Read ngando 1 Ba-Tesalonike 3 Bible Online

1 Ba-Tesalonike 3 - ngando bible

1 Ba-Tesalonike 3

¹Lacin’eho, enetakolan’iso liledya lakina, tokanelaki’olotsi, is’ate tocikale ena Atenia nk’iso kei;

²ko totomaki Timoteo efili eniso la bokambi bona Yakomba en’osimo bon’olotsi bona Masiya, lacin’eho akokiky’ino ko akocidy’ino en’imeedyo inino;

³lacina boto afalidyame la bino bine; lacin’inoamene bey’oka tomosonama lacin’ena biho.

⁴O, kuma toyali l’ino, tokosumolak’ino en’oso, is’ate tongen’ino; ko ino bey’oka yoi liho limilama nko solosolo.

⁵La ncina ene, emi nkoho, enetakolan’emi liledya lakina, ntomaki ekima lacin’eho njeye imeedyo inino, yombo bomeki amokadya likomek’ino, ko bosal’oniso bomoyalama bototoloto.

⁶Koko isanga Timoteo, onoya eneyal’ino, amuta, ko amotoyela yoi lin’olotsi ena likambo lin’imeedyo inino ko la nganji enino ena lolango, ko la nkanedya en’olotsi enatokanedy’ino bisike bihitu, ko la mposa enok’ino lacina boteen’iso, yoka bosamb’onok’iso mposa lacina tokeen’ino;

⁷la ncina ene, bifili, tomokika lacin’enino l’imeedyo inino, ena ntoto ena bino biniso la nkeseli iniso ihatu.

⁸Lacin’oka isanga iso tika nko mbika, yomb’ino bemala la locili eneyali Nkolo.

⁹Iso tokolana likanga Yakomba lokango loka nai lacin’en’ekiko ehatu enakik’iso lacin’enino en’oso bona Yakomba eniso?

¹⁰L’ane l’oco toyonde nko mbonda inene lacina tene bilongi binino, ko lacin’eho tokokya baoyi’aho ban’imeedyo inino baninda.

¹¹Isanga Yakomba mene, Bafango’oniso, la Nkolo eniso Yesu, batokoedyake mboka eneng’is’oya eneyal’ino;

¹²ko Nkolo akilel’ino lacina bofule nko mpula mene ena nganji enokan’ino la nganji enok’ino bato bahatu, yoka bosamb’onakook’iso nganji;

¹³lacina akikya betem’enino locili en’aoyi ban’oeka, betema benefana lofeli tu, en’oso bona Yakomba Bafango’oniso. en’eyelo ena Nkolo eniso Yesu, ende la ban’oeka banande bahatu.