Read ngando 1 Timoteo 4 Bible Online

1 Timoteo 4 - ngando bible

1 Timoteo 4

¹Koko Bolimo atenda fololo, ate ena bisike bina mbusa bamoi bangumbela imeedyo iho, ko bangolofamela belimo bena mpoci ko l’alako bana bademona,

²lacin’ena bato banaseki’osimo banayatende baoyi bana mpoci; lokanyi loniyo lon’otema lomoleha nk’eyoka la nkoi ndika;

³bayafeky’ato, iy’ate batasonganake ena liala, ko bakidy’ato nyama iniki Yakomba onunolaka lacin’eho iy’anitnedya ko baeya solosolo eho batambe iho la nkanga ena lokango.

⁴Lacin’oka toma tohatotu tonatoki Yakomba onunolaka toyali nk’olotsi, ko tofakilama, yombo bato batamba toho la nkanga ena lokango,

⁵lacin’oka toho teekyama en’oeka la yoi lina Yakomba ko l’oondo.

⁶Nk’oofodya bifili baoyi’ane, ongoyala bokambi bon’olotsi bona Masiya Yesu, bokambi onokikyama l’aoyi ban’imeedyo iho, ko la lilako lin’olotsi linalik’okilaka la locinji.

⁷Ohonde ongya lifengola basai bana loko banakolana la ngolosombo in’ayato kei. Ko oyokikyak’eamene la nnonganya ena nkumya ena Yakomba.

⁸Nkikya ena yonge eyali la nkita nk’isisali; ohonde nkumya ena Yakomba eyali la nkita en’aoyi bahatu: eyali l’esemba ena liiko loneloyali isanga ko la loho lonoyayi.

⁹Yoi line liyali nko solosolo ko likoli lacina boto l’oto atambe liho l’otema bohotu.

¹⁰Lacin’oka, iso tokamb’ikambwa ko toseela bembondo nko la ncina ene: lacin’iso tomil’etema nk’eneyali Yakomba onoyike, onoyali Boiki bon’ato bahatu, koko Boiki mene boniy’animedya.

¹¹Ongya yasumola baoyi’ane ko oalake.

¹²Timedyake boto akookya nsoi lacin’eneyal’e bonome; ohonde yalamaka ndembi ena lilako eneyal’iy’animedya, l’en’aoyi banatend’e, l’en’ikambwa binakamb’e, l’ena nganji ena lolango, l’en’imeedyo ko l’en’aoyi bana soto.

¹³Ongya yand’ekanda, ko ongya yond’ato mbonda, ko ongya lilak’ato lilako, yengoko enengi’m’oya.

¹⁴Tofelake nganji eneyali eneyal’e, enefamaki eneyal’e l’aoyi bana mpoladya, eneki bingambe bin’Ekelesia otadyaka bakasa eneyal’e.

¹⁵Ongya likanedya baoyi’ane; il’otem’one bohotu nk’en’aoyi’ane, lacin’eho efuelo ena nnonganya ene eenya fololo eneyali bato bahatu.

¹⁶Oyokolany’eamene bolotsi, l’eamene ko la lilako line. Cindelana en’aoyi’ane la locinji; lacin’oka nk’oila yok’one ongoyiiky’eamene ko l’iy’anakolofamela nkoho.