Read ngando 2 Ba-Tesalonike 3 Bible Online

2 Ba-Tesalonike 3 - ngando bible

2 Ba-Tesalonike 3

¹Yoi lina ncindedya, bifili: botoondel’iso, lacina yoi lina Nkolo lisekole ko likumyame, bosamb’onoyali liho enek’ino;

²ko lacin’eho iso totungwa eneyali bato bana loyenge ko l’ato ban’owe; lacin’oka bato bahatu bafan’imeedyo.

³Koko Nkolo ayali solosolo, ko angokokiky’ino, ko angokotombany’ino lacin’enande on’owe.

⁴Koko iso toyali l’imeedyo ine eneyali Nkolo, is’ate baoyi banakosumol’iso, ino boyakambe baho, ko bongokamba nko baho.

⁵Ko Nkolo alondake betem’enino ena nganji ena Yakomba, ko l’ena locinji lona Masiya.

⁶Koko tokosumol’ino, bifili, ena lina lina Nkolo eniso Yesu Masiya, lacina bume eneyali efili l’efili onoyakende l’ekendelo ena loyenge, ko afamonya balako banak’iy’otambaka eneyal’iso.

⁷Lacina inoamene beya bokotua bonakolana lacina bookole bokotu’oniso; lacin’oka iso totakamba bikambwa bina loyenge enek’ino;

⁸ko totala mampa ena boto’omoko bototoloto; ohonde tosalaki bosala ko l’ikambwa bin’efefe l’ane’l’oco, totongoyala yoka bolito eneyali boto’omoi’onino ena likambo lina nkemba ena toma;

⁹efa lacin’oka tofan’etelo: nko lacina toyoil’isoamene ndembi ena lilako eneyal’ino, lacin’eho bookole bokotu’oniso.

¹⁰Lacina, en’esik’eho, kum’iso toyali l’ino, tokosumolaki, is’ate, Yombo boto afalange’osala, atalake toma.

¹¹Lacin’oka iso toka, iy’ate bamoi bayali enek’ino banayakende l’okotua bona loyenge, banafasale tu, koko bayali nko bendengi.

¹²Tosumola bato ban’omun’oho, ko tasomya losomo eneyali Nkolo Yesu Masiya, is’ate basalake la mwi, ko bale mampa eniyoamene.

¹³Koko ino, bifili, botalembwake en’ekambelo ena bikambwa bin’olotsi.

¹⁴Ko yombo boto’omoi afalange limonya yoi liniso liniyali en’okand’one, bolendaka boto’oho, ko botakendake efili l’ende, lacina aoke nsoi.

¹⁵Ohonde botatangake boto’oho bookyi’owe: bolake yok’efili.

¹⁶Nkolo mene ena mwi akofake mwi bisike bihitu ko la bekotua behetu. Nkolo ayalamake l’inatu.

¹⁷Boeso bonami, Paulo, la likasa linamamene boh’one; boho boyali nko ndembi en’okanda l’okanda; etengelo enami eh’ene.

¹⁸Isei ina Nkolo eniso Yesu Masiya iyalamake l’inatu.