Read ngando 1 Timoteo 6 Bible Online

1 Timoteo 6 - ngando bible

1 Timoteo 6

¹Akoli eneyali baombo banayali ena yombo bakanele, iy’ate banyangetuke’aniyo bakoli la lokumo lohalotu, lacina bato’amoi batongosaiya lina lina Yakomba ko la lilako linande.

²Ko iy’anayali la banyangetuke banimedya, batatembolake lacina eneyal’iyo bifili: bakoli lacina basael’iyo l’ekiko lacin’oka iy’anata nkita l’ekambwa eho bamimedya ko baolangama. Lak’ato baoyi’ane, ko oasomya l’aho.

³Yomb’oto’omoi alaka lilako likina, ko afimedya baoyi banonga bolotsi, nk’aoyi bana Nkolo eniso Yesu Masiya, ko afimedya bokotua bona lilako bonakolana la nkumya ena Yakomba,

⁴boto’ho ayengodya la njofefa, ko afeye yoi limoko, koko yali nk’eyok’onolangwa la biufo ko la ntango ina baoyi, ko baoyi’aho baatel’ato nk’ekuku, la lisa, la ntango in’owe, ko la bekandokando ben’owe,

⁵ntango ina bato banehyama ena nkanyi iniyo, baninda solosolo, banakanela iy’ate nkumya ena Yakomba eyali eatelo ena nkita.

⁶Solosolo nkumya ena Yakomba eyali la nkita mene, yombo botema bona ncici boyali nkoho;

⁷lacin’oka totaya l’iyema imoko ena loko, ko efana ntango tofatolis’iyema imoko eneng’is’ouma meho.

⁸Koko eneyaat’iso toma tona ndaka ko la bisenda, akoli eneyal’iso tokisase l’aho.

⁹Koko iy’analanga lacina bayalame batuki bana toma baokwa ena losinganya ko l’en’ilonga, ko l’ena mposa inifana bomwu inayehy’ato inayin’ato l’inelo en’eehedyo l’ena mbwaka.

¹⁰Lacin’oka mposa ena francs eyali nko boluo bomoi bona bewe ben’ekotua behetu; ko bato’amoi bamok’iho mposa mene, ko bamotembwa en’imeedyo iniyo, ko bamoyook’iyoamene mboka la nkeseli bike mene.

¹¹Koko e, boto’ona Yakomba, lota baoyi’ane; koko itana la mbongi, ko la nkumya ena Yakomba, ko l’imeedyo, ko la nganji ena lolango, ko la mbitedya, ko la bongompolu.

¹²Okanaka bita bin’olotsi bin’imeedyo, undamelaka liiko lonelofakale, lonelok’oelelamaka ko lonelok’oimedyaka njimedya en’olotsi en’oso bona temoins bike.

¹³Lakosumol’e en’oso bona Yakomba onokikya toma tohatotu la liiko, ko l’en’oso bona Masiya Yesu, onolokolaki njimedya en’olotsi en’oso bona Pontio Pilato,

¹⁴emite, omonyaka lotomo lone efana lianda, efana likambo lina lofeli, yengoko enyedyo ena Nkolo eniso Yesu Masiya;

¹⁵enengi’nd’oenya ena bisike binandamene, ende onoyali Lifoka onosakelama bosako, nk’ende kei, Lifoka lina Roi lina Bafoka bana Rois, la Nyangetuke ena Banyangetuke;

¹⁶onofana bewedi nk’ende kei, onotonga ena fololo eho enefan’oto onolamisa; efan’oto oneenaki, ko efan’oto oninya yeena: lokumo la mpamba eneyal’ende bisike bihitu. Ndoho.

¹⁷Sumol’iy’anayali batuki bana loko lone, batayo fefake, ko batilake’otema ena lituka linalifalingalinga lisila: bailake botema nk’eneyali Yakomba onotofuedya toma tohatotu lacin’eho tok’ekiko la toho;

¹⁸oasumole bakambe baoyi ban’olotsi, bafudya bikambwa bin’olotsi, bakolane likafel’ato toma, ko bakamby’ato;

¹⁹bayomonyedy’iyoamene emonyedyo enonga bolotsi lacin’en’esike enongoya linga, lacin’eho baundamele liiko loho loneloyali nko liiko mene.

²⁰O Timoteo, ongya litombanya yoi liho linik’osukyamaka; fengola baoyi ban’etaketaka banafaatela Yakomba lokumo, ko la bifekedyo bina njeya enefayali njeya mene, nde mpoci.

²¹Bamoi mbo iyo bamolata njeya eho; koko iyo bamotembwa en’imeedyo iniyo. Isei iyalamake l’e.