Read ngando Ba-Kolosai 1 Bible Online

Ba-Kolosai 1 - ngando bible

Ba-Kolosai 1

¹Paulo, ekima ena Masiya Yesu, l’eango ena Yakomba, ko la Timoteo efili eniso,

²eneyali ban’oeka la bifili bina solosolo banayali eneyali Masiya ena Kolosai: Isei la mwi eneyal’ino eneyali Yakomba, Bafango’oniso.

³Tokanga Yakomba, Bafango’ona Nkolo eniso Yesu Masiya, lokango, ko tokoondel’ino bina l’ina;

⁴lacin’oka tomoka bosimo bon’imeedyo inino inimedy’ino Masiya Yesu, ko la nganji enok’ino ban’oeka bahatu,

⁵lacin’ena lolendedyo lonelomonyama lacin’enino ena loola, nko loho lonalok’in’ookak’oso ena yoi lina solosolo en’osimo bon’olotsi.

⁶Lacin’oka boho bomoyela enek’ino, ko boho boyali en’enyanga behetu nkoho, ko boyote bemamo, ko boyafule. Boho boyafule eneyal’ino nkoho, nk’en’ina bonok’in’ookak’ale ko beyaki isei ina Yakomba la solosolo;

⁷yok’onok’in’olakamaka la Epafala, bosali onolangama l’iso, onambana l’iso en’osala, ko ayali bokambi bon’ekambwa ena Masiya bona solosolo lacin’enino;

⁸ko ende atosumolaki nganji enino ena lolango eneyali lacin’ena Bolimo.

⁹La ncina ene, iso nkoho, nk’en’ina bonok’is’ookaka baoyi’ane, tofaedya likoondel’ino Yakomba, ko tufola lacin’enino lacin’eho bolole la njeya ena eango enande ena bomwu bon’olimo bohotu ko la mpokola,

¹⁰lacin’eho bokende l’ekendelo enakolana en’oso bona Nkolo ko boate lokumo eneyal’ende en’aoyi bahatu, ko boote bemamo ena bikambwa bin’olotsi bihitu, ko bofule nko mpula ena nnonganya ena Yakomba;

¹¹ko bocidyame la locili lohalotu lacin’ena mpamba en’okonde’onande, ena mbitedya ehatu ko l’isei ina locinji nko l’enyanga;

¹²ko lacina bokumya Bafango onotoongyaki lacin’eho totambe baondo bana lisango lina ban’oeka ena fololo eho.

¹³Ende atotungolaki ena mpamba ena bilima, ko atolekyaki ena lifoka lina Bon’ona nganji enande;

¹⁴toata ikwelo eniso eneyal’ende, nk’etungwelo en’aoyi’owe.

¹⁵Ende ayali nk’ekolanya ena Yakomba onofenya, ko ayali ngolo en’enunwelo ehatu;

¹⁶lacin’oka bikambwa bihitu binunolamaki nk’eneyal’ende, nko bikambwa biniyali ena loola ko l’ikambwa biniyali ena loko, binenya la binifenya, kanga toeko tona bafoka, kanga banyangetuke, kanga bafoka, kanga bana-mpamba; bikambwa bihitu bimonunolama l’ende ko lacin’enande;

¹⁷ko ende ayali en’oso bona bikambwa bihitu, ko bikambwa bihitu bionongana eneyal’ende.

¹⁸Ko ende ayali bote bona yonge liniyali nk’ekelesia; ko ende ayali limatsako mene, ngolo eniyo banafola enek’anawaki; lacin’eho ayalame iyome mene en’aoyi bahatu.

¹⁹Lacin’oka Bafango alangaki ate nkolana ehatu eyale nk’eneyal’ende;

²⁰lacina aambanya bikambwa bihitu eneyal’endamene nko l’ende, (eneki’nd’okodyaka eambanelo en’efili l’akila ban’ekulusu enande), nko l’ende: kanga bikambwa biniyali ena loko, kanga bikambwa biniyali ena loola.

²¹Ko ino boelanaki’ale la Yakomba en’esike eneki’oso, ko boyaaki baokyi’owe ena nkanyi inino l’ena bikambwa binino bin’owe; koko isanga amokambany’ino en’efili

²²ena yonge lin’onufo’onande nko l’ewedi, lacin’eho akoleky’ino en’oso’onande bato ban’oeka, banafana lianda ko bafana lofeli;

²³yombo bokusa liyala en’imeedyo la solosolo, ko bocidyama ko bokikyama locili, ko bofume ena lolendedyo lon’osimo bon’olotsi bonok’in’ookaka, bonosumolamaki en’enyanga behetu beneyali en’ase’a loola; ko emi, Paulo, njilamaki bokambi bon’osimo’oho.

²⁴Isanga lanyangela bino biho binakeenel’emi, ko emamene lakokya ena bonufo’onami bino bina Masiya biniciki, nko lacin’ena yonge linande, linaliyali nk’ekelesia.

²⁵Emi njilamaki bokambi bon’ekelesia eho, yoka bosamb’onoyali ekambelo ena Yakomba, enefamaki eneyal’emi lacin’enino, lacin’eho nsumole bato yoi lihalitu lina Yakomba,

²⁶nko yoi lin’ofisa linalifisamaki eneyali bisike la biotwelo bihitu; koko isanga liho limenya eneyali ban’oeka banande,

²⁷banaki Yakomba olangaka lacina atume bokotua bona lituka lin’o konde bona yoi line lin’ofisa eneka Befenda; liho line: Masiya eneyal’ino lolendedyo lon’okonde.

²⁸Ko tokumy’ende, toyasomya boto l’oto ko toyalake boto l’oto la bomwu bohotu, lacin’eho tolekya boto l’oto nko nkolana mene eneyali Masiya.

²⁹La ncina ene, emi lakamb’ekambwa nkoho, lokana yoka bosamb’o nakamba ekambelo enande eneyakambe eneyal’emi la locili mene.