Read ngando Ba-Filipoi 1 Bible Online

Ba-Filipoi 1 - ngando bible

Ba-Filipoi 1

¹Paulo la Timoteo, baombo bana Yesu Masiya, eneyali ban’oeka bahatu banayali eneyali Masiya Yesu ena Filipoi, l’eneyali bingambe ko la ba-diakono:

²Isei eneyal’ino la mwi eneyali Yakomba Bafango’oniso la Nkolo Yesu Masiya.

³Lakanga Yakomba enami lokango bina l’ina enakokanedy’emi;

⁴bisike bihitu, en’oondo l’oondo bonakoondel’emi inatu, loanda nko l’enyanga,

⁵lacin’oka ino bambanaki l’emi ena nsekodya en’osimo bon’olotsi en’ina bon’oso yengoko esik’ene.

⁶Emi mpaate yoi line ntango, emite, ende onomatsaki ekambwa en’olotsi eneyal’ino angokolany’eho nko nkolana yengoko bin’oho bona Yesu Masiya.

⁷Ko akoli eneyal’emi nkanele yok’oho lacin’en’inatu; lacin’oka ino boyali ena lokanyi lon’otem’onami: kang’en’onyolo’onami, kang’en’oloko bonalokol’emi lacin’en’osimo bon’olotsi ko l’ekikedyo ena boho, inatu boyali l’aondo l’emi en’isei.

⁸Lacina Yakomba ayali temoin enami ena bokotua bonakook’emi inatu mposa la tosei tona Yesu Masiya tonatoleki.

⁹Ko laonda Yakomba yok’osamb’one, emite nganji enino ena lolango efulake la mpula eneleki ena nnonganya l’ena mpokola ehatu;

¹⁰lacin’eho bofokole baoyi banaseki’olotsi; lacina boyalame bato bana soto banafana ekumbelo yengoko bin’oho bona Masiya;

¹¹ko bolodyame la bemamo bena mbongi benatama la Yesu Masiya, lacin’ena bokonde ko la lokumo lona Yakomba.

¹²Koko lakina, bifili, lalanga lacina ino bey’oka baoyi banilamaki eneyal’emi bamoyalama nk’ekikedyo en’ekambwa en’osimo bon’olotsi;

¹³ko yok’oho benyolo benami lacin’ena Masiya bemenya fololo eneyali boloi bohotu bona soldats, ko l’eneyali bato’amoi bahatu;

¹⁴ko bike bonoleki bona bifili biniyali eneyali Nkolo bomokika locili lacin’ena benyolo benami, ko bamoyala la nkaso mene eneleki lacin’eho batende yoi lina Yakomba efan’ofolu.

¹⁵Solosolo bato’amoi basekodya yoi lina Masiya l’okotua bon’ekuku l’ona ntango; ko bakina bamokumya la ndanga en’olotsi:

¹⁶banebamokumya la nganji ena lolango, lacin’iyo bamey’oka emi milama lacin’eho ndokole beloko lacin’en’osimo bon’olotsi;

¹⁷koko banyi basekodya yoi lina Masiya la ntango, efa l’otema bonakolana, lacin’iyo bakanel’oka bambatel’emi bino binileki en’enyolo’enami.

¹⁸Iya nai? Nko la bekotua behetu, kanga la mpoci, kanga la solosolo, Masiya aosekodyama; ko emi lanyangela yoi liho, o, ko nongonyangela liho.

¹⁹Lacin’emi ley’oka yoi line lingombatel’emi etungwelo lacin’ena beondo’enino ko l’ekokedyo ena Bolimo bona Yesu Masiya,

²⁰yoka bosamb’onoyali lolendedyo lonami lonalendedy’emi la mposa ko la njimedya enami, emite mpokaki nsoi ena yoi limoko tu, ohonde yok’onoki’oso ena bisike bihitu l’en’esik’ene nkoho, Masiya angokumyama la nkaso ehatu ena yonge linami, kanga la mbika, kanga la mbwaka.

²¹Lacin’oka eneyal’emi mbika eyali nko Masiya, ko mbwaka eyali nko nkita.

²²Koko yombo mbika ena yonge—yombo eikelo eho eyali nko bemamo ben’osal’onami, mpeye yoi linalingi’m’osona.

²³Koko lakandakanda en’atenyi’a baoyi bah’afe: loka mposa mene lacin’eho njume, ko njale la Masiya: yoi liho lileki bolotsi nko ndeka mene;

²⁴koko lakina, yoi linalileki bolotsi lacin’enino nko lacin’eho nkuse liyala ena yonge.

²⁵Emi molata njimedya ene, ko ley’oka nongoyala, ko nongokusa liyala l’inatu, lacin’ena efuelo enino ko l’ekiko enino en’imeedyo iho;

²⁶lacin’eho lokumo lonakumy’ino lofule eneyali Masiya Yesu lacin’enami, la ncina enengi’m’oyala l’ino lakina.

²⁷Koko ekoli lacina bikambwa binakamb’ino bikolane l’okotua bon’osimo bon’olotsi; lacin’eho, kanga loya oyokeen’ino, kang’emi mpaye, njoke baoyi’anino mbo ino bemali la locili ena bolimo’omoko, ko bocoa en’ita la lokanyi lomoko lacin’en’imeedyo ina bosimo’on’olotsi;

²⁸ko bofoke basimbi’anino losomo tu: bokotu’oho bonde ndembi ena fololo en’eehedyo eneyal’iyo, ohonde ndembi ena liiko eneyal’ino, ko ndembi eho eoya nk’eneyali Yakomba;

²⁹lacin’oka etelo emofama eneyal’ino lacin’ena Masiya, efa lacina bimedy’ende kei, ohonde lacina benel’ende bino nkoho;

³⁰ko ino boyali ena bino biho binik’in’oenaka eneyal’emi, ko binok’ino isanga biho biyali eneyal’emi.