Read ngando Ba-Filipoi 4 Bible Online

Ba-Filipoi 4 - ngando bible

Ba-Filipoi 4

¹Lacin’eho, bifili binami banalangama l’emi ko banok’emi mposa, ekiko enami la likuka linami lin’elonga, bemalaka la locili eneyali Nkolo yok’osamb’oho, in’analangama.

²Laonda Ewodia ko laonda Suntuke, bayalame la lokanyi lomoko eneyali Nkolo.

³Ko lakoond’e nkoho, bokambi’ona solosolo onambana l’emi, kambya bayato’ane, lacin’oka basalaki l’emi en’osimo bon’olotsi, iyo la Kulemento l’akambi’amoi banambanaki l’emi nk’osamb’oho, banayali l’aina en’okanda bona liiko.

⁴Bonyangela eneyali Nkolo bina l’ina; lila lakina, emite, bonyangelaka.

⁵Bongompolu bonino beyanake l’ato bahatu. Nkolo ayali mbolimboli.

⁶Botakandakandake lacin’ena yoi limoko tu; ohonde en’aoyi bahatu, la boondo la lolombo la nkanga ena lokango, baoyi banufol’ino baeyanake eneyali Yakomba;

⁷ko mwi ena Yakomba eneleki nnonganya ehatu engotombanya betem’enino ko la nkanyi inino eneyali Masiya Yesu.

⁸Yoi lina ncindedya, bifili, baoyi l’aoyi banayali solosolo, baho banayali bana lokumo, baho banayali bana mbongi, baho banayali bana soto, baho banayali ban’olotsi, baho banayali bana lokumo lon’olotsi: yombo bolotsi boyali, yombo lokumo loyali, bokanelaka nko baoyi’aho.

⁹Baoyi banak’in’ononganyaka, ko banak’in’otambaka, ko banak’in’ookaka, ko bana k’in’oenaka eneyal’emi, bilaka nko baho; ko Yakomba ena mwi angoyala l’ino.

¹⁰Koko lanyangela eneyali Nkolo l’enyanga mene, lacin’oka isanga, nk’eyoka ena mbusa, ino bit’onkanel’emi lakina; bonkanelaki en’oso solosolo, ohonde biindaki etelo.

¹¹Mpatende lacin’ena biinda bina toma; lacin’emi mekela, bokotua bon’etaketaka bonoyal’emi, nkike l’oho.

¹²Mekela bokotua bona njosonja, ko mekela bokotua bona mpula; en’aoyi bahatu l’ena toma tohatotu mekela le nkinda ena liota le njoka ena njala, le mpula le biinda bona toma.

¹³Lakambisa baoyi bahatu eneyal’ende onokikya locili.

¹⁴Koko ino bilaki’olotsi, enek’in’onkambyaka ena bino binami.

¹⁵Ko inoamene baise Filipoi bomey’oka ena limatsako lin’osimo bon’olotsi, eneki’m’oumaka ena Makedonia, efan’ekelesia enambanaki l’emi ena likambo lina mpaka la ntamba, yengoko ino kei;

¹⁶lacin’ino bontomelaki nganji betoma bike nko l’ena Tesalonike lacin’ena biinda bonami.

¹⁷Efa lacin’oka lafona nganji: lafona nko bemamo beneyafule lacin’enino.

¹⁸Koko emi laata toma tohatotu, njali la mpula; mokinda liota, eneki’m’otambaka eneyali Epafulodito toma tonatoyaki eneyal’ino: nko mpimbo en’olotsi, mbeka ena lokumo, enekumyam’olotsi la Yakomba.

¹⁹Ko Yakomba enami angokokokedy’ino biinda bonino bohotu, yoka bosamb’onoyali lituka linande en’okonde eneyali Masiya Yesu.

²⁰Koko lokumo eneyali Yakomba Bafango’oniso bisike la bisike. Ndoho.

²¹Beesaka ban’oeka bahatu eneyali Masiya. Bifili biniyali l’emi bakees’ino.

²²Ban’oeka bahatu bakees’ino, banaleki oyokufol’ino nk’iy’anayali en’otumba bona Kaisala.

²³Isei ina Nkolo eniso Yesu Masiya iyalame la belimo’enino. Ndoho.