Read ngando 2 Ba-Tesalonike 1 Bible Online

2 Ba-Tesalonike 1 - ngando bible

2 Ba-Tesalonike 1

¹Paulo la Silwano la Timoteo, eneyali Ekelesia ena baise Tesalonike eneyali eneyali Yakomba Bafango’oniso la Nkolo Yesu Masiya:

²Isei la mwi eneyal’ino eneyali Yakomba Bafango la Nkolo Yesu Masiya.

³Bifili, akoli eneyal’iso lacina tokange Yakomba lokango bina l’ina lacin’enino, ko lokango loho lokoli, lacin’oka imeedyo inino iyafule nko mpula mene, ko nganji enokan’inatu eleki nko ndeka mene.

⁴Ko la ncina eho isoamene tokumya lokumo lonino ena bikelesia bina Yakomba lacin’ena locinji lonino ko l’imeedyo inino ena binyomelo binanyomam’ino bihitu ko l’ena bino binen’ino.

⁵Baoyi’aho bayali nko ndembi enenyanya etendelo ena mbongi enatenda Yakomba bakambo, lacin’eho ino bimedyam’oka bokoli la lifoka lina Yakomba; ko ino boyene bino lacin’ena liho;

⁶lacin’oka Yakomba amotanga yoi line mbongi, noka, alukole iy’anakeeny’ino bino boluko bona bino lakina;

⁷ko akolukol’ino banen’ino boluko bona lifomya, l’ino l’iso, enengi Nkolo Yesu oenya ena loola la bikima bina mpamba enande,

⁸la njombi ina nkoi, lacina autodya nkele eneyal’iyo banafeye Yakomba, ko l’eneyal’iyo banapoka lopoko ena likambo lin’osimo bon’olotsi bona Nkolo eniso Yesu.

⁹Iyo bangosisodyama, nko l’eehedyo ena njelana locela l’elongi ena Nkolo ko l’okonde bona mpamba enande, njelana enefakale tu,

¹⁰enengi’nd’oya oyokumyama eneyali ban’oeka banande, ko lacina afefame nko mpefa en’in’oho eneyal’iyatu banimedya (lacin’oka ino bimedyaki bosimo’oniso).

¹¹La ncina ene, tokoondel’ino bina l’ina, lacin’eho Yakomba eniso atange ate ino bokoli la leele lonelok’in’oelelamaka, ko lacina akokya mposa ehatu en’aoyi ban’olotsi, ko l’ikambwa bihitu bin’imeedyo nko la mpamba enande;

¹²lacin’eho lina lina Nkolo eniso Yesu likumyame eneyal’ino, ko ino eneyal’ende, yoka bosamb’onoyali isei ina Yakomba eniso la Nkolo Yesu Masiya.