Read ngando Ba-Efeso 4 Bible Online

Ba-Efeso 4 - ngando bible

Ba-Efeso 4

¹Lacin’eho, emi lisungu lina Nkolo, lakoond’ino lacin’eho bokende l’ekendelo enakolana la leele lonok’in’oelelamaka,

²la njosonja ena lokanyi, la bongompolu ko l’isei ina locinji; botalemwanake: bikyana nko la nganji en’otema;

³bofona la mposa mene lacin’eho bomonya eambanyedyo ena Bolimo en’embanelo ena mwi.

⁴Yonge liyali nko limoko, ko Bolimo bomoko, yoka bosamb’onok’in’oelelamaka la lolendedyo lomoko;

⁵Nkolo emoko, l’imeedyo imoko, l’inelo nk’emoko;

⁶Yakomba nk’emoko, Bafango’ona bahatu, onoyali ena liko ya bahatu, ko akamba eneyali bahatu, ko ayali eneyali bahatu.

⁷Koko isei ifamaki eneyali boto l’oto’oniso, ko imeledyama la lelelo lona nganji ena Masiya.

⁸Lacin’eho, amila, ate, Eneki’nd’oilelaka ena liko atolaki yombo en’onyolo, Ko afaki bato nganji.

⁹(Koko yoi line, Ailelaki, lika nai? Ef’ende lacin’oka akitaki’oso ena bitenyi biniyali en’ase bana loko?

¹⁰Ende onokitaki ayali nk’ende onilelaki bosana ena liko lina loola lohalotu, lacin’eho alodya bikambwa bihitu nko to l’endamene.)

¹¹Ko afaki bamoi etelo lacina bayalame bikima; bamoi bafolali ban’aoyi bana Yakomba; ko bamoi basumoli ban’osimo bon’olotsi; ko bamoi batombanyi la balaki;

¹²lacin’ena mbongya ena ban’oeka nko mbonga, ko lacin’en’ekambwa en’ekambelo enande, ko lacin’en’ekikedyo ena yonge lina Masiya;

¹³yengoko isatu toyela en’eambanelo en’imeedyo, ko l’en’eambanelo ena nnonganya ena Bon’ona Yakomba, yengoko toyalama nk’eyoka bingambe bina locili, ko la lelelo lon’esokwelo en’efuelo ena Masiya;

¹⁴lacina tofayalame lakina bikeke, banalidyama bili l’ili ko baotolama la tofongofongo tohatotu tona lilako, la nkotodya en’ato, la longo, bosamb’onatembody’iyo bato la mpoci;

¹⁵ohonde la nkamba ena solosolo la nganji ena lolango, tofulake en’aoyi bahatu eneyal’ende onoyali bote, nko Masiya;

¹⁶yonge lihalitu yambana ko yoongana eneyal’ende l’ekikedyo enofa eyongamelo l’eyongamelo, yoka bosamb’onakamba elama l’elama la lelelo lonakolana l’eho, ko l’okotu’oho yonge yofula lacin’eho licile lihoamene ena nganji ena lolango.

¹⁷Lacin’eho, lila yoi line, ko latenda ena lina lina Nkolo, emite, Botakendake lakina l’okotua bonakenda Befenda ena njengodya ena nkanyi iniyo;

¹⁸iyo bayali la bilima ena nkanyi iniyo, ko bamoelana la liiko lona Yakomba lacin’ena biinda boniyo bona nnonganya, ko lacin’ena bocilingitano bon’etem’eniyo.

¹⁹Bamumola nsoi, ko bayocind’iyoamene ena baoyi bana mposa inifafekyame, lacina bakambe bikambwa bina nsefo bihitu la mposa mene.

²⁰Koko ino botalakama la Masiya yok’osamb’oho,

²¹yombo bokak’ende, ko bolakamaki l’ende, bosamb’onoyali solosolo eho eneyali eneyali Yesu;

²²lacina bumole bokotua bonoki’oso, nko boto onoki’oso’ale onoyeha la mposa bike ina mpoci;

²³ko bonunolame lakina en’olimo bona lokanyi lonino;

²⁴ko bolote boto’on’ototo ononunolama ena mbongi l’ena bolotsi bona solosolo, yoka bosamb’onoyali Yakomba.

²⁵Lacin’eho, bumola baoyi bana mpoci, ko boto l’oto atende baoyi bana solosolo l’oto onoli l’ende; lacin’oka isatu tambana yoka bilama bina yonge limoko.

²⁶Yombo boka nkele, botilake bowe: botalangake bina bile kuma nkele enino etakale;

²⁷botafake Satana etelo.

²⁸Ende oniyaki, atiyake lakina: bolotsi akambe ekambwa, asale bosala bon’olotsi l’akas’anande, lacin’eho aate toma tonatongi’nd’ofa boto onelingitana.

²⁹Botimedyake yoi lina nsefo lifole en’enyu’enino, ohonde yoi lin’olotsi lineyakiky’ato bosambo bonind’iyo, lacin’eho liatel’iy’anoka liho isei.

³⁰Botokyake Bolimo bon’olotsi bona Yakomba lokeseli, bonok’in’oakamaka ndembi yengoko bina bona ikwelo.

³¹Baoyi bana njoka en’owe, la nkele, l’olema, la bitomoko la besao baumake eneyal’ino, ko la bongeno bohotu;

³²ko boongya lilangana la lolango, bookan’isei en’etema, bikyana baoyi ban’owe, yoka bosamb’onoki Yakomba okiikyak’ino en’aoyi’owe eneyali Masiya.