Read ngando Ba-Efeso 6 Bible Online

Ba-Efeso 6 - ngando bible

Ba-Efeso 6

¹Bana, boongya lifika bafango la banyango’anino eneyali Nkolo, lacina yoi line likoli nko nkolana.

²Kumya bafango’one la nyango ene (line nko lisangya lin’oso liniyali l’esemba),

³lacin’eho oyalame nko l’olotsi, ko okinde elela ena loko.

⁴Ko ino bafango, botanyomake ban’anino lacina baoke nkele; ohonde baolole nko njolola la lilako lina nsisodya ko la lilako lina Nkolo.

⁵Ino baombo, boongya lifika iy’anayali banyangetuke banino bana yonge, la losomo ko la mbilima, ko l’otema bona solosolo, nk’eyoka bosaela Masiya;

⁶efa yoka banasala en’aiso’aniyo kei, yoka banafona lokumo lon’ato: bosalaka yoka baombo bana Masiya, kuma boyile eango ena Yakomba en’etema;

⁷bokambaka la ndanga mene yoka banakambela Nkolo, ef’ato;

⁸lacin’ino bey’oka ekambwa en’olotsi en’etaketaka enakamb’oto, angotamba nk’osamb’oho lakina eneyali Nkolo, kang’ayali boombo, kang’afayali boombo.

⁹Ko ino banyangetuke, bailel’iyo nko baoyi’aho, ko bocika yaana njana, lacin’ino bey’oka Nkolo enino l’iyo ayali ena loola, ko ende afoke boto likai tu.

¹⁰Yoi lin’esimbelo: boongya likika eneyali Nkolo la locili lona mpamba enande.

¹¹Bolotaka bekoto ben’ita ko la bimunyi bin’ita bina Yakomba bihitu, lacin’eho bokolane yemalisa, ko bosimba baoyi bana longo bana Satana.

¹²Lacin’oka tofokane bita l’onufo ko l’akila: tokan’ita la bafoka ko la bamene mpamba, ko la bafoka bana loko bana bilima bone, tokana la beloi ben’elimo ben’owe beneyali en’ekala bena loola.

¹³Lacin’eho, bambola bekoto ko la bimunyi bin’ita bina Yakomba bihitu, lacin’eho bokolane yemalisa en’ina bon’owe, ko eneng’in’okadya bahatu, bokusa yemala.

¹⁴Bemalaka, ko bokakelaka litenaka linino la solosolo, ko bolota ena lingongo nko ngua ena mbongi,

¹⁵ko bolota en’akak’anino bikoto bina nkolanya en’osimo bon’olotsi bona mwi;

¹⁶ko boongya yambola ngua en’imeedyo, eneng’in’okolana lilunga l’eho belehe bena nkoi behetu benande On’owe.

¹⁷Ko botamba likuka lin’ote lina liiko, ko la lokula lon’ita lona Bolimo, lonoyali nko yoi lina Yakomba;

¹⁸ko boondaka bisike bihitu la boondo bohotu ko la lolombo, boonda en’olimo, ko botombanya en’oondo la locinji lohalotu ko la lolombo lacin’ena ban’oeka bahatu,

¹⁹ko lacin’enami, lacina etendelo efame eneyal’emi enamumol’emi bonyua bonami, lacin’eho nsekodya la nkaso yoi lin’ofisa lin’osimo bon’olotsi.

²⁰Emi nk’ekima onotungi en’enyolo lacin’en’osimo’oho: boondaka lacin’eho nsumole bosimo’oho la nkaso, nk’okotua bonakolana l’emi lacina ntende.

²¹Koko Tukiko, efili onolangama la bokambi eneyali Nkolo bona solosolo, angokosumol’ino baoyi bahatu lacin’eho beye baoyi’anami ko l’okotua bonoyal’emi;

²²emi molotoma eneyal’ino nko la ncin’ene, lacina beye bokotua bonoyal’iso, ko lacina akokikedya betem’enino.

²³Mwi eneyali bifili, la nganji ko l’imeedyo eneyali Yakomba Bafango ko la Nkolo Yesu Masiya.

²⁴Isei iyalamake eneyali iyatu banoka Nkolo eniso Yesu Masiya nganji enefakale tu. Ndoho.