Read ngando 1 Ba-Tesalonike 5 Bible Online

1 Ba-Tesalonike 5 - ngando bible

1 Ba-Tesalonike 5

¹Koko ena likambo lina bisike la bauma, bifili, efaate ncina ntutuma enakotengela boto yoi.

²Lacin’inoamene beya fololo, bey’oka bina bona Nkolo boya yoka liya l’oco.

³Enil’iyo, Mbo mwi, efana yoi lina bofolu, nkwaho eehedyo eoya kaimo eneyal’iyo, yoka bosambonoya lonwa eneyali boyoto onoyali la yemi; ko iyo bafayat’elotelo tu.

⁴Koko ino, bifili, bofayali en’ilima lacina bina boho bokosaimody’ino yoka liya.

⁵Inatu boyali ban’ana fololo la ban’ana bane; tofayali bana boco, ko tofayali bana bilima.

⁶Lacin’eho, totetamake en’ilo, yoka bosamb’onila bato’akina: ekoli lacina totombanya, ko totalangwake l’aana.

⁷Lacin’oka iy’anatot’ilo, batota nko l’oco; ko iy’analangwa l’aana, balangwa nko l’oco.

⁸Koko akoli eneyal’iso, bato bana bina, tokile baana, ko tolote ngua ena lingongo eka imeedyo la nganji ena lolango, ko tolote likuka lina lolendedyo lona liiko en’ote.

⁹Lacin’oka Yakomba atateelel’iso lacina tukane la nkele enande: amoteelela lacina totambe liiko la Nkolo eniso Yesu Masiya,

¹⁰onotowelaki lacin’eho, kanga toyetwa, kanga tetama en’ewedi, tiike iso l’ende laanda lomoko.

¹¹Lacin’eho, bokikyana ko bocidyana inoamene, nk’osambo bonil’ino.

¹²Koko tokoond’ino, bifili, lacin’eho bononganya iy’anayakambe eneyal’ino, banakolond’ino en’aoyi bana Nkolo, ko bakolak’ino;

¹³ko bofikaka bato’aho la lifiko mene ena nganji ena lolango lacin’ena bikambwa biniyo. Boyalamaka la mwi en’atenyi’aninoamene.

¹⁴Ko tokoond’ino, bifili, bolak’iyo banakamba baoyi bana loyenge, bokikya iy’analembwa en’etema, bokambya iy’anayali bolu’olu, boyalama l’isei ina locinji eneyali bato bahatu.

¹⁵Botalangake lacina boto acindanya boto’okina bowe la bowe; ohonde boongya yitana bina l’ina la baoyi ban’olotsi eneyal’inoamene ko l’neyali bato bahatu.

¹⁶Bonyangaka bina l’ina;

¹⁷botacikake boondo tu;

¹⁸bokanga Yakomba lokango en’aoyi bahatu, lacin’oka eango ena Yakomba eneyali Masiya Yesu lacin’enino eyali yok’osamb’oho.

¹⁹Botalimake Bolimo;

²⁰botatembolake balako;

²¹bomeka baoyi bahatu, ko buundamela baho banayali bolotsi.

²²Bofengolaka bekotua behetu ben’aoyi’owe.

²³Ko Yakomba mene ena mwi akeekyake en’oeka mene; ko bolimo’onino bohotu l’otem’onino bohotu la yonge linino lihalitu bamonyamake efana likambo lina lofeli tu yengoko eyelo ena Nkolo eniso Yesu Masiya.

²⁴Ende onokeelel’ino ayali nko solosolo, ko angokamba yoi liho.

²⁵Bifili, botoondele.

²⁶Boesa bifili bihitu la bolumba bon’oeka.

²⁷Lakosumol’ino ena lina lina Nkolo, bokand’one boandamake eneyali bifili bihitu.

²⁸Isei ina Nkolo eniso Yesu Masiya iyalamake l’ino.