Read ngando 1 Timoteo 3 Bible Online

1 Timoteo 3 - ngando bible

1 Timoteo 3

¹Yoi line liyali nko solosolo: noka, Yombo boto akemba bosala bona botombanyi la mposa, amolang’ekambwa en’olotsi.

²Koko akoli eneyali botombanyi ayalame boto onofana likambo lina lofeli, bome’ona booli’omoko, boto’ona njofima, onoyali la lokanyi loneloonga, onofana loyenge, onosangela befenda l’olotsi, oninya lilakis’ato lilako;

³nko boto onofamele vina bike, onofafome bato; ohonde boto onoyali la bongompolu, onofalange bekindo mpomana, onofoke francs mposa bik’ike;

⁴boto onokamba baoyi banakolana en’otumb’onandamene, ko ban’anande bamofika nko mpika la lokumo lohalotu.

⁵(Yombo’boto afanonganya yongya baoyi ban’otumb’onandamene, angokolana litombanya ekelesia ena Yakomba bosamb’oya?)

⁶Atayalamake boto onimedyaki nko kekeke, atongoyokumy’endamene ko atongoyokwa en’ekoiyelo ena likambo lina Satana.

⁷Koko akoli lacina aate lokumo lon’olotsi eneyal’iy’anayali en’anza, atongoyokwa ena lotango lon’owe, ko l’en’ilonga ina Satana.

⁸La badiakono nkoho, akoli eneyal’iyo bayalame la lokumo lon’olotsi, banafayali la benyua befe, banafamele vina bike, banafoke nkita ena nsefo mposa;

⁹nko bato banundamela yoi lin’ofisa lin’imeedyo nko la lokanyi lon’otema lona soto.

¹⁰Ekoli lacina bato’ane bamekame en’oso; nkwaho, yombo bafana ncina ena lofeli tu, bayalamake badiakono.

¹¹Ekoli lacina bayato nkoho bayalame la lokumo lon’olotsi, banafafote bato bakambo bana mpoci, nko bayato banayofima, ko bayali nko solosolo en’aoyi bahatu.

¹²Akoli eneyali badiakono bayalame bome’omoko booli’omoko, ko baongya likamba baoyi bana cilili eneyali ban’aniyo ko l’en’etumb’eniyoamene.

¹³Lacin’oka iy’anakamba bikambwa bina diakono l’okotua bonakolana bayoatel’iyoamene etelo en’olotsi, ko la nkaso mene en’imeedyo iniyali eneyali Masiya Yesu.

¹⁴Lakotengela baoyi’ane eneyalengedy’emi emite efan’olingolingo nongoya eneyal’e.

¹⁵Koko yombo ntaye isanga, lakotengela lacin’eho oeye bokotua bonakolana lacina bato bakambe en’otumba bona Yakomba, bonoyali nk’ekelesia ena Yakomba onoyike, la likonji l’ekikedyo ena solosolo.

¹⁶Ko efana ntango, yoi lin’ofisa lina nkumya ena Yakomba liseki’okolo: Ende aenyaki ena yonge, ayengwaki en’olimo, aenyedyaki bikima bina loola, bosimo’onande bosekodyamaki eneyali benyanga, bato bana loko baoimedyaki, ailedyamaki en’okonde.