Read ngando Ba-Kolosai 2 Bible Online

Ba-Kolosai 2 - ngando bible

Ba-Kolosai 2

¹Lacin’emi lalang’oka ino beye bokotua bon’ita binokan’emi lacin’enino, ko lacin’eniyo banayali ena Laodikiya, ko lacin’ena bato bahatu banaten’elongi enamamene;

²lacin’eho betem’eniyo becicime enamban’iyo ena nganji ena lolango, lacin’eho baeye lituka lihalitu lina njimedya mene ena nnonganya, ko baeye yoi lin’ofisa lina Yakomba fololo, liho nko Masiya:

³lituka lihalitu lina bomwu la njeya yofisama eneyal’ende.

⁴Lila yok’osamb’one, lacina boto atokofot’ino l’aoyi bana longo.

⁵Kang’emi mpayali l’ino ena yonge, njali l’ino en’olimo, lanyang’enyanga, ko len’oka baoyi’anino bamonongana bolotsi, ko imeedyo inino eneyali Masiya imocila nko locili.

⁶Lacin’eho, bokendaka la Masiya Yesu Nkolo, yoka bosamb’onok’in’otambak’ende;

⁷boakama eneya-l’ende yoka beluo bena bote, ko bofakama eneyal’ende; ko bokikyama en’imeedyo yok’onok’in’olakamaka, ko bofula en’imeedyo iho la nkanga ena lokango.

⁸Boongya lilenda lacina boto atokotol’ino yoka basungu lo bomwu bonande bon’aoyi ntenda, ko la baoyi bana mpoci banafana ncina, yoka bosamb’onoyali lilako lin’ato ko la baoyi bana loko banatanongana, ko efa bosamb’onoyali Masiya.

⁹Lacina mpula ehatu ena Yakomba eyali nk’eneyal’ende ena yonge,

¹⁰ko ino bokolanyama eneyal’ende, onoyali bote bona lifoka lihalitu ko la mpamba ehatu;

¹¹ko eneyal’ende bokesamaki yonge l’ekeselo ena yonge enetilama l’a kasa, enek’in’oumolaka baoyi’owe bana yonge lin’onufo nko l’ekeselo ena yonge eneyali eneyali Masiya.

¹²Bokunjamaki l’ende en’inelo, ko beetwaki meho l’ende la njimedya en’ekambelo ena Yakomba onetolak’ende enek’anawaki.

¹³Ko enek’in’oyalaka en’e wedi lacin’ena baoyi’owe’anino ko la biinda bona nke sa ena yonge lin’onufo’onino, akiikyak’ino l’ende laanda lomoko, ko aototungol’iso en’aoyi’owe’aniso bahatu;

¹⁴aolifola etengelo enetengamaki en’asangya enetotungyaki, enetofekyaki, ko aumol’eho tutu, eneki’nd’oakak’eho en’ekulusu;

¹⁵aumola bafoka ko la baise mpamba, ko amaenyanya ena fololo, ko aolong’elonga mene l’ekulusu eho.

¹⁶Botimedyake lacina boto akokoedy’ino baoyi ena likambo lina toma tona ndaka la mmela, ko lacin’ena bina bon’elambedya, ko la limatsako lina ngondo, ko la bina bona Sabata:

¹⁷baoyi’aho bayili nko li-lila kei lina baoyi banangoya linga, koko yonge mene liyali lina Masiya.

¹⁸Botimedyake boto akokumol’ino boluko’onino la njofima enayofim’ende l’eango enandamene, ko la lokumo lonakumy’ende bikima bina loola: ende ayokumya lacin’ena baoyi banaki’nd’oenaka, ko ayofefa nko bototoloto ena lokanyi lonande lona yonge,

¹⁹ko afundamele Bote; eneyali Bote’oho yonge lihalitu yat’ekikedyo, ko yambanyama la biyongamelo ko l’esisa, ko yafula la mpula ena Yakomba.

²⁰Yombo bowaki la Masiya eneyali bikambwa bin’oso bina loko, biit’olanga beeka lacina nai, nk’eyoka boyike ena loko?—

²¹beeka nko, Tasukake, Tamekake en’onyua, Tuundake:

²²beho behetu beyakalel’ekambelo, beeka ben’ato la balako ban’ato nd’eho.

²³Baoyi’aho bayali yok’ekolanya ena bomwu, nko lokumo lonakumy’oto l’eango enandamene, ko la njofima enandamene, ko la nsisodya ena yonge; ohonde baoyi’aho bafafekyisa mposa ena yonge.