Read ngando Ba-Efeso 3 Bible Online

Ba-Efeso 3 - ngando bible

Ba-Efeso 3

¹Lacin’eho, emi Paulo, lisungu lina Masiya Yesu lacin’enino Befenda—

²yombo bokaki yoi lin’eka-mbelo en’isei ina Yakomba enefamaki eneyal’emi lacin’enino;

³yoka bosamb’onoki baoyi ban’ofisa otumamaka eneyal’emi l’enelo, yok’onoki’m’otengak’oso l’aoyi banataat’ike,

⁴ko enand’ino baoyi’aho bongokolana linonganya njeya enami en’ofisa bona Masiya.

⁵Yoi liho lin’ofisa litatumama eneyali bana ban’ato bana biotwelo bin’oso’ale yoka bosambo bonatumama boho isanga eneyali bikima ko l’asumoli’anande ban’oeka ena Bolimo;

⁶yoi liho lika: iso la Befenda toyali basangoli, ko iso l’iyo toyali bilama bina yonge limoko, ko iso l’iyo toyali la baondo ban’esemba enande eneyali Masiya Yesu lacin’en’osimo bon’olotsi,

⁷nk’osimo’oho bonoki’m’oilamaka bokambi bona boho, lacin’ena nganji en’isei iho ina Yakomba enefamaki eneyal’emi, bosamb’onoyali ekambelo ena mpamba enande.

⁸Isei ine ifamaki eneyal’emi onoleki ban’oeka bahatu l’isalisali, lacina nsumole Befenda bosimo bona lituka lina Masiya linifanonganyama;

⁹ko lacin’eho mpoladya bato ba-hatu, baene bokotua bon’ekambelo ena yoi lin’ofisa linalifisamaki’ale bisike bihitu nk’eneyali Yakomba, ononunolaki bikambwa bihitu;

¹⁰lacin’eho biomwu bina Yakomba bina bekotua l’ekotua bieyane eneyali bafoka ko la bamene mpamba banayali ena bekala bena loola, bieyane nko l’ekelesia,

¹¹bosamb’onoyali lisangya lina bisike la bisike liniki’nd’oyalamaka la liho eneyali Masiya Yesu Nkolo eniso;

¹²eneyal’ende toata nkaso ko toyali l’etuelo l’ekikedyo en’otema lacin’en’imeedyo inimedy’iso ende.

¹³Lacin’eho, lakoond’ino, botalembwake lacin’ena bino binen’emi lacin’enino, biho biyali nko lokumo lonino.

¹⁴La ncin’ene, emi luna baongo’anami en’oso bona Bafango,

¹⁵(ecimo l’ecimo eneyali ena loola l’eneyali ena loko eotangama lina nk’eneyal’ende),

¹⁶lacina akof’ino etelo lacina bokikyame la mpamba la Bolimo’onande en’otema, bosamb’onoyali lituka lina bokonde’onande;

¹⁷lacin’eho Masiya atonge litonga en’etem’enino l’imeedyo; lacin’eho, enakam’ino yoka beluo ben’ote, ko bocidyama ena nganji ena lolango,

¹⁸bokolane linonganya, ino la ban’oeka bahatu, bokotua bon’okolo l’otali la lisango la lingunda,

¹⁹ko beye nganji enefeyana enatooka Masiya, lacina bolole la mpula ehatu ena Yakomba.

²⁰Isanga eneyal’ende onokolana yilisa baoyi banaleki baho bahatu banufol’iso ko la banakanel’iso nko ndeka mene, lacin’ena mpamba eneyakambe en’etem’eniso,

²¹lokumo loyalamake nk’eneyal’ende ko la Masiya Yesu yengoko biotwelo bihitu bina bisike la bisike. Ndoho.