Read ngando 1 Ba-Tesalonike 4 Bible Online

1 Ba-Tesalonike 4 - ngando bible

1 Ba-Tesalonike 4

¹Yoi lina ncindedya, bifili: yok’onok’in’otambaka eneyal’iso bokotua bonakolana l’ino lacina bokende ko boate lokumo eneyali Yakomba, tokoond’ino ko tokosomy’ino ena lina lina Nkolo Yesu lacina bofudya likamba nko l’okotu’oho, nk’osamb’onakend’ino.

²Lacin’ino beya beeka benek’is’okofaka la Nkolo Yesu.

³Yoi linalanga Yakomba liho line: lacinaboekyame en’oeka, lacina bokile lisamba;

⁴ko lacina boto l’oto anonganya liata yonge linandamene la ntombanya en’oeka ko l’okotua bonakolana;

⁵ef’ena mposa ena likele, yoka bosamb’onila Befenda banafeye Yakomba;

⁶ko boto atatungyake efili enande, ko atilelake efili enande bowe ena yoi line; lacina Nkolo ayali boutoli bona nkele en’aoyi’ane bahatu, yok’onok’is’okolakak’ino en’oso ko tokosumolak’ino nkoho.

⁷Lacin’oka Yakomba atateelel’iso lacin’eho toyale bana nsefo, ohonde ban’oeka.

⁸Lacin’eho, boto onotembola beek’ene, afatembole bato: atembola nko Yakomba, onokof’ino Bolimo’onande bon’olotsi.

⁹Koko ena likambo lina njoka bifili nganji, bofalele lacina boto akotengele yoi, lacin’inoamene bomolakama la Yakomba lacina bokane nganji;

¹⁰o, solosolo, ino boka bifili bihitu banayali ena Makedonia ehatu nganji nkoho. Koko tokoond’ino, bifili, lacina bokuse likamba yok’oho la mpudya;

¹¹ko lacina boongya liyalama mwi, ko bokambe bikambwa bininoamene, ko bosale l’akas’aninoamene, nko yok’onok’is’okolakak’ino;

¹²lacina bokende l’okotua bonakolana eneyal’iyo banayali en’anza, ko bofinde iyema.

¹³Koko tofalange, bifili, lacina boyalame nk’eyoka bato banafeye yoi liniyo baneci en’ewedi, botongoyoka lokeseli yoka bosamb’onoka bato’amoi banafana lolendedyo.

¹⁴Lacina, yombo timedy’oka Yesu awaki ko aetwaki lakina en’ewedi, nk’osamb’oho Yakomba angoya l’iyo baneci en’ewedi eneyali Yesu nko l’ende.

¹⁵Lacin’iso tokosumol’ino la yoi lina Nkolo, is’ate, is’anayike banaciki yengoko eyelo ena Nkolo, tofetaki en’oso’oniyo baneci en’ewedi.

¹⁶Lacina Nkolo mene angokita ena loola la yoi mbelela, la lofoso lon’iyome ina bikima bina loola, ko la bopate bona Yakomba; ko banawaki eneyali Masiya bangetwa en’oso.

¹⁷Nkwaho, is’anayike banaciki tongotambama nko kao, iso l’iyo ena bailo’a mbula lacina tukane la Nkolo ena liko; ko yok’oho tongoyala la Nkolo nko locela.

¹⁸Lacin’eho, bokikyana la baoyi’ane.