Read ngando Ba-Efeso 1 Bible Online

Ba-Efeso 1 - ngando bible

Ba-Efeso 1

¹Paulo, ekima ena Masiya Yesu l’eango ena Yakomba, eneyali ban’oeka banayali ena Efeso, ko l’iy’animedya banayali eneyali Masiya Yesu:

²Isei la mwi eneyal’ino eneyali Yakomba Bafango’oniso ko la Nkolo Yesu Masiya.

³Lokumo eneyali Yakomba, Bafango’ona Nkolo eniso Yesu Masiya, onotosakelaki besako behetu ben’olimo en’ekala bena loola eneyali Masiya;

⁴yoka bosamb’onoki’nd’otosonaka eneyal’ende en’oso bon’enunwelo ene loko, lacin’eho toyalame bato ban’oeka banafana lianda en’oso’onande ena nganji ena lolango.

⁵Atosonaki en’oso lacin’eho atil’iso yoka bana mene eneyal’endamene la Yesu Masiya, bosambo bonimedy’ende bolotsi l’eango enande,

⁶lacin’ena lokumo lona bolotsi bon’isei inande iniki’nd’otookaka eneyal’ende onolangama.

⁷Iso toata ikwelo eniso lacin’en’akila’anande, nk’etungwelo en’aoyi’owe’aniso, yok’osamb’onoyali lituka lin’isei inande,

⁸iniki’nd’otofuedyaka ena bomwu bohotu ko la nnonganya;

⁹aotononganyedya bofisa bon’eango enande, yoka bosamb’onoyali lisangya linatang’ende bolotsi liniki’nd’oyalamaka la liho eneyal’ende,

¹⁰nko lacin’eho en’ekambelo en’efulelo ena bisike, aambanya baoyi bahatu eneyali Masiya, le baoyi banayali ena loola, le baoyi banayali ena loko; nk’eneyal’ende,

¹¹onok’is’oilamaka lisango eneyal’ende, lacin’oka tosonamaki’oso, yoka bosamb’onoki lisangya linande oyalaka onokamba bikambwa bihitu l’eango enanga lokanyi lon’otem’onande,

¹²lacin’eho is’analengedyaki eneyali Masiya en’oso, toyalame yoka lokumo lon’okonde’onande.

¹³Koko eneyal’ende, ino nkoho, enek’in’ookaka yoi lina solosolo nko bosimo bon’olotsi bona liiko lonino— nk’eneyal’ende, enek’in’oimedyaka, boakamaki ndembi, nko Bolimo bon’olotsi bon’esemba,

¹⁴boho boyali nk’eyoka mbandwa ena lisango liniso yengoko ikwelo ena bato banaki Yakomba mene osombaka, lacin’ena lokumo lon’okonde’onande.

¹⁵Lacin’eho, emi nkoho, eneki’m’ookaka imeedyo inimedy’ino Nkolo Yesu, ko la nganji enokamel’ino ban’oeka bahatu,

¹⁶mpedya likanga Yakomba lokango lacin’enino, ko lakoand’ino ena beondo’enami;

¹⁷lacin’eho Yakomba ena Nkolo eniso Yesu Masiya, Bafango’on’okonde, akof’ino bolimo bona bomwu l’on’etumelo nk’ena njeya eney’ino ende,

¹⁸ko baiso ban’etem’enino balifolame lacin’eho beye bokotua bona lolendedyo lona leele lonande, ko la lituka lin’okonde bona lisango linande liniyali eneyali ban’oeka;

¹⁹ko la mpula eneleki nko ndeka ena mpamba enande eneyali is’animedya, yoka bosamb’onakamba ekambelo eho ena locili lona mpamba enande

²⁰eneki’nd’okambaka eneyali Masiya, eneki’nd’oetolak’ende enek’anawaki, ko aofaki ekisel’ase en’ili bona likasa linande y’ome ena bekala bena loola,

²¹bosana mene ena liko y’afoka bahatu, ko la mpifo ehatu, ko la mpamba ehatu, ko la banyangetuke bahatu, ko la baina bahatu banandama, ef’en’esik’ene kei, koko en’esike enengoya linga;

²²ko amila bikambwa bihitu en’ase bana bakak’anande, ko amil’ende bote mene en’ekelesia ena liko ya baoyi bahatu,

²³ekelesia eho eyali nko yonge linande, mpula enande onofula en’aoyi bahatu eneyali bahatu.