Read ngando 2 Ba-Tesalonike 2 Bible Online

2 Ba-Tesalonike 2 - ngando bible

2 Ba-Tesalonike 2

¹Koko, bifili, tokoond’ino ena likambo lin’eyelo ena Nkolo eniso Yesu Masiya ko l’esusanelo eneng’is’osusana eneyal’ende,

²tokoonda lacina bofalidyame isanga ena lokanyi lonino, ko bofakandakanda, kanga l’olimo, kanga la yoi lina ntenda, kanga l’okanda bonil’iyo, iy’ate boho boya eneyal’iso, nk’eyoka bina bona Nkolo bomosila liyela.

³Botalangake lacina boto akokotody’ino l’aoyi’amoi bana mpoci; lacina bin’oho bofaye yengoko eumbeelo eoya en’oso, ko boto’oho On’owe, nko bon’ona mbeha, aenya;

⁴nk’ende onosimba ko ayoiledy’endamene ena liko lina boho bohotu bonotangama Yakomba ko l’onokumyama, ko aokisase en’ilombe in’oeka ina Yakomba, ko ayokumy’endamene ate ayali nko Yakomba.

⁵Ino bofakanedya nde, nkosumolak’ino baoyi’ane kuma njali l’ino?

⁶Kokoisanga bomey’oho onofeka l’ende, lacin’eho aenya en’esike enandamene.

⁷Lacin’oka yoi lin’ofisa lina mpulunganya en’eeka liyakambe nko le bon’in’one; ohonde omoi ayafeke la liho esik’ene, yengoko enengi’nd’oumolama.

⁸Nkwaho ende ona mpulunganya angenya, onongi Nkolo Yesu oyaka la lofofe lon’onyu’onande, ko angeehya nko mbehya l’enyedyo en’eyelo enande.

⁹Eyelo en’oto’oho engoyala yoka bosamb’onoyali ekambelo ena Satana, enakamb’ende la mpamba ehatu, ko la ndembi, ko la bikambwa bina mpefa bina mpoci,

¹⁰ko la bikambwa biniseki’osimo ko la biniseki’owe eneyal’iyo banayeha, lacin’oka batatamba nganji ena lolango ena solosolo eho lacina baike.

¹¹Ko la ncina ene Yakomba amatomel’iyo yoi lina ntatengya lina locili mene lacin’eho baimedya yoi lina mpoci;

¹²lacin’eho iyatu banatimedya solosolo eho, ohonde baokaki ekiko l’aoyi baninda mbongi, bakoiyame likambo.

¹³Koko iso tokoli lacina tokange Yakomba lokango bina l’ina lacin’enino, ino bifili banalangama la Nkolo, lacin’oka Yakomba akosonak’ino ena limatsako mene lacin’ena liiko nko l’eekedyo en’oeka ena Bolimo, ko la njimedya ena solosolo.

¹⁴Ko akeelelak’ino l’osimo’oniso bon’olotsi, lacin’eho botambe bokonde bona Nkolo eniso Yesu Masiya.

¹⁵Lacin’eho, bifili, bemalaka locili, ko buundamela balako banak’in’olakamaka, yombo la yoi lina ntenda, yombo l’okand’oniso.

¹⁶Koko Nkolo eniso Yesu Masiya mene, la Yakomba Bafango’oniso onotookak’iso nganji ko atofak’iso ekikedyo enefakale ko la lolendedyo lon’olotsi nko l’isei,

¹⁷acicimodyake betem’enino, ko akokikyake locili en’aoyi bahatu ban’olotsi ko l’en’ikambwa bihitu bin’olotsi.