Read ngando Ba-Kolosai 3 Bible Online

Ba-Kolosai 3 - ngando bible

Ba-Kolosai 3

¹Lacin’eho, yombo betwaki en’ewedi, ino la Masiya laanda, bofonaka baoyi banayali ena liko, enakisase Masiya en’ili bona likasa lina Yakomba y’ome.

²Bil’etema en’aoyi banayali ena liko, ef’en’aoyi banayali ena loko.

³Lacin’oka ino bowaki, ko liiko lonino lomofisama la Masiya eneyali Yakomba.

⁴Koko enengi Masiya, onoyali liiko loniso, oenya, ino bongenya l’ende en’okonde nkoho.

⁵Lacin’eho, boyaka bilama binino biniyali ena loko, nko lisamba, la nsefo, la mposa ena nsoi, la mposa en’owe, la mposa ena lituka eneleki—mposa eho eyali nko nkumya ena baidola;

⁶nkele ena Yakomba eoya eneyali ban’ana lopoko lacin’ena baoyi’aho;

⁷ko inoamene bokendaki en’aoyi’aho en’oso, enek’in’oyalaka en’aoyi’aho.

⁸Koko isanga bumolaka baoyi’ane bahatu: nko nkele, la bolema, la bongeno, la besao, la baoyi bana nsefo en’enyu’enino.

⁹Botafotanake mpoci; lacin’oka bomumola boto’on’alale ko l’ikambwa binande,

¹⁰ko bomolota boto’on’ototo, ononunolama lakina ena njeya l’ekolanya enande ononunolaki;

¹¹en’enunwelo eho ena ntoto efaate lakina bise Elene la bise Yuda, onokesama yonge l’onotakesama yonge, Bofenda la bise Sekutia, la boombo l’onofayali boombo; ohonde Masiya ayali bahatu, ko ayali eneyali bahatu.

¹²Lacin’eho, ino banayali nk’eyoka banaki Yakomba osonaka, ban’oeka, ko banalangama, bolotaka yoka bisenda betema ben’isei, ko la bongompolu, ko la njofima, ko la mwi, ko l’isei ina locinji,

¹³botalemwanake, ko biikyana baoyi’anino ban’owe yombo boto aata likambo l’on’omoi’oto; yoka bosambo bonoki Masiya okiikyak’ino, ino bilaka nkoho;

¹⁴ko ena liko ya baoyi’ane bahatu, bokana nganji, eambanelo ena mbongi enakolana nd’eho.

¹⁵Ko mwi ena Masiya eyalamake nyangetuke en’etem’enino, lacin’oka ino beelelamaki lacin’ena mwi eho ena yonge limoko; ko bokanga Yakomba lokango.

¹⁶Yoi lina Masiya litongake eneyal’ino litonga la mpula ena bomwu bohotu; bolakana ko boofodyana la njembo, ko la njembo ina lokumo, ko la njembo ina bolimo, bembela Yakomba en’etem’enino l’isei inande.

¹⁷Ko baoyi banil’ino bahatu, kanga yoi lina ntenda, kang’ekambwa ena nkamba, bilaka bahatu ena lina lina Nkolo Yesu, ko bokanga Yakomba Bafango lokango nko l’ende.

¹⁸Ino baali, bofika baome’anino, lacin’oka bokotu’oho bokoli eneyali Nkolo.

¹⁹Ino baome, boka baali’anino nganji, ko botailelake bongeno.

²⁰Ino bana, bimedya bonyua bon’afango la banyango’anino en’aoyi bahatu, lacin’oka bokotu’one bimedyama bolotsi la Nkolo.

²¹Ino bafango, botanyomake ban’anino, batongolembwa.

²²Ino baombo, bimedya iy’anayali banyangetuke’anino bana loko la mpika en’aoyi bahatu; efa bosala en’aiso kei, yoka bato banafona lokumo lon’ato; ohonde l’otema bomoko, boangaka Yakomba.

²³Baoyi ban’etaketaka banakamb’ino, bilaka botema ena baho, nk’eyoka bosaela Nkolo, efa bato;

²⁴lacina bey’oka bongotamba eneyali Nkolo boluko bona lisango. Ino bosaela Nkolo Masiya.

²⁵Ende onil’owe angotamba lakina bowe bokoki’nd’oilaka; ko efaate likai lacin’en’ato tu.