedya solosolo eho la mpika oka nai?

⁸Njimedya ene efaye eneyal’ende onokeelelak’ino.

⁹Imbu ina nyango ena mampa yofudya bomaka bohotu bona mampa.

¹⁰Emi limedya eneyali Nkolo lacin’enino, emite, bofaataki lokanyi lomoi; koko boto’oho on’etaketaka onokolidy’ino angotola bolito bona ekoiyelo enande ena likambo.

¹¹Koko emi, bifili, yombo emi lakusa lisekodya lilako lina nkesa ena yonge, iya, lanyomama nko l’isanga lacina nai? Yok’oho ekumbelo en’ekulusu emoyala nko bototoloto.

¹²Nsokolanga lacina iy’anakotatengy’ino bayokes’iyoamene nko pa.

¹³Lacin’oka, bifili, ino belelamaki iacin’eho botungwa; koko botalangake’oka etungwelo eho eyalame etelo ena yonge bosaelana la nganji enokan’ino.

¹⁴Lacin’oka basangya bahatu bailama la yoi line limoko, ate, Oka onoli l’e nganji yoka bosambo bona yook’e eamene nganji.

¹⁵Koko yombo bokunana, ko bolana l’okambakamba, boongya lilenda, botongokadyana.

¹⁶Koko lila, emite, bokenda la Bolimo, ko yok’oho bofilaki mposa ena yonge tu.

¹⁷Lacina mposa ina yonge yafomana la Bolimo, ko mposa ina Bolimo yafomana la yonge; lacina mposa ina bah’afe yofekyana, botongoyila baoyi banalang’inoamene.

¹⁸Koko yombo Bolimo ayalonde en’oso’onino, bofayali ena lifoka lina basangya.

¹⁹Koko bikambwa bina yonge bienya fololo, bika lisamba, la nsefo, la likele,

²⁰l’ekumedyo ena baidola, l’aoyi ban’okanga, la njoka en’owe, la lisa, l’ekuku, la nkele, la ntango, la mbatana, la beloi nkambwana,

²¹koko la bikuku, la njaka en’ato, la ndangwa l’aana, la loyenge, ko la baoyi’amoi ban’okotu’oho: lakosumol’ino isanga yok’onoki’m’okosumolak’oso, emite, bato banakamba baoyi’aho bafasangolaki lifoka lina loola tu.

²²Koko bemamo bena Bolimo beyali nko nganji ena lolango, l’ekiko, la mwi, l’isei ina locinji, l’isei mene, la bongompolu, l’imeedyo,

²³la njofima, la mpekya ena mposa: efana boeka bonakolana lisimba baoyi ban’okotu’oho.

²⁴Koko iy’anayali bana Masiya Yesu bamosila liaka yonge en’ekulusu, ko la ndanga ko la mposa ina liho.

²⁵Yombo toyaike la Bolimo, ekoli lacina tokende la Bolimo nkoho.

²⁶Totayofefake, totanyomanake, ko totaokanake ekuku.