Read ngando Ba-Efeso 5 Bible Online

Ba-Efeso 5 - ngando bible

Ba-Efeso 5

¹Lacin’eho, bookolaka bokotua bona Yakomba, yoka bana banalangama;

²ko bokendaka la nganji, yoka bosamb’onoki Masiya okokak’ino nganji, ko ayolekyak’endamene lacin’eniso nganji ena ndekya ko la mbeka eneyali Yakomba lacin’eho iyalame mpimbo en’olotsi.

³Nk’eyoka bosambo bonakolana la ban’oeka, botimedyake lisamba, la nsefo ehatu, la mposa eneleki baandama eneyal’ino tu,

⁴la baoyi bana nsoi, la baoyi bana bokoko, la baoyi bana nsisedya: baoyi’aho bafaonge; ohonde ekoli lacina bokange Yakomba lokango.

⁵Lacin’oka beya yoi line la solosolo mene, noka, boto’ona lisamba, la boto’ona nsefo, la boto onoka mposa ena toma eneleki, onoyali bokumi bona baidola, afasangolaki lisango ena lifoka lina Masiya la Yakomba.

⁶Botimedyake boto akofot’ino la baoyi banafana ncina; lacin’oka nkele ena Yakomba eoya eneyali ban’ana lopoko lacin’ena baoyi’ane.

⁷Lacin’eho, botambanake l’iyo en’aoyi’aho;

⁸lacin’oka boyaaki’oso bilima, koko isanga boyali nko fololo eneyali Nkolo: bokendaka yoka ban’ana fololo

⁹(lacin’oka bemamo bena fololo benya ena bolotsi bohotu ko la mbongi ko la solosolo),

¹⁰boongya linonganya baoyi banimedya Nkolo bolotsi.

¹¹Botambanake ena bikambwa bina bilima binifote bemamo: bosimbaka bikambwa biho;

¹²lacin’oka baoyi banakamb’iyo ena lokuko bande nsoi, bafakolana litangama la baina.

¹³Koko baoyi bahatu baofiswa eneyamekame baho la fololo, lacina yoi la yoi lineyenya liyali nko fololo.

¹⁴Lacin’eho, aila, ate, E oneci en’ilo, etwaka, ko emala enek’anawaki, ko Masiya angololoma eneyal’e.

¹⁵Lacin’eho, boongya lilenda bokotua bonakend’ino, efa yoka bato baninda bomwu, ohonde yoka bato banayali l’omwu.

¹⁶Biikolaka bietelo, lacin’oka bina beyali nko ben’owe.

¹⁷La ncin’ene botayalamake tolemeleme, koko boongya linonganya eango ena Nkolo.

¹⁸Ko botalangwake la vina: bokotu’oho boseki loyenge; ohonde boongya lilola la Bolimo to.

¹⁹Botendanaka la njembo, la njembo ina lokumo, ko la njembo in’olimo, bemba ko bokumya Nkolo en’etem’enino;

²⁰bokanga Yakomba, nko Bafango, lokango bina l’ina, lacin’ena baoyi bahatu, ena lina lina Nkolo eniso Yesu Masiya;

²¹ko inoamene bofikana ena mbanga ena Masiya.

²²Ino baali, bofika baome’anino, yok’eneyali Nkolo.

²³Lacin’oka bome ayali bote bon’ooli, yoka bosamb’onoyali Masiya bote bon’ekelesia, endamene ayali boiki bona yonge.

²⁴Koko yoka bosambo bonafika ekelesia Masiya, akoli eneyali baali bafike baome’aniyo en’aoyi bahatu nkoho.

²⁵Ino boame, bokaka baali’anino nganji, yoka bosamb’onoki Masiya ookaka ekelesia nganji, ko ayolekyak’endamene lacin’ena ekelesia eho;

²⁶lacin’eho aeky’eho en’oeka, eneki’nd’okulak’eho la Yoi en’esongelo en’asi;

²⁷lacina ayof’endamene ekelesia en’okoka, enefana lianda, enefana yunda, ko enefana yoi limoi linakolana la baoyi’aho; ohonde lacina eyalame ekelesia en’oeka enefana lianda.

²⁸Nk’osamb’oho, akoli eneyali baome baoke baali’aniyoamene nganji yoka bosamb’onok’iyo baonge’aniyoamene nganji. Ende onoka booli’onandamene nganji ayook’endamene nganji;

²⁹lacin’oka boto afakile yonge linandamene: aleya liho toma, ko atombanya liho, yoka bosamb’onila Masiya l’ekelesia;

³⁰lacin iso toyali bilama bina yonge linande.

³¹La ncin’ene boto angocika bafango la nyango enande, ko angambana nko l’ooli’onande; ko iy’afe bangoyala nko yonge limoko.

³²Yoi line lin’ofisa liseki’okolo; koko latenda lacin’ena Masiya ko l’ekelesia.

³³Koko ino nkoho, boto l’oto aokake booli’onande nganji yoka bosambo bonayook’ende endamene nganji; ko akoli eneyali booli aange bome’onande.