Read ngando 1 Timoteo 1 Bible Online

1 Timoteo 1 - ngando bible

1 Timoteo 1

¹Paulo, ekima ena Masiya Yesu, bosamb’onoyali lotomo lona Yakomba Boiki’oniso ko la Yesu Masiya lolendedyo loniso;

²eneyali Timoteo, bon’onami bona solosolo en’imeedyo: Isei l’ongompolu la mwi eneyali Yakomba Bafango’oniso ko la Masiya Yesu Nkolo eniso.

³Lakoofodya yoi linaliki’m’okoondaka eneki’m’ocoaka ena Makedonia, emite ocikale ena Efeso oyosumol’ato’amoi batalakake lilako lin’okotu’okina,

⁴ko batalofamelake basai ko la biandelo bina biotwelo binifan’esimbelo: baoyi’aho bafudya ntango, koko bafaatele boto ekikedyo ena Yakomba eneyali l’imeedyo.

⁵Koko ncina mene ena lotomo nko nganji eneyafole ena botema bona soto, ko l’ena lokanyi lon’otema lona cilili, ko l’en’imeedyo iniyali nko solosolo.

⁶Bamoi bamotembwa en’aoyi’aho, ko bamokunga lacina bacu ena ntango inifana ncina ntutuma;

⁷iyo balanga lacin’eho bayalame balaki bana basangya, ohonde bafanonganya baoyi banatend’iyo, nko le balako banalak’iyo nk’eyoka bameya bafanonganya ncina.

⁸Koko iso tey’oka beeka bend’olotsi, yombo boto akamba bokotua bonoki beho oekyamaka,

⁹eney’ende’oka beeka betekyama lacin’ena boto’ona mbongi: bemekyama lacin’ena bafulunganyi ko la bato bana lopoko, nko lacin’en’iyo banafakumya Yakomba ko l’ato ban’owe ko l’iy’anafafike Yakomba ko l’iy’anafana mbongi, nko lacin’ena njaki ina bafango l’anyango ko la njaki in’ato,

¹⁰nko lacin’ena bato bana lisamba, ko la mpame banakamba baoyi bana nsoi la mpame imoi, ko l’iyo baniya bato nko njiya, ko la bafoci bana mpoci, ko l’iy’anateha basangya bana mpoci, ko yombo yoi limoi liyali linalifasangi la lilako lineyonga,

¹¹yoka bosamb’onoyali bosimo bon’olotsi bon’okonde bona Yakomba onosakelama bosako, nko bosimo bonoki’m’osukyamaka.

¹²Lokang’ende lokango ononkikyaki, nko Masiya Yesu Nkolo eniso, lacin’oka antangaki boto’ona solosolo, ko anjilaki bokambi’onande;

¹³nk’emi onosaiyaki’ale Masiya, ko nnyomaki bato, ko njaehyaki. Ohonde anjokaki isei, lacin’oka nkambaki baoyi’aho kuma ntanonganya, kuma ntaate imeedyo.

¹⁴Ko isei ina Nkolo eniso ifulaki nko mpula mene l’imeedyo ko la nganji eneyali eneyali Masiya Yesu.

¹⁵Yoi line liyali nko solosolo, ko yakolana lacina boto l’oto atambe liho l’otema bohotu, noka, Yesu ayaki ena loko oyikya bato ban’owe; ko onoyali boto’on’owe on’oso nk’emi.

¹⁶Koko anjokaki isei la ncina ene: nko lacin’eho aenyanya l’emi, onoyali boto’on’owe on’oso mene, isei inande ina locinji ihatu, la njalame ndembi ena lilako eneyal’iy’anangimedy’ende ena mbusa lacina baate liiko lonelofakale.

¹⁷Isanga, eneyali Lifoka lina Roi lina bisike bihitu, onofawu tu, onofenya, onoyali Yakomba nk’ende kei, lokumo l’ekumedyo eneyal’ende bisike l’isike. Ndoho.

¹⁸Bon’onami Timoteo, lakotom’e lotomo lone, yok’onoki baoyi otendamaka en’oso lacin’ene, lacina ookane bita bin’olotsi l’aoyi’aho;

¹⁹ko oundamele imeedyo ko la lokanyi lon’otema lon’olotsi. Bato’amoi bamumbela yoi line, ko yok’oho bamolehya imeedyo nk’eyoka boatu bonehyama la lose;

²⁰bamoi’aniyonko Umenayo la Alesandulo, banaki’m’olekyaka eneyali Satana, balakame lacina bafasaiya Yakomba.