Read ngando Ba-Filipoi 2 Bible Online

Ba-Filipoi 2 - ngando bible

Ba-Filipoi 2

¹Lacin’eho, yombo ekikedyo eyali eneyali Masiya, yombo ncicimodya la nganji ena lolango eyali, yomb’ea mbanelo ena Bolimo eyali, yombo botema bon’isei boyali, yombo tosei toyali,

²bonkokedya ekiko enami, noka, bokanelaka nko yoi limoko, boyalamaka la nganji eh’emoko ena lolango, la botem’omoko ko la lokanyi lomoko;

³botilake yoi limoko la ntango ko la njofefa, ohonde la njofima, kuma boto l’oto akumya ban’amoi ate balek’endamene bolotsi;

⁴ko boto l’oto’onino atakanelake baoyi’anandamene kei: akanelake baoyi ban’ato’akina nkoho.

⁵Ekoli lacina lokanyi lone loneloyaaki eneyali Masiya Yesu loyalame eneyal’ino nkoho:

⁶ende onoyaaki l’okotua mene bona Yakomba, atakanela yoi liho linayal’ende la Yakomba kocu yoi line mbundamela;

⁷koko ende aumolaki bokonde bonande, ko atambaki bokotua bona boombo, ko ayalamaki en’ekolanya en’oto;

⁸ko eneki’nd’oenyaka nk’eyoka boto, ayofimaki, ko aimedyaki nko njimedya yengoko bewedi mene, nk’ewedi ben’ekulusu mene.

⁹Lacin’eho, Yakomba aoiledyaki njiledya mene, ko aofaki lina linalileki baina bahatu;

¹⁰lacin’eho ena lina lina Yesu baongo bahatu banayali ena loola l’anayali ena loko, l’anayali en’ase bana loko, bauname,

¹¹ko ndemi ihatu imedy’oka Yesu Masiya ayali Nkolo, lacin’en’ekumedyo ena Yakomba Bafango.

¹²Lacin’eho, in’analangama l’emi, yok’onok’in’oimedyaka ntomo bisike bihitu, efa nk’eyoka en’aiso’anami kei, ohonde isanga l’ekambelo eneleki enefan’emi l’ino, boongya likamb’ekambwa ena liiko loninoamene la mbanga ko la mbilima;

¹³lacin’oka Yakomba kongoakamba ekambwa eneyal’ino la njanga en’eango ko la nkambwa en’ekambwa, nko lacin’en’eango enimedy’ende bolotsi.

¹⁴Bokambaka baoyi bahatu efana beningoningo ko efana ntango;

¹⁵lacin’eho biinde likambo lina lofeli, ko boyalame soto, ban’ana Yakomba banafana bolema ena ntoto en’eotwelo en’ato enefana cilili ko l’ena bocilingitano, lacin’ino benya ena ntoto eniyo nk’eyoka miinda ena loko;

¹⁶ko boyasuke yoi lina liiko; lacin’eho mbate ncina ena lokumo lonelongi’m’okumya en’ina bona Masiya, lacin’oka ntakenda bototoloto, ko ntakamb’ekambwa bototoloto.

¹⁷O, ko kang’emi ndekyame mbeka lacin’en’ekambwa en’imee dyo inino, lakik’ekiko, ko lanyangela l’inatu;

¹⁸ko ino bokik’ekiko nk’osamb’oho, ko bonyangela l’emi.

¹⁹Koko lalengedya eneyali Nkolo Yesu, emite ntome Timoteo eneyal’ino efan’olingolingo, lacin’eho nkikyame enengi’m’oeya bokotua bonoyal’ino.

²⁰Lacin’emi mpana boto’okina onosangi l’ende ena lokanyi, onongokanela baoyi’anino la solosolo.

²¹Lacin’iyatu bayafone baoyi baniyoamene, efa baoyi bana Yesu Masiya.

²²Koko ino beya lomeko lonoki’nd’omekamaka, nk’eyoka bosamb’onasaela bona bafango, ende asalaki l’emi ena nsekodya en’osimo bon’olotsi.

²³Lacin’eho, njali la lisangya oyotom’ende isasanga, enengi’m’oena bokotua bonil’iyo ena likambo linami;

²⁴koko njali la lokanyi eneyali Nkolo, emite efan’olingolingo emamene nongoya nk’osamb’oho.

²⁵Koko nkanelaki, emite ekoli lacina nkotomel’ino Epafulodito, efili enami onambana l’emi en’osala ko l’en’ekambwa ena soldat, ende ayali ekima enino ko la bokambi ena biinda bonind’emi;

²⁶lacin’oka akookak’inatu mposa mene, ko aokaki lokeseli mene lacina enek’in’ookak’oka ayaaki la nkangi.

²⁷Ayaaki la nkangi mene nko solosolo, nko mbolama l’ewedi; koko Yakomba amookamel’isei; ko ef’ende kei: aonjokamel’emi nkoho, ntongoyata nkeseli ena liko ya nkeseli.

²⁸Lacin’eho, molotoma la mposa eneleki, lacina, eneng’in’oen’ende lakina, bonyangele, ko lokeseli lonami lokokodyame isisali.

²⁹Lacin’eho, botambe eneyali Nkolo l’enyanga ehatu; ko bokumya bato banasangi l’ende bokotua;

³⁰lacin’oka aolamaki l’ewedi lacin’en’osala bona Masiya, ko ailaki nko le liiko lonande ena lilila lin’ewedi lacina akoky’eho enindaki en’ekambedyo enek’in’onkambyak’emi.